မန္တလေးတိုင်း၊ ပျော်ဘွယ်မြို့နယ်ထဲက စစ်ကောင်စီတပ်ဖွဲ့ဝင်တွေရဲ့ဂိတ်စခန်းကို ဇွန် ၂၆ ရက်နေ့ မနက် ၈ နာရီဝန်းကျင်မှာ ဝင်ရောက်ပစ်ခတ်ခဲ့လို့ စစ်ကောင်စီ အရာခံဗိုလ် ၁ ယောက် အပါအဝင် ၄ ယောက်သေဆုံးပြီး လက်နက်ခဲယမ်းတွေလည်းသိမ်းဆည်းရရှိခဲ့တယ်လို့ အောင်ဆန်းမြေအဖွဲ့-နတ်မောက် (Aung San's Land Natmauk) က ဇွန် ၂၇ ရက်ညမှာ တိုက်ပွဲရုပ်သံမှတ်တမ်းနဲ့တကွ သတင်းထုတ်ပြန်လာပါတယ်။
Aung San's Land Natmauk ရဲ့ ပြန်ကြားရေးတာဝန်ခံက “ပျော်ဘွယ်မြို့နယ်ထဲက ညောင်ကုန်းရဲစခန်းနားမှာ စစ်သားနဲ့ပျူတွေပေါင်းပြီး ဆက်ကြေးကောက်နေတဲ့ဂိတ်ကို ရုတ်တရက်ဝင်ပစ်ခဲ့တာပါ။ ပစ်ခတ်မှုကြာချိန်က ၅ မိနစ်တောင်မပြည့်ခဲ့ပါဘူး။ အရာခံဗိုလ် ၁ ယောက်နဲ့ စစ်သား ၃ ယောက်သေပါတယ်။ ရဲ ၁ ကောင်နဲ့ ပျူ ၁ ကောင်တို့ကတော့ လက်နက်တွေယူပြီး ထွက်ပြေးသွားကြတယ်။ အရှင်မိတဲ့သူမရှိပါဘူး။ သေတဲ့ကောင်တွေရဲ့ လက်နက်တွေတော့ သိမ်းလာနိုင်ခဲ့တယ်” လို့ ပြောပါတယ်။
ပစ်ခတ်မှုအတွင်းကနေ သေဆုံးသွားကြတဲ့စစ်ကောင်စီတပ်ဖွဲ့ဝင်တွေရဲ့ MA1 သေနတ် ၃ လက် (ပျက်စီး ၁ လက်အပါအဝင်)၊ 5.56 ကျည် ၆၄ တောင့်၊ ဟန်းဖုန်း ၂ လုံးနဲ့ ငွေ ၁၈၀,၅၀၀ တို့ကို သိမ်းဆည်းရရှိခဲ့တယ်လို့ ဆိုပါတယ်။
Aung San's Land Natmauk ရဲ့ မြေပြင်တာဝန်ခံ ဘာမထီ “အခု ကျနော်တို့ဝင်ပစ်တဲ့ဂိတ်က ညောင်ကုန်းရဲစခန်းနဲ့ အရမ်းနီးတယ်။ ကျနော်တို့ဘက်က ခြေလျင်ဝင်ပစ်တာနော်။ သူတို့ဘက်က စစ်ကူလာရင် ၅ မိနစ်လောက်ဆိုရောက်တယ်။ ကျနော်တို့ဘက်ကလည်း ပစ်ပြီးလို့ သိမ်းစရာရှိတာတွေသိမ်းပြီး ပြန်ဆုတ်လာခဲ့ကြတာ။ ကျနော်တို့ပြန်ဆုတ်လာပြီး အချိန် ၁ နာရီလောက်ကြာမှ အဲဒီရဲစခန်းက စစ်ကူတွေရောက်လာပြီး အလောင်းတွေ လာကောက်သွားကြတာဆိုတော့ သူတို့ဘက်ကကောင်တွေ ကြောက်အားကြီးသလို အင်အားနည်းနေပြီဆိုတာကို သက်သေပြတာပဲ။ စစ်တပ်အောက်မှာမှိန်းပြီးတော့ ပြည်သူဆီကနေ မသထာရေစာတွေ စားနေတဲ့သူတွေအနေနဲ့လည်း သူတို့လိုမသေချင်ဘူးဆိုရင် အမြန်ဆုံးအလင်းဝင်ကြပါ။ အဲလိုမဟုတ်လို့ ကျနော်တို့ဘက်ကပစ်ရင်တော့ ခေါင်းတွေချည်းပဲ တည်ပစ်မှာလို့ ပြောချင်တယ်” လို့ က DVB ကို ပြောပါတယ်။
Local တပ်ဖွဲ့တခုဖြစ်တဲ့ Aung San's Land Natmauk အဖွဲ့ဟာ တိုက်ပွဲကြီးတွေဖော်ဆောင်ဖို့ ခဲယမ်းလိုအပ်ချက်တွေရှိနေတယ်လို့လည်း သူက ဆက်ပြောပါတယ်။
ပြီးခဲ့တဲ့ ဇွန် ၈ ရက်နေ့ကလည်း နမ့်စန်လေတပ်အတွက် လေယာဉ်ဆီသယ်ဆောင်လာတဲ့ ဆီဘောက်ဆာကား ၁ စီးနဲ့အတူ စစ်ကောင်စီတပ်ဖွဲ့ဝင် ၂ ယောက်ကို ရန်ကုန်-မန္တလေး အမြန်လမ်း မိုင်တိုင် ၂၆၂ အနီးမှာ Aung San's Land Natmauk အဖွဲ့က ဖမ်းဆီးရမိခဲ့ပါသေးတယ်။
