စစ်ကောင်စီရဲ့ ရွေးကောက်ပွဲနဲ့ပတ်သက်တာတွေလုပ်နေတဲ့ ရန်ကုန်၊ မြောက်ဥက္ကလာပမြို့နယ် ကြံ့ခိုင်ရေးပါတီရုံး ဇူလိုင် ၁၁ ရက်ညပိုင်းက လောင်ချာနဲ့ပစ်ခံရပြီးနောက် လူငယ် ၂ ယောက် ဖမ်းဆီးခံရတယ်လို့ မြို့ခံတွေဆီက သိရပါတယ်။

မြောက်ဥက္ကလာပမြို့နယ်၊ ခေမာသီလမ်းမ၊ ရုံးသစ်မှတ်တိုင်နားမှာရှိတဲ့ ကြံ့ခိုင်ရေးရုံးကို  ‌‌မနေ့ည ၁၀ နာရီ ၅ မိနစ်လောက်မှာ Yangon Army နဲ့ အနောက်ပိုင်းခရိုင် ပကဖပူးပေါင်းအဖွဲ့က M79 လောင်ချာ ၄၀ မမ ဗုံးသီး ၂ လုံးနဲ့ ပစ်ခတ်ခဲ့တာ ဖြစ်ပါတယ်။

Yangon Amry တပ်ဖွဲ့တာဝန်ရှိသူက “ပစ်မှတ်အား ထိရောက်စွာပစ်ခတ်နိုင်ခဲ့တယ်။ ထိခိုက်မှုတွေတော့ရှိမယ်။ ပြည်သူ့ဆန္ဒမပါဘဲ ရွေးကောက်ပွဲပြုလုပ်ဖို့ လုပ်ဆောင်နေတာကြောင့် ခုလို ၄၀ ဗုံးသီး ၂ လုံးနဲ့ပစ်ခတ်ခဲ့တာ” လို့ ပြောပါတယ်။

ထိခိုက်မှုအခြေနေကိုတော့ ဆက်လက်စုံစမ်းနေပြီး ဆက်လက်ပြီးတော့လည်း စစ်ကောင်စီနဲ့ ပတ်သက်တဲ့ ပစ်မှတ်တွေ၊ စစ်ကောင်စီပြုလုပ်မယ့် ရွေးကောက်ပွဲနဲ့ပတ်သတ် ပါဝင်လုပ်ကိုင်နေကြသူတွေကိုလည်း အပြင်းအထန်တိုက်ခိုက်သွားမယ်လို့ ဆိုပါတယ်။

ပစ်ခတ်မှုအပြီးမှာ မြောက်ဥက္ကလာထွေအုပ်ရုံးနဲ့ ရဲစခန်းထဲက စစ်ကား ၂ စီးနဲ့ လာရောက်စစ်ဆေးခဲ့သလို ဝေပုလ္လလမ်းထိပ် လက်ဖက်ရည်ဆိုင်က မေဓာဝီလမ်းဆုံဘက်ကို လမ်းလျှောက်ပြန်လာတဲ့ အသက် ၂၀ ကျော်အရွယ် လူငယ် ၂ ယောက်ကို ဖမ်းဆီးသွားတာလို့ မြို့ခံတွေဆီက သိရပါတယ်။

မြို့ခံတယောက်က “အမှတ် ၉ မှာပဲ။ မိသားစုနဲ့တော့ တွေ့ခွင့်ရသေးတယ်။ ဒီမနက် လူကြီးတွေ လိုက်သွားကြတာ။ လက်ဖက်ရည်ဆိုင်ကနေပြန်လာရင်း ပစ်တဲ့အချိန်နဲ့တိုက်ပြီး အဆွဲခံရတာ။ အရိုက်ခံထားရတာတွေတော့ မတွေ့မိဘူး” လို့ ပြောပါတယ်။

ဖမ်းဆီးခံရသူတွေဟာ တံတားကြီးရပ်ကွက်နေ ကိုအောင်ကိုနဲ့ ကိုကောင်းစည်သူတို့ဖြစ်ကြပြီး မြောက်ဥက္ကလာ အမှတ် ၉ ရဲစခန်းမှာ ချုပ်နှောင်စစ်ဆေးခံနေရတယ်လို့ သိရပါတယ်။