ဧရာဝတီတိုင်း၊ ကြံခင်းမြို့နယ်ထဲက အုပ်ချုပ်ရေးမှူးတချို့ဟာ ပြည်သူ့စစ်မှုထမ်း မထမ်းဆောင်လိုသူ လူငယ်တွေထံကနေ ငွေကျပ် ၅၀,၀၀၀ မ​ဖြစ်မနေပေးဖို့ တောင်းယူတဲ့အပြင် ငွေကြေးမပေးနိုင်သူတချို့ကို ရိုက်နှက်တာတွေပါ လုပ်ဆောင်လာနေတယ်လို့ ဒေသခံတွေဆီကနေ သိရပါတယ်။

စစ်မှုထမ်းထဲဝင်ဖို့ အကြောင်းအမျိုးမျိုးပြ စည်းရုံးနေပြီး သိမ်းသွင်းနေကာ သူ စည်းရုံးလို့မရတဲ့ သူတွေကို ရိုက်နှက်တာလို့ ဆိုပါတယ်။

ကလို့ကွင်း​ ဒေသခံတယောက်က “စစ်မှုမထမ်းချင်ရင် ပါးကို ဘယ်ပြန်ညာပြန် စိတ်ကျေနပ်တဲ့အထိ ရိုက်တယ်။ ပြီးတော့ ငွေ ၅၀,၀၀၀ အနည်းဆုံးထား ပေးရတယ်။ သူ့ရှေ့ ပါးရိုက်ခံဖို့လာရင် ဒူးထောက် လက်နောက်ပစ်ပြီး သွားရတယ်။ မကျေနပ်ပေမဲ့ စိတ်ထဲမှာ အောင့်ခံနေကြရတယ်ဗျာ” လို့ ပြောပါတယ်။

ကလို့ကွင်းအုပ်စု အုပ်ချုပ်ရေးမှူး ကြည်စိုးသန်းဟာ အုပ်စုတွင်း ကျေးရွာတွေမှာ အမျိုးသားတွေ မရှိတဲ့ နေအိမ်​တွေကို ၅၀,၀၀၀ ကျပ်နဲ့ အမျိုးသားတွေရှိတဲ့ နေအိမ်တွေမှာ ၂၅ သိန်းကျပ်အထိ တောင်းယူနေတယ်လို့ ဒေသခံတွေက ပြောပါတယ်။

ကြံခင်းမြို့နယ်၊ ကွင်းကြီးအုပ်စု စစ်ကောင်စီခန့် ကျေးရွာအုပ်ချုပ်ရေးမှူး ငကျော် (ခ) ဦးကျော်ကျော် ဟာလည်း ဒေသခံလူငယ်​တွေကို ခဏလိုက်ခဲ့လို့ ခြိမ်းခြောက်ခေါ်ယူပြီး စစ်မှုထမ်းဆောင်ဖို့ စစ်သင်တန်းကို ပို့ဆောင်ခဲ့ကြောင်း ကွင်းကြီးဒေသခံတယောက်က ပြောပါတယ်။

ဧရာဝတီတိုင်း၊ ငပုတောမြို့နယ်၊ ကျုံကူးတိုက်နယ်၊ ရေတွင်းကုန်းကျေးရွာ အုပ်ချုပ်ရေးမှူးဟာ ပြည်သူ့စစ်မှုထမ်း စုဆောင်းရာမှာ ခြိမ်းခြောက်ပြောဆိုမှုတွေကြောင့် မေ ၆ ရက်က ဓားခုတ်ခံရပြီး သေဆုံးခဲ့ပါတယ်။

၂၀၂၅ ခုနှစ် ဧပြီလထဲမှာ ဧရာ၀တီတိုင်း၊ ကျုံပျော်မြို့နယ်၊ ညောင်ပင်ကွင်းကျေးရွာ အုပ်ချုပ်ရေးမှူး ဦးလှကြိုင် သေနတ်နဲ့ပစ်ခတ်ခံရလို့ သေဆုံးခဲ့ပြီး ဟင်္သာတမြို့နယ်၊ သံနွံသနော့ ကျေးရွာအုပ်ချုပ်ရေးမှူး ဦးမောင်ဖြူလည်း ဓားခုတ်ခံရပြီး သေဆုံးခဲ့ကြောင်း ဒေသခံတွေဆီကနေ သိရပါတယ်။