၂ နှစ်ကျော်ကြာ လက်နက်ကိုင် ပဋိပက္ခတွေကြောင့် ဆူဒန်နိုင်ငံရဲ့ အခြေခံအဆောက်အအုံတွေ ပျက်စီးခဲ့ပြီး ပြည်သူတွေရဲ့ အသက်အိုးအိမ် စည်းစိမ်ကို ဆိုးဆိုးရွားရွား ထိခိုက်စေတဲ့အထိ လျှပ်စစ်ဓာတ်အား ပြတ်တောက်ခဲ့ပါတယ်။
၂၀၂၄ ခုနှစ် နှောင်းပိုင်းကစပြီး အလယ်ပိုင်းဒေသအများစုမှာ လုံခြုံရေးအခြေအနေ တိုးတက် ကောင်းမွန်လာပေမဲ့ လျှပ်စစ်၊ ရေနဲ့ သဘာဝဓာတ်ငွေ့ ဖြန့်ဖြူးမှုက ပြန်ကောင်းမလာခဲ့ပါဘူး။
ဆူဒန်နိုင်ငံရဲ့ မြို့တော် ခါတွန်မ်မှာ ပဋိပက္ခတွေအတွင်း အကြိမ်ကြိမ် တိုက်ခိုက်ခံခဲ့ရတဲ့ အကြီးဆုံး ရေနံချက်စက်ရုံကို ပိတ်ထားဆဲဖြစ်ပြီး လျှပ်စစ်ဓာတ်အား ထပ်ပြတ်တောက်ခဲ့တဲ့အပြင် လောင်စာဆီလည်း ပြတ်တောက်နေပါတယ်။
“သူပုန်တွေစခဲ့တဲ့ စစ်ပွဲက လျှပ်စစ်ဓာတ်အား ထုတ်လုပ်ရေး၊ သွယ်တန်းရေးနဲ့ ဖြန့်ဖြူးရေး အပါအဝင် ကဏ္ဍတွေကို ကြီးကြီးမားမား ထိခိုက်ခဲ့ပါတယ်” လို့ ဆူဒန် အမျိုးသား လျှပ်စစ်ကော်ပိုရေးရှင်း အကြီးအကဲ အဗ္ဗဒူလာက ပြောပါတယ်။
ပင်လယ်နီအနားက ဆိပ်ကမ်းမြို့ဖြစ်တဲ့ ပို့ထ်ဆူဒန်မြို့မှာ နေ့စဉ် မီးပျက်ချိန် ၁၀ နာရီထက် ကျော်လွန်နေပါတယ်။
ခါတွန်မ်မြို့တော်မှာ နေသူတွေကတော့ လျှပ်စစ်ဓာတ်အားမရဘဲ နေ့စဥ် ၁၂ နာရီကနေ ၁၆ နာရီအထိ နေရပြီး ဖယောင်းတိုင်တွေက အလွန်လိုအပ်တဲ့ ကုန်ပစ္စည်း ဖြစ်နေပါတယ်။
ခါတွန်မ်မြို့ခံ ဖာတီမာက “ဓာတ်အားပြတ်တောက်မှုကြောင့် ရေပေးဝေမှုကို အနှောင့်အယှက် ဖြစ်စေပါတယ်။ ရေတွင်း ဒါမှမဟုတ် မြစ်တွေကနေ မသန့်ရှင်းတဲ့ရေကို သောက်ရပါတယ်။ တိုက်ပွဲတွေ ရပ်တန့်သွားပေမဲ့ လျှပ်စစ်မီး မရသေးတာကြောင့် မီးပြတ်တာကြောင့် အခက်အခဲတွေကို ဆက်ကြံ့ကြံ့ခံပြီး ရပ်တည်နေပါတယ်။ အိုးအိမ်မဲ့ မိသားစုတွေ အိမ်မပြန်နိုင်သလို ဒီအခြေအနေအောက်မှာ အလုပ်လည်း မလုပ်နိုင်ပါဘူး” လို့ ပြောပါတယ်။
Source: Reuters
