ရန်ကုန်၊ မရမ်းကုန်းမြို့နယ်၊ မြကျွန်းသာ၊ ကမ္ဘာအေးကန်ဘောင် ၁ ဘက်မှာ ဩဂုတ် ၁၃ ရက် ည ၁၀ နာရီကျော်က အင်းလျားကန်ရေပြင်ထဲ လူတယောက်ရဲ့ရုပ်အလောင်း ပေါ်လာတာကြောင့် ဆယ်ယူခဲ့ရတယ်လို့ မေတ္တာသီတာရေစင် လူမှုကူညီရေးအသင်းက ပြောပါတယ်။

သေဆုံးသူဟာ အသက် ၇၈ နှစ်အရွယ် အမျိုးသားကြီးတယောက်ဖြစ်ပြီး အဆိုပါနေ့ ညနေ ၄ နာရီကျော်ကတည်းက ကန်ထဲကို ခုန်ချသွားတာလို့ သိရပါတယ်။

ကယ်ဆယ်ရေးအဖွဲ့ဝင်တယောက်က “ည ၁၀ နာရီကျော်လောက်မှာ DB (ရုပ်အလောင်း) သွားကောက်ရတာ။ မြန်မာပလာဇာရှေ့တည့်တည့်က အင်းလျားကန်ထဲမှာပါ။ ကမ္ဘာအေးတစ်လို့ ခေါ်တယ်။ အသက်က ၇၈၊ ၇၉ လောက်ရှိပြီ။ အမျိုးသားတဦးပါ။ မိသားစုတွေ ရောက်နေကြပါပြီ” လို့ ပြောပါတယ်။

ရေကန်ထဲခုန်ချရတဲ့ အကြောင်းအရင်းနဲ့ သေမှုသေခင်းဖြစ်စဉ်ကို သက်ဆိုင်ရာ ရဲတပ်ဖွဲ့ဝင်တွေက စုံစမ်းစစ်ဆေးနေဆဲ ဖြစ်ပါတယ်။

လက်ရှိမှာ သေဆုံးသူရဲ့ မိသားစုဝင်တွေနဲ့ အဆက်အသွယ်ရရှိထားပြီး ရုပ်အလောင်းကို မြောက်ဥက္ကလာပမြို့နယ်၊ မေဓာဝီဆေးရုံကို ပို့ဆောင်ပေးထားတယ်လို့ သိရပါတယ်။