စစ်ကိုင်းတိုင်း၊ မုံရွာမြို့နယ်တွင် စစ်ကောင်စီတပ်ထဲမှာ စစ်မှုထမ်းနေရတဲ့တပ်သားသစ် ၄  ယောက် ဇူလိုင် ၃ ရက် မနက်ပိုင်းမှာ လက်နက်ခဲယမ်းတွေနဲ့အတူ အလင်းဝင်လာကြတယ်လို့ မုံရွာမြို့နယ်ပြည်သူ့လုံခြုံရေးအဖွဲ့ဆီကနေ သိရပါတယ်။

မုံရွာမြို့နယ် ပလဖ တာဝန်ခံ ကိုအာကူးက “စစ်တပ်က ပေါ်တာဆွဲပြီး နမခ ထဲရောက်နေတဲ့ တပ်သား ၄ ယောက်က မုံရွာမြို့နယ် ပကဖ၊ တိုက်နယ် ၂ တိုက်ခိုက်ရေးအဖွဲ့နဲ့ ချိတ်ဆက်ပြီး အလင်းဝင်လာကြတာ” လို့ ပြောပါတယ်။

အလင်းဝင်ရောက်လာကြသူတွေဟာ သူတို့တာဝန်ကျနေကြတဲ့ မုံရွာအခြေစိုက် အနောက်မြောက်တိုင်းစစ်ဌာနချုပ် (နမခ) ရဲ့ ကာကင်းစခန်းတွေကနေ ထွက်ပြေးလာပြီး အလင်းဝင်ရောက်လာခဲ့ကြတာ ဖြစ်ပါတယ်။

အခုနှစ်ထဲမှာ  အလင်းဝင်ခိုလှုံလာကြတဲ့ စစ်ကောင်စီတပ်ဖွဲ့ဝင် အယောက် ၃၀ နီးပါးရှိလာပြီး  လတ်တလော အလင်းဝင်လာတဲ့ ၄ ယောက်ထဲမှာ ၃ ယောက်က လက်နက်နဲ့ ခဲယမ်းတချို့ပါလာတယ်လို့  မုံရွာမြို့နယ် ပကဖ ပြန်ကြားရေးတာဝန်ခံက ပြောပါတယ်။

“အခု ၄​ ယောက်ထဲမှာ ပေါ်တာဆွဲခံရတဲ့သူပါသလို ရပ်ကျေးအုပ်ချုပ်ရေးမှူးရဲ့ လူစားထိုးထည့်တာခံရတဲ့ သူလည်းပါတယ်။ သူတို့တွေအလင်းဝင်ချင်လို့ ကျနော်တို့ဆီကို ချိတ်ဆက်ထားတာတော့ကြာပြီ။ ကြာနေရတာက သူတို့နေခဲ့ရတဲ့တပ်တွင်းထဲမှာ အခုလိုပြေးတဲ့ သူတွေများလို့ဆိုပြီးတော့ ကင်းချိန်ကလွဲလို့ လက်နက်ပေးမကိုင်ဘူး။ သူတို့တွေလည်း အဲ့လိုဘဲ။ လက်နက်လက်ထဲရောက်နေတဲ့အချိန် ကျနော်တို့ဆီကိုဆက်သွယ်လာလို့ နမခ နားမှာရှိတဲ့ ရွာတရွာက သူတို့တာဝန်ကျနေတဲ့ ကာကင်းစခန်းနားအထိသွားခေါ်ထုတ်ခဲ့ရတာ။ ရဲဘော်တွေ အန္တရာယ်တော့များတာပေါ့။”

အလင်းဝင်ရောက်လာကြသူတွေဟာ MA1 သေနတ် ၁ လက်၊ MA3 သေနတ် ၂ လက်၊ လက်ပစ်ဗုံး ၁ လုံးနဲ့ နင်းမိုင်း ၁ လုံးတို့ယူဆောင်လာကြလို့ ဆုကြေးငွေပေးအပ်နိုင်ဖို့ စီစဥ်ဆောင်ရွက်နေပါတယ်။ သူတို့ ၄ ယောက်ထဲမှာ မိသားစုဆီပြန်ချင်တဲ့သူတွေပါသလို ကျနော်တို့အဖွဲ့ထဲဝင်ပြီး စစ်တပ်ကိုပြန်တိုက်မယ့်သူတွေလည်းပါဝင်တယ်လို့ သိရပါတယ်။

မုံရွာမြို့နယ် ပကဖ ပြန်ကြားရေးတာဝန်ခံက  “သူတို့တွေစစ်တပ်ထဲမှာ မှိုင်းတိုက်ခံထားရတာက PDF တွေဆီကို အလင်းဝင်ရင် အသတ်ခံရနိုင်တယ်ပေါ့။ အလင်းဝင်သွားရင်လည်း ကျန်နေတဲ့မိသားစုတွေကိုဖမ်းပြီး သတ်ပစ်မယ်။ ပိုင်ဆိုင်တာတွေကိုလည်းသိမ်းမယ်လို့ ခြိမ်းခြောက်ခံထားရတယ်။ ဒါပေမဲ့ အရဲစွန့်ပြီး အလင်းဝင်လာတယ်လို့ ပြောကြတယ်။ ကျနော်တို့ဆီရောက်မှ သူတို့မှိုင်းသွင်းခံထားရသလို မဟုတ်ဘူးဆိုတာသိသွားကြတယ်။ သူတို့ ၄ ယောက်လုံးက ဧရာဝတီတိုင်းသားတွေပါ”လို့ ပြောပါတယ်။

စစ်ရေးအရှိန်မြှင့်တင်နေပြီဖြစ်လို့ စစ်ကောင်စီလက်အောက်မှာ တာဝန်ထမ်းဆောင်နေကြသူတွေ အနေနဲ့ နီးစပ်တဲ့ပြည်သူ့ကာကွယ်ရေးအဖွဲ့တွေနဲ့ အမြန်ဆုံးချိတ်ဆက်ခိုလှုံအလင်းဝင်ရောက်ကြဖို့ စစ်ကိုင်းတိုင်းပြည်သူ့ကာကွယ်ရေးတပ်ဖွဲ့က တိုက်တွန်းထားပါတယ်။