ထိုင်ဝမ်အခြေစိုက် ဝန်ဟိုင်းသင်္ဘောလိုင်းက ကွန်တိန်နာတင် သင်္ဘောတစင်းဟာ အိန္ဒိယ အနောက်တောင် ကမ်းရိုးတန်းမှာ တနင်္လာနေ့က မီးလောင်မှုဖြစ်ပွားပြီး ပျောက်ဆုံးသွားတဲ့ မြန်မာ အပါအဝင် သင်္ဘာသား ၄ ယောက်ကို ဆက်လက်  ရှာဖွေနေပါတယ်။ 

ဇွန် ၉ ရက် နေ့လယ်က MV Wan Hai 503   အမည်ရှိ သင်္ဘောပေါ် မီးလောင်မှုဖြစ်ပြီး  ကယ်ဆယ်ထားခဲ့တဲ့ သင်္ဘောသား ၁၈ ယောက်ကို အိန္ဒိယရေတပ်က လိုက်ပါစောင့်ရှောက်ပြီး မန်ဂါလူရူဆိပ်ကမ်းမြို့ ရှိ ဆေးရုံကို ပို့ပေးခဲ့တာလို့  အိန္ဒိယသတင်းမှာဖော်ပြပါတယ်။

ထိုင်ဝမ် ၂ ယောက်၊ အင်ဒိုနီးရှားနိုင်ငံသား တယောက်နဲ့ မြန်မာနိုင်ငံသား သင်္ဘောသားတယောက် စုစုပေါင်း ၄ ယောက် ပျောက်ဆုံးနေဆဲပဲလို့ အိန္ဒိယမှာရှိတဲ့ တိုင်ပေ စီးပွားရေးနဲ့ ယဉ်ကျေးမှုစင်တာအရ သိရပါတယ်၊

ကယ်တင်နိုင်ခဲ့တဲ့  သင်္ဘောသား ၁၈ ယောက်ထဲမှာ   ၅ ယောက်က ထိခိုက်ဒဏ်ရာရသွားကြောင်း ဒီအထဲမှာ တရုတ်နိုင်ငံသား ၂ ယောက် မီးလောင်ဒဏ်ရာရပြီး မြန်မာနိုင်ငံသား တယောက်ကတော့မျက်နှာမှာ မီးလောင်ကျွမ်းခဲ့ကာ တခြား မြန်မာတယောက်ကလည်း မီးလောင်ဒဏ်ရာ ဖြစ်သွားပါတယ်။ အင်ဒိုနီးရှား  သင်္ဘောသား တယောက်ကတော့ စိုးရိမ်စရာ မီးလောင် ဒဏ်ရာတွေပိုရသွားပေမဲ့ သတိရှိနေဆဲလို့ဆိုပါတယ်။

MV Wan- Hai 503   ဝန်ဟိုင်း ၅၀၃ သင်္ဘောဟာ စနေနေ့ညနေက  သီရိလင်္ကာနိုင်ငံ ကိုလံဘိုဆိပ်ကမ်းကနေ ထွက်ခွာလာတာဖြစ်ပြီး ကြာသပတေးနေ့မှာ မွန်ဘိုင်းကိုရောက်ဖို့ စီစဉ်ထားတာဖြစ်ပါတယ်။

အခြေအနေကို အကဲခတ်ဖို့နဲ့ အရေးပေါ်ကူညီကယ်ဆယ်ရေး ထောက်ပံပစ္စည်းတွေ  အိန္ဒိယ အစိုးရက လေယာဉ်နဲ့ ချပေးခဲ့သလို အိန္ဒိယ ရေတပ်ကလည်း ကူညီပေးဖို့ အချင်းဖြစ်ပွားရာနေရာကို ရောက်ရှိနေပါတယ်။Photo: India Shipping News