တိုင်က်ပွဲတွေရှိနေတဲ့ ဧရာဝတီတိုင်း၊ လေးမျက်နှာမြို့နယ်၊ ကျောက်စရစ်ကုန်းကျေးရွာက ဆန်စက်ပိုင်ရှင်နဲ့ စားသောက်ကုန်ရောင်းဝယ်ရေးလုပ်ငန်းရှင်တွေ အပါအဝင် အရပ်သား ၉ ယောက်ကို အာရက္ခတပ်တော် AA နဲ့ဆက်နွှယ်တယ်ဆိုတဲ့ စွပ်စွဲချက်နဲ့ စစ်ကောင်စီတပ်က ဖမ်းဆီးထားတယ်လို့ ဒေသခံတွေဆီက သိရပါတယ်။

စစ်ကောင်စီတပ်က မေ ၁၂ ရက်ကနေ ၂၄ ရက်အတွင်း ဖမ်းဆီးခဲ့တာဖြစ်ပြီး ဘယ်မှာဖမ်းထားတယ်ဆိုတာကို အခု မေ ၂၅ ရက်အထိ မသိရသေးဘဲ အဆက်အသွယ်လည်း မရဘူးလို့ ဆိုပါတယ်။

လေးမျက်မြို့နယ် က လုပ်ငန်းရှင် တယောက်က “အဖမ်းခံရတာ ၉ ယောက်။ ဆန်စက်ပိုင်ရှင် ၂ ယောက်၊ စားသောက်ကုန် ရောင်းဝယ်ရေး လုပ်ငန်းရှင် ၃ ယောက်နဲ့ကျန်တဲ့သူတွေက ကားသမားတွေလို့သိရတယ်။ အားလုံး ကျောက်စရစ်ကုန်း ကျေးရွာကပါ” လို့ ပြောပါတယ်။

ကျောက်စရစ်ကုန်းကျေးရွာဟာ ပုသိမ်-မုံရွာ ကားလမ်းအရှေ့ခြမ်းက ကျေးရွာတရွာဖြစ်ပြီး စစ်ကောင်စီတပ်ရဲ့ လေကြောင်းတိုက်ခိုက်တာကို ခံထားရတဲ့ ပန်းတောကြီးကျေးရွာနဲ့ လယ်တန်ငယ်ရွာ အကြားမှာရှိပါတယ်။

လေးမျက်နှာမြို့နယ်က စစ်ကောင်စီတပ်နဲ့ နီးစပ်သူတယောက်က “အဖမ်းခံရတဲ့အထဲ အမျိုးသမီး ၂ ယောက်ပါတယ်လို့သိရတယ်။ အခုရက်ထဲ ဖမ်းတာတွေပိုလုပ်လာတယ်။ တပ်က အုပ်ချုပ်ရေးအဖွဲ့ရဲ့ သတင်းပေးချက်နဲ့ဖမ်းတာလို့သိရတယ်။ ဖမ်းခံရသူတွေထဲ တချို့က စစ်ရှောင်တွေလို့သိရတယ်” လို့ ပြောပါတယ်။

လေးမျက်နှာမြို့နယ်ထဲက ပန်းတောကြီး၊ ကျောက်စရစ်ကုန်း၊ လယ်တန်ငယ်၊ ဘဲ့ပြားကုန်း စတဲ့ကျေးရွာတွေဟာ ဧပြီလကတည်းက စတင်တိုက်ပွဲဖြစ်ခဲ့တဲ့ ဒေသတွေဖြစ်တယ်လို့ ဒေသခံတွေဆီက သိရပါတယ်။