ထိုင်း-မြန်မာနယ်စပ် ချင်းရိုင်းခရိုင်ထဲမှာ ဇူလိုင် ၁၂ ရက် တနေ့တည်း ပိုင်ရှင်မဲ့ စိတ်ကြွဆေး ၁ သန်း ၇ သိန်းနီးပါးနဲ့ ဘိန်းစိမ်းတွေပါ ဖမ်းမိတယ်လို့  မယ်ဆိုင်ပရက်စ် ထိုင်းသတင်းမှာ ဖော်ပြပါတယ်။ 

နယ်မြေထဲမှာ မူးယစ်ဆေးဝါး သယ်ဆောင်ဖို့ရှိကြောင်း ကြိုတင်သတင်းပေးချက်ရတာကြောင့် အမှတ် ၅ တိုင်းဒေသ မူးယစ်ဆေးဝါးနှိမ်နင်းရေးတပ်ဖွဲ့နဲ့ နယ်မြေခံရဲတွေဟာ ဇူလိုင် ၁၂ ရက် မနက်ကတည်းက မယ့်ကျန်းမြို့နယ်၊ မယ်ဆိုင်-မယ့်ကျန်း လမ်းပေါ်မှာ မသင်္ကာဖွယ်ကားတွေ တားဆီးစစ်ဆေးခဲ့ပါတယ်။

မနက် ၁ နာရီခွဲလောက်မှာတော့ မယ်ဆိုင်ဘက်ကနေ ဝင်ရောက်လာတဲ့ မီးခိုးရောင် ဟိုင်းလပ်စ် ကားတစီးကိုပါ တားဆီးစစ်ဆေးခဲ့တာမှာ ရပ်မပေးဘဲ အရှိန်မြှင့် မောင်းထွက်သွားတာကြောင့် တာဝန်ရှိသူတွေက နောက်ကကားနဲ့ လိုက်ဖမ်းခဲ့ပါတယ်။

မယ့်ကျန်းမြို့နယ် ပါဆန်းလုံရွာနားရောက်တော့ လမ်းဘေးမှာ ရပ်ထားတဲ့ အဲဒီကားကို တွေ့ပေမဲ့ ကားထဲမှာ လူမရှိလို့ ကားပေါ် ဝင်စစ်ကြတာမှာ  စိတ်ကြွဆေး ၂ သိန်းစီ ထည့်ထားတဲ့   ဆာလာအိတ် ၆ လုံး၊  စုစုပေါင်းစိတ်ကြွဆေးပြားပေါင်း  ၁ သန်း ၂ သိန်း ဖမ်းဆီးရမိတာလို့ ဆိုပါတယ်။ 

ဇူလိုင် ၁၂ ရက် ည ၈ နာရီခွဲလောက်မှာလည်း ချင်းရိုင်းခရိုင် မယ်ဖာ့လုံမြို့နယ် မယ့်စလောင်းနောက်ရွာအနီး စစ်ဆေးရေးဂိတ်မှာ မရပ်နားဘဲ ဖြတ်ပြေးသွားတဲ့ ဟိုင်းလပ်စ်ကားတစီးနောက်ကို တာဝန်ရှိသူတွေက လိုက်ဖမ်းခဲ့ပါတယ်။

အဆိုပါကားဟာ ဘန့်ပုံပါခဲမ်ကျေးရွာအနီးမှာ ရပ်ထားတာကို တွေ့ရပြီး ယာဉ်မောင်းကတော့ ထွက်ပြေးသွားပါတယ်။ ကားပေါ်မှာ အိတ် ၅ လုံး တွေ့ရှိပြီး အိတ် ၄ လုံးထဲကနေ စိတ်ကြွဆေးပြား ၄၉၆,၀၀၀ ပြားနဲ့ ကျန်တဲ့ အိတ်ထဲကနေ ဘိန်းစိမ်း အလေးချိန် ၂၅ ကီလိုဂရမ်ကို ဖမ်းဆီးရမိလို့ တာဝန်ရှိသူတွေဟာ မူးယစ်ဆေးကွင်းဆက်တွေပါ ဖမ်းဆီးအရေးယူနိုင်ဖို့ မော်တော်ကားပိုင်ရှင်ကို လိုက်လံစုံစမ်းနေတယ်လို့ ထိုင်းသတင်းမှာ ဖော်ပြပါတယ်။ 

Source:  Maesai Press