တနင်္သာရီတိုင်း၊ ကော့သောင်းမြို့နယ် အခြေစိုက် ခမရ ၄၃၁ တပ်ရင်းက စစ်ကောင်စီတပ်သား တယောက် ဇူလိုင် ၂၉ ရက် ညဘက်မှာ တပ်ရင်းက ထွက်ပြေးလာပြီး ဘက်ပြောင်းခိုလှုံလာခဲ့တယ်လို့ ကော့သောင်းမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ပါတယ်။
ထွက်ပြေးလာတဲ့တပ်သားဟာ ရန်ကုန်တိုင်း၊ တိုက်ကြီးမြို့က အသက် ၂၆ နှစ်အရွယ် ကိုအေးမင်းထွန်း ဖြစ်ပြီး ရွှေဘိုမြို့ အမှတ် ၈ သင်တန်းကျောင်းဆင်းသူဖြစ်ကာ စစ်ကောင်စီလက်အောက်မှာ တနှစ်ကျော် တာဝန်ထမ်းဆောင်ခဲ့သူဖြစ်ပြီး ကော့သောင်းမြို့နယ်၊ နမ္မတူအခြေစိုက် ရှေ့တန်းစခန်းကနေ ထွက်ပြေးလာခဲ့တယ်လို့ ကော့သောင်းခရိုင် ပြည်သူ့ကာကွယ်ရေးတပ်ဖွဲ့ရဲ့ တာဝန်ခံတယောက်က ပြောပါတယ်။
“သူက ၃ ခါ ထွက်ပြေးတယ်။ ပထမထွက်ပြေးတာ မအောင်မြင်ဘူး၊ အဖမ်းခံရတယ်။ ရှေ့တန်းကို ပြန်လွှတ်တဲ့အခါမှာ လမ်းမှာ မြိတ်မှာပဲ ဒုတိယအကြိမ် ထွက်ပြေးတယ်။ မန္တလေးမှာ အဖမ်းခံရတယ်။ မန္တလေးမှာ သူ့ကို ချုပ်ထားတော့ ၄၃၁ တပ်ရင်းကနေ သူ့ကို ပြန်လာခေါ်တယ်။ သူ့ကို ပြန်ပြီး စစ်မှုထမ်းခိုင်းတယ်။ နမ္မတူရှေ့တန်း ခြေကုပ်စခန်း ရောက်တဲ့အချိန်မှာ ပြန်ထွက်ပြေးလာပြီးတော့ လွတ်မြောက်လာတယ်။”
စစ်ကောင်စီလက်အောက်မှာ တာဝန်မထမ်းချင်တာကြောင့် ၃ ကြိမ်တိုင် ထွက်ပြေးခဲ့ပြီး ၂ ကြိမ်တိုင် ဖမ်းဆီးထိန်းသိမ်းခံရပြီးမှ ၃ ကြိမ်မြောက် ထွက်ပြေးရာမှာတော့ ပြည်သူ့ရင်ခွင်ထံ ချိတ်ဆက်ခိုလှုံနိုင်ခဲ့တာလို့ ပြောပါတယ်။
လက်ရှိ ဘက်ပြောင်းလာတဲ့ တပ်သား ကိုအေးမင်းထွန်းကို ဘေးကင်းလုံခြုံစွာထားရှိပြီး နောက်ထပ် ဘက်ပြောင်းလာမယ့်သူတွေကိုလည်း လက်ခံကြိုဆိုသွားမယ်လို့ တော်လှန်ရေးတပ်ဖွဲ့က ပြောပါတယ်။
အခု ဇူလိုင်လအစောပိုင်းကလည်း နမ္မတူအခြေစိုက် ရှေ့တန်းစခန်းကနေ စစ်ကောင်စီတပ်သား ၂ ယောက် ထွက်ပြေးလာပြီး ကော့သောင်းမြို့နယ် ပကဖအဖွဲ့ထံ ဘက်ပြောင်းလာခဲ့တယ်လို့ ထုတ်ပြန်ထားပါတယ်။
