ဧရာဝတီမြစ်အတိုင်း ဆန်တက်လာတဲ့ စစ်ကောင်စီ စစ်သင်္ဘောတွေဟာ စစ်ကိုင်းတိုင်း ကသာမြို့ကနေ ကချင်ပြည်နယ်ဘက် တက်သွားပြီလို့ ဒေသခံတွေဆီက သိရပါတယ်။

ဇူလိုင် ၁၇ ရက်က ဧရာဝတီမြစ်ကြောင်းအတိုင်း ဆန်တက်လာတဲ့ စစ်သင်္ဘော ၁၇ စီးဟာ ဇူလိုင် ၂၅ ရက်ညနေ ၃ နာရီဝန်းကျင်မှာ ကသာမြို့အောက်ဘက် တုန်းပေါရွာအနီး ဆိုက်ကပ်ခဲ့တယ်လို့ ဆိုပါတယ်။

စစ်သင်္ဘောတွေ ကသာမြို့အနီး မဆိုက်ကပ်ခင် လေယာဉ် ၆ စီးက လုံခြုံရေးယူပေးခဲ့သလို သင်္ဘောတွေကလည်း မြစ်ကမ်းဘေးတွေကို လက်နက်ကြီးနဲ့ ပစ်ခတ်တယ်လို့ ဆိုပါတယ်။

ဒေသခံတယောက်က “လေယာဥ်နဲ့ ဗုံး ၅ လုံးကြဲချတယ်။ တုန်းပေါရွာအနီး နေအိမ်တလုံး မီးလောင်သွားတယ်။ ကသာမြို့အရှေ့ဘက်ကမ်းမှာတော့ ဝက် ၃ ကောင်ထိမှန်တယ်” လို့ DVB ကို ပြောပါတယ်။

အဲဒီစစ်သင်္ဘောတွေဟာ ကသာမြို့မှာ ညအိပ်ရပ်နားပြီး ဒီနေ့ ဇူလိုင် ၂၆ ရက် မနက် ၉ နာရီမှာ ကသာမြို့အထက် ရွှေကူ၊ ဗန်းမော်မြို့တွေဆီ ဆက်လက်ဆန်တက်သွားတယ်လို့ သိရပါတယ်။

ဒေသခံ နောက်တယောက်ကလည်း “မနေ့က သူတို့တွေ ကမ်းကပ်ဖို့လာတော့ ကြဲတာ။ ၆ စီး လုံခြုံရေးယူပေတယ်။ ဒီနေ့ မနက်တော့ မကြဲဘူး။ Y12 တစီးပဲ ပျံဝဲလုံခြုံရေးယူတယ်” လို့ ပြောပါတယ်။

အဲဒီစစ်သင်္ဘောတွေဟာ ဇူလိုင် ၂၄ ရက်က ထီးချိုင့်မှာ တညအိပ်ပြီး လက်နက်ခဲယမ်း ဖြည့်တင်းတယ်လို့ သိရပါတယ်။

စစ်သင်္ဘောတွေဟာ မန္တလေး ဂေါဝန်ဆိပ်ကမ်းကနေ ဇူလိုင် ၁၇ ရက်က ဆန်တက်လာတာ ဖြစ်ပါတယ်။