ရန်ကုန်၊ ဗဟန်းမြို့နယ်မှာ ဩဂုတ် ၉ ရက် ဒီနေ့မနက်ပိုင်းက ရက်သားအရွယ် ကလေးငယ်တယောက်ရဲ့ ရုပ်အလောင်းတွေ့ခဲ့ရတယ်လို့ မေတ္တာစေတနာ လူမှုကူညီရေးအသင်း ဆီကနေ သိရပါတယ်။

မနက် ၉ နာရီကျော်က ဗဟန်းမြို့နယ်၊ မဟာစည်သာသနာ့ရိပ်သာလမ်း အမှိုက်ကန်နားမှာ ရက်သားအရွယ် ကလေးငယ်ရဲ့ ရုပ်အလောင်းကို တွေ့ခဲ့ရတာလို့ သိရပါတယ်။

မေတ္တာစေတနာ လူမှုကူညီရေးအသင်း တာဝန်ရှိသူတယောက်က “အမှိုက်ကန်နားမှာပစ်သွားတာ။ ဗဟန်းမြို့မ ရဲစခန်းကနေပြီးတော့ ဖုန်းဆက်အကူအညီလှမ်းတောင်းလို့ သွားခဲ့တာပေါ့။ ရက်သားလောက်ပဲရှိဦးမယ်။ ချက်ကြိုးတွေတောင်မဖြည်ရသေးဘူး။ ယောကျ်ားလေးလို့ ယူဆရတယ်။ ပုပ်နံ့တွေတောင်ထွက်နေပြီ” လို့ ပြောပါတယ်။။

လာရောက်စွန့်ပစ်ထားတဲ့ ရက်သားအရွယ်ကလေးရုပ်အလောင်းနဲ့ပတ်သက်လို့ ဗဟန်းမြို့မ ရဲစခန်းတာဝန်ရှိသူတွေ ဆက်လက်စုံစမ်းစစ်ဆေးနေတယ်လို့ သိရပါတယ်။

အလောင်းကိုတော့ လူမှုကူညီရေးအသင်းကားနဲ့ ရန်ကုန်ဆေးရုံကြီး အရေးပေါ်ဌာနကနေတဆင့် ရင်ခွဲရုံဆီ ပို့ဆောင်ပေးခဲ့ပြီး သေစာရင်းလုပ်ပြီးနောက် ရန်ကုန်ဆေးရုံကြီး အအေးတိုက်ဆီကို ပို့ဆောင်ပေးခဲ့တယ်လို့ သိရပါတယ်။

Photo : မေတ္တာစေတနာ လူမှုကူညီရေး အသင်း