ဧရာဝတီတိုင်း၊ ပုသိမ်ခရိုင်၊ ကျုံပျော်မြို့နယ်၊ တိုက်ရွာကျေးရွာအုပ်စုက စစ်ကောင်စီခန့် အုပ်ချုပ်ရေးမှူးဟာ ပြည်ပမှာ သွားရောက်အလုပ်လုပ်နေသူတွေအစား စစ်မှုထမ်းထောက်ပံ့ကြေး တယောက်ကိုကျပ် ၁ သိန်း ကောက်ယူနေတယ်လို့ ဒေသခံတွေဆီက သိရပါတယ်။
တိုက်ရွာကျေးရွာအုပ်စု အုပ်ချုပ်ရေးမှူး ကျော်မြင့်ဟာ ဇူလိုင်လ ပထမအပတ်ကစတင်ပြီးကျေးရွာ ၇ ရွာကနေ နိုင်ငံခြားမှာ အလုပ်သွားလုပ်နေတဲ့သူတွေအစား သီးသန့် စစ်မှုထမ်းထောက်ပံ့ကြေးလို့ဆိုပြီး တယောက်စာ ကျပ် ၁ သိန်း အထိ အဓမ္မကောက်ယူနေတာ လို့ဆိုပါတယ်။
ဒေသခံ အမျိုးသမီးတယောက်က “နိုင်ငံခြားမှာ အလုပ်လုပ်နေတဲ့သူတွေက ဝင်ငွေလည်း ကောင်းသလို စစ်မှုထမ်းကိုလည်း ရှောင်နေသလိုဖြစ်နေတာဆိုပြီး အုပ်ကြီးက စစ်မှုထမ်း ထောက်ပံ့ကြေးကို သီးသန့်ကောက်နေတာ။ ၁ သိန်းတောင် ထည့်ရတာ” လို့ ပြောပါတယ်။
ငွေတွေကို ၅ ရက်အတွင်းအပြီးထည့်ဖို့နဲ့ သတ်မှတ်ရက်အတွင်း မထည့်ရင် ရပ်ရွာထဲမှာ ကျန်နေခဲ့တဲ့ မိသားစုကို ဖမ်းဆီးအရေးယူမယ်လို့ ခြိမ်းခြောက်ပြောဆိုနေတယ်လို့ ဆိုပါတယ်။
အုပ်ချုပ်ရေးမှူးနဲ့ ရာအိမ်မှူးတို့ဟာ လစဉ်စစ်မှုထမ်း ထောက်ပံ့ကြေးအဖြစ် တအိမ်ကို ကျပ် ၃၀,၀၀၀ စီ သတ်မှတ်ကောက်ယူသလို ကင်းကြေး၊ ဧည့်စာရင်းတိုင်ကြေးတို့ကိုလည်း ကောက်ယူပြီး စစ်မှုထမ်းစနစ် စတင်ပြီးနောက် ကား ၂ စီးလည်းဝယ်ထားတယ်လို့ ဒေသခံတွေက ပြောပါတယ်။
Photo : MyoTun
