စစ်ကိုင်းတိုင်း၊ မြောင်မြို့နယ်မှာ စစ်ကောင်စီတပ်အတွင်း နှိပ်စက်မှုကြောင့် ထွက်ပြေးလာတဲ့ စစ်သား ၁ ဦး ဖမ်းဆီးထိန်းသိမ်းထားတယ်လို့ ကျေးရွာတပ်ပေါင်းစု-မြိုင် အဖွဲ့ဆီကနေ သိရပါတယ်။

ကျေးရွာတပ်ပေါင်းစု-မြိုင်အဖွဲ့ရဲ့ ပြန်ကြားရေးတာဝန်ရှိသူက “ကျောက်ရစ်ရဲစခန်းမှာ တာဝန်ကျနေတဲ့ တပ်သားအဆင့်ရှိသူက စစ်တပ်အတွင်းမှာ ကြီးနိုင်ငယ်ညှဉ်းလုပ်တာတွေအပြင် ခွဲခြားဆက်ဆံခံရတာတွေနဲ့ ရာထူးရှိတဲ့သူတွေရဲ့ အမြဲတမ်းဆဲ​ဆိုနေတဲ့ဒဏ်ကို မခံနိုင်တော့လို့ ထွက်ပြေးလာတာလို့ ပြောတယ်။ ထမင်းစားချိန်ဆိုရင် ဆဲလိုက်ဆိုလိုက်တာ ကျွေးတာနဲ့ မကာဘူးတဲ့ဗျ။ သူထွက်ပြေးလာတဲ့အချိန် ကျနော်တို့ဆီက ရဲဘော်တွေနဲ့တိုးပြီး ဖမ်းဆီးထိန်းသိမ်းထားခဲ့တာ။ လစ်တဲ့အချိန်ပြေးလာရတာဆိုတော့ လက်နက်ယူမလာနိုင်ဘူး ပြောတယ်” လို့ ပြောပါတယ်။

အဆိုပါစစ်ကောင်စီတပ်ဖွဲ့ဝင်ဟာ စစ်ကောင်စီတပ်ရဲ့ မတရားပေါ်တာဆွဲဖမ်းဆီးခံရပြီး စစ်မှုထမ်းနေရတဲ့ ကိုယ်ပိုင်အမှတ် (ပစ-၁၁၀၆၉၂) တပ်သား သန်းထိုက်ဖြစ်ပြီး ဇူလိုင် ၅ ရက်နေ့မှာ ဖမ်းဆီးရမိခဲ့တာလို့ ဆိုပါတယ်။

ကျေးရွာတပ်ပေါင်းစု-မြိုင်အဖွဲ့ရဲ့ တာဝန်ခံတယောက်က “ဇူလိုင် ၃ ရက်နေ့လောက်က ထွက်ပြေးလာတာ။ မြောင်နယ်ထဲမှာပဲ ဖမ်းမိတာပါ။ သူကအလင်းဝင်ဖို့ ထွက်​ပြေးလာတာတော့မဟုတ်ဘူး။ ဒါပေမဲ့ လုံခြုံဘေးကင်းတဲ့နေရာ ပို့ဆောင်လိုက်ပြီးတော့ စစ်ဆေးမှုတွေ လုပ်ဆောင်နေပါတယ်။ ထူးခြားဖြစ်စဥ်တွေနဲ့ သတင်းထုတ်ပြန်လို့ရတဲ့ အချက်အလက်တွေပါလာရင် ထပ်ပြောပေးပါမယ်” လို့ DVB ကို ပြောပါတယ်။

ကျောက်ရစ်ရဲစခန်းမှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေဟာ အနီးအနားကျေးရွာတွေကို စစ်ကြောင်းထိုးပြီး ပြည်သူပိုင်ပစ္စည်းတွေကို ခိုးယူလုယက်လေ့ရှိလို့ တော်လှန်ရေးတပ်ဖွဲ့တွေရဲ့ မကြာခဏတိုက်ခိုက်ခံနေရတယ်လို့ မြောင်အခြေစိုက်တော်လှန်ရေးတပ်ဖွဲ့ဝင်တွေဆီကနေ သိရပါတယ်။

Photo : ကျေးရွာတပ်ပေါင်းစု-မြိုင်