အာဖရိက အရှေ့ပိုင်းက ယူဂန္ဓာနိုင်ငံကို အနှစ် ၄၀ နီးပါး အုပ်ချုပ်ခဲ့တဲ့ သမ္မတ ယိုဝါရီ မူဆာဗေနီဟာ လာမယ့်နှစ် သမ္မတရွေးကောက်ပွဲ ထပ်ပြိုင်ဦးမယ်လို့ အတည်ပြုလိုက်ပါတယ်။

X လူမှုကွန်ရက်မှာ တင်ထားတဲ့ ပို့စ်မှာ မူဆာဗေနီက သူ့ အာဏာရပါတီ အမျိုးသားတော်လှန်ရေးလှုပ်ရှားမှု (NRM) ကို ကိုယ်စားပြုပြီးတော့ “သမ္မတ အလံကိုင်နေရာအတွက် ယှဉ်ပြိုင်ဖို့ ဆန္ဒရှိပါတယ်” လို့ ရေးထားပါတယ်။

အသက် ၈၀ ရှိပြီဖြစ်တဲ့ ယူဂန္ဓာခေါင်းဆောင်ဟာ ၅ နှစ်တာ ပြောက်ကျားစစ်ပွဲကို ဦးဆောင်ပြီးတဲ့နောက် ၁၉၈၆ ကတည်းက အာဏာယူထားတာ ဖြစ်ပါတယ်။

မူဆာဗေနီ သမ္မတအဖြစ် ထပ်တလဲလဲ တာဝန်ယူနိုင်ဖို့ အခြေခံဥပဒေကိုပါ ၂ ကြိမ်တိတိ ပြင်ဆင်ခဲ့ပြီး ဖြစ်ပါတယ်။

လူ့အခွင့်အရေးအဖွဲ့တွေကတော့ သမ္မတဟာ လုံခြုံရေးတပ်ဖွဲ့တွေနဲ့ သူ သူကောင်းပြုထားတဲ့ သူတွေ အင်အားကို အသုံးပြုပြီးတော့ အာဏာချုပ်ကိုင်ထားတယ်လို့ ဝေဖန်ကြပါတယ်။

ယူဂန္ဓာ စီးပွားရေးကို လာမယ့် ၅ နှစ်အတွင်း ဒေါ်လာ ၅၀၀ ဘီလီယံ စီးပွားရေးဖြစ်အောင် လုပ်မယ်လို့ မူဆာဗေနီက ကြွေးကြော်ထားပါတယ်။ ယူဂန္ဓာရဲ့ GDP ဟာ လက်ရှိမှာ ဒေါ်လာ ၆၆ ဘီလီယံဝန်းကျင် ရှိနေပါတယ်။

ရွေးကောက်ပွဲတွေကို လာမယ့်နှစ် ဇန်နဝါရီလမှာ ကျင်းပမှာဖြစ်ပြီး လွှတ်တော်အမတ်တွေကိုပါ ရွေးကောက်မှာ ဖြစ်ပါတယ်။

Source: Reuters