ရခိုင်ပြည်နယ်၊ ကျောက်ဖြူမြို့နယ်၊ မင်းတက်တောင်ရှိ စစ်ကောင်စီရဲ့ ကာကင်းစခန်းကို အာရက္ခတပ်တော် (AA) က မေ ၂၀ ရက် ဒီနေ့မနက် သိမ်းပိုက်ရရှိခဲ့ပြီလို့ စစ်ရေးသတင်းရင်းမြစ်က ပြောပါတယ်။
မင်းတက်တောင်စခန်းကို ဒီမနက် ၅ နာရီခွဲမှာ AA တပ်ဖွဲ့တွေက စတင်ထိုးစစ်ဆင် တိုက်ခိုက်ခဲ့တာဖြစ်ပြီး မနက် ၇ နာရီလောက်မှာ အပြီးသတ် သိမ်းပိုက်ရရှိခဲ့တယ်လို့ ဆိုပါတယ်။
ရခိုင်စစ်ရေးသတင်းရင်းမြစ်တယောက်က “ဒီကနေ့ ကျနော်တို့ ကျောက်ဖြူဘက်ခြမ်းမှာ အဓိကတောင်ကုန်းဖြစ်တဲ့ မင်းတက်တောင် ကာကင်းစခန်းကို သိမ်းပိုက်ရရှိပါပြီ၊ မနက် ၅ ခွဲကနေ ထိုးစစ်ဆင်တာ ၇ နာရီလောက်မှာ အပြီးသတ် ရလိုက်ပါတယ်” လို့ ပြောပါတယ်။
အဲဒီ မင်းတက်တောင် ကာကင်းစခန်းတိုက်ပွဲနဲ့ ပတ်သက်ပြီး AA ဘက်ကတော့ သတင်းထုတ်ပြန်ထားတာ မရှိသေးပါဘူး။
ကျောက်ဖြူမြို့နယ်မှာ ဧပြီ နောက်ဆုံးအပတ်နဲ့ မေ ပထမအပတ်အတွင်း အမှတ် ၃၂ ရဲတပ်ရင်းအနီးနဲ့ ဓညဝတီရေတပ်စခန်းအနီးတွေမှာ စစ်ကောင်စီတပ်နဲ့ အာရက္ခတပ်တော် (AA) တို့ကြား တိုက်ပွဲတွေ ပြင်းထန်စွာ ဖြစ်ပွားခဲ့ပါတယ်။
ကေခိုင်
