ထရမ့်ပ်နဲ့ ပူတင် ထိပ်သီးဆွေးနွေးပွဲမတိုင်မီ ယူကရိန်းသမ္မတ ဇလန်းစကီးဟာ ဗြိတိန်ဝန်ကြီးချုပ် စတာမာနဲ့ ဒေါင်းနင်းလမ်းမှာ တွေ့ဆုံခဲ့ပါတယ်။

ယူကရိန်းနဲ့ ရုရှားတို့ကြားမှာ အပစ်အခတ်ရပ်စဲရေး အခွင့်အရေး အလားအလာ ရှိတယ်လို့ ထရမ့်ပ်နဲ့ ပူတင်တို့ရဲ့ ဆွေးနွေးမှုမတိုင်မီ စတာမာက ပြောဆိုထားပါတယ်။

ဇလန်းစကီးနဲ့ စတာမာတို့ တွေ့ဆုံမှုဟာ ဗြိတိန်ရဲ့ ပူးပေါင်းဆောင်ရွက်မှုကို ပြသတာ ဖြစ်တဲ့အကြောင်းလည်း သတင်းတွေက ဖော်ပြပါတယ်။

ဥရောပခေါင်းဆောင်တွေနဲ့ မနေ့က ဆွေးနွေးမှုတွေ ပြုလုပ်ခဲ့ပြီးနောက် ပူတင်သာ ယူကရိန်းစစ်ပွဲကို ရပ်ဖို့ သဘောမတူဘူးဆိုရင် ကြီးမားတဲ့ အကျိုးဆက်တွေ ခံရမှာဖြစ်တယ်လို့ ထရမ့်ပ်က ပြောထားပါတယ်။

ပူတင်သာ ငြိမ်းချမ်းရေးကို သဘောမတူဘူးဆိုရင် အမေရိကန်က ဖိအားတွေ ပိုပေးမှာဖြစ်တယ်လို့ ဂျာမနီအဓိပတိ မားဇ်က ပြောထားပါတယ်။

ဇလန်းစကီးကလည်း အမေရိကန်က မိမိတို့ကို အကူအညီတွေ ပိုပေးမှာဖြစ်ကြောင်း ပြောကြားထားပါတယ်။

ဇလန်းစကီးဟာ ဗုဒ္ဓဟူးနေ့က ဂျာမနီနိုင်ငံကို ရောက်ရှိနေပြီး ဥရောပခေါင်းဆောင်တွေနဲ့အတူ ထရမ့်ပ်နဲ့ ဆွေးနွေးမှု ပြုလုပ်ခဲ့ပါတယ်။

အဲဒီ အွန်လိုင်းဆွေးနွေးပွဲမှာ ယူကရိန်းနယ်မြေတွေ ရုရှားကို မပေးရေးနဲ့ ပတ်သက်ပြီး ဆွေးနွေးခဲ့တာ ဖြစ်ပါတယ်။

ဇလန်းစကီးကတော့ စစ်ပွဲကို အဆုံးသတ်မယ်ဆိုတဲ့ ပူတင်ရဲ့ လိမ်ညာမှုတွေကို မယုံကြည်ဖို့ ထရမ့်ပ်ကို သတိပေးခဲ့ပါတယ်။

ယူကရိန်းအရေးကိစ္စနဲ့ ပတ်သက်ပြီး ဗြိတိန်၊ ပြင်သစ်၊ ဂျာမနီ ၃ နိုင်ငံ ဆန္ဒရှိသူများ ညွန့်ပေါင်းအဖွဲ့က ယူကရိန်း ငြိမ်းချမ်းရေးလမ်းကြောင်းပေါ်မှာပဲ ရှိစေချင်တယ်လို့ ဆိုပါတယ်။

ထရမ့်ပ်နဲ့ ပူတင်တို့ တွေ့ဆုံမှုဟာ ၂၀၂၁ ခုနှစ်က အမေရိကန်နဲ့ ရုရှားတို့ တွေ့ဆုံခဲ့ပြီးနောက် ပထမဆုံးအကြိမ် ထိပ်သီးတွေ့ဆုံမှုပဲ ဖြစ်ပါတယ်။

Source: Reuters