ဧရာဝတီတိုင်း၊ ပုသိမ်မြို့နယ်မှာ အုပ်ချုပ်ရေးမှူးတွေက အရပ်သားလူငယ် ၁၁ ယောက်ကို စစ်မှုထမ်းစေဖို့ အဓမ္မ ဖမ်းခေါ်စုဆောင်းခဲ့တယ်လို့ ဒေသခံတွေဆီက သိရပါတယ်။

သြဂုတ် ၁ ရက်ကနေ ၁၄ ရက်အထိ စစ်ကောင်စီရဲ့ ရပ်ကွက်နဲ့ ကျေးရွာအုပ်ချုပ်ရေးမှူးတွေ၊ ပြည်သူ့စစ်တွေ၊ ရဲတွေက စစ်မှုထမ်းဖို့အတွက် ဆင့်ခေါ်စာပို့ ကြိုတင်အသိပေးတာမရှိဘဲ အရပ်သားလူငယ် ၁၁ ယောက်ကို စစ်မှုထမ်းဖို့ အဓမ္မဖမ်းဆီးခေါ်ဆောင်ခဲ့တာလို့ ဆိုပါတယ်။

ဖြစ်စဉ်ကိုသိရှိတဲ့ ဒေသခံတယောက်က “မနက် အရုဏ်တက်ကြီး လာဖမ်းခေါ်တာ။ အိမ်ကို လှည့်ဝိုင်းပြီး ကောင်လေးကိုခေါ်သွားတာ။ ဘာကြောင့် ဘာလုပ်မိလို့လဲ၊ ဘာအပြစ်ရှိလို့လဲပေါ့။ ဖမ်းခေါ်ပြီး ညနေလောက်မှ သိရတာ။ စစ်မှုထမ်းဖို့ ခေါ်တယ်ဆိုတာကို သိရတာပါ” လို့ ပြောပါတယ်။

စစ်မှုထမ်းဖို့ ဖမ်းဆီးခေါ်ခံရတဲ့ ဒေသခံအရပ်သား ၁၁ ယောက်ဟာ ပုသိမ်မြို့နယ်ထဲက ကြခတ်ကုန်းကျေးရွာ၊ ကိုးဆူကျေးရွာ၊ ကင်မလင်းကျွန်းရပ်ကွက်၊ အမှတ် ၆ ရပ်ကွက်၊ ကြက်ပေါင်ကျေးရွာ၊ ဂွေးကုန်းကျေးရွာနဲ့ ပေါက်ကုန်းရွာ စတဲ့ကျေးရွာတွေက လူငယ်တွေ ဖြစ်တယ်လို့ သိရပါတယ်။

ပုသိမ်အခြေစိုက် စစ်ကောင်စီတပ်နဲ့ နီးစပ်သူက “အခုက အဓမ္မဖမ်းခေါ်တဲ့စနစ်နဲ့ ခေါ်နေတာ ဟုတ်တယ်။ ကြိုအကြောင်းကြားတော့ ဘယ်သူမှ မလိုက်ဘူးလေ။ အကုန်ထွက်ပြေးကုန်တာ။ အခု စုဆောင်းတာက အပတ်စဉ် ၁၆ အတွက် ဖြစ်မယ်” လို့ ပြောပါတယ်။

အဲဒီ ဖမ်းဆီးခေါ်ခံရတဲ့ အမျိုးသားလူငယ်တွေကို စစ်တပ်ရဲ့ ပုသိမ်အခြေစိုက် တောင်ပေါ်တပ်နဲ့ ပုသိမ်လေ့ကျင့်ရေးတပ် အမှတ် ၆ မှာ ချုပ်နှောင်ထားပြီး မိသားစုတွေနဲ့ အဆက်အသွယ် ဖြတ်ထားတယ်လို့ သိရပါတယ်။

ပြီးခဲ့တဲ့ ဇူလိုင်လက ဖွင့်လှစ်ခဲ့တဲ့ စစ်မှုထမ်း အပတ်စဉ် ၁၄ တုန်းကလည်း ပုသိမ်မြို့နယ်မှာ စစ်ကောင်စီတပ်နဲ့ အုပ်ချုပ်ရေးမှူးတွေက လူငယ်တွေကို အဓမ္မဖမ်းဆီးခေါ်ဆောင်ခဲ့ပြီး ငွေကြေးချမ်းသာတဲ့ မိသားစုတွေက လူငယ်တချို့ကတော့ စစ်ကောင်စီတပ်ကို ပိုက်ဆံပေး ပြန်ရွေးခဲ့ရတယ်လို့ သိရပါတယ်။