ပဲခူးတိုင်း၊ ညောင်လေးပင်မြို့နယ်မှာ မေ ၉ ရက် မနက်က ပြင်းအား ရစ်ချ်တာစကေး ၄ ဒသမ ၂ အဆင့်ရှိ အင်အားအသင့်အတင့်ရှိ မြေငလျင်လှုပ်သွားတယ်လို့ NUG အစိုးရ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ ဝန်ကြီးဌာနက ထုတ်ပြန်ပါတယ်။
ဒီမနက် မြန်မာစံတော်ချိန် မနက် ၇ နာရီ ၁၈ မိနစ်လောက်မှာ ညောင်လေးပင်မြို့မြောက်ဘက် ၂၂ ကီလိုမီတာအကွာ၊ မြေအောက်အနက် ၁၀ ကီလိုမီတာကို ဗဟိုပြုပြီး လှုပ်ခတ်ခဲ့တာလို့ ဆိုပါတယ်။
စစ်ကောင်စီလက်အောက်ခံ မိုးဇလဌာနကတော့ ဒီနက် ၇ နာရီ ၁၈ မိနစ်ကျော်က လှုပ်ခဲ့တဲ့ ငလျင်ဟာ အင်အားပမာဏ ရစ်ချ်တာစကေး ၃ ဒသမ ၂၊ အနက် - ၁၅ ကီလိုမီတာရှိပြီး ဗဟိုချက်တည်နေရာက ကျောက်တံခါးမြို့ရဲ့ အရှေ့မြောက်ဘက် ၁၂ မိုင်ခန့်အကွာဖြစ်တယ်လို့ ထုတ်ပြန်ပါတယ်။
မတ်လ ၈ ရက် နေ့လယ် ၂ နာရီ ၈ မိနစ်ကျော်လောက်ကလည်း အင်အားပမာဏ ရစ်ချ်တာစကေး ၃ ဒသမ ၁ ၊ အနက် ၁၅ ကီလိုမီတာရှိ မြေငလျင်တခု ပုသိမ်ကြီးမြို့ရဲ့ အနောက်တောင်ဘက် ၄ မိုင်ခန့် အကွာကို ဗဟိုပြုလှုပ်ခတ်သွားတယ်လို့ ဆိုပါတယ်။
NUG အစိုးရကတော့ ဒီငလျင်ဟာ မန္တလေးတိုင်း၊ ကျောက်ဆည်မြို့အရှေ့တောင်ဘက် ၉ ကီလိုမီတာအကွာ၊ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ခ်တာစကေး ၄ ဒသမ ၁ အဆင့်ရှိတယ်လို့ ထုတ်ပြန်ထားပါတယ်။
မေလ ၇ ရက် နေ့လယ် ၂ နာရီ ၅ မိနစ်ကလည်း ပဲခူးတိုင်း၊ ဖြူးအရှေ့မြောက်ဘက် ၂၂ ကီလိုမီတာအကွာ၊ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ချ်တာစကေး ၄ ဒသမ ၀ ရှိငလျင်နဲ့ နေ့လယ် ၁ နာရီ ၅၈ မိနစ်မှာ ပဲခူးတိုင်း၊ အုတ်တွင်းမြို့နယ်၊ ကျွဲပွဲရွာအနီး၊ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ချ်တာစကေး ၃ ဒသမ ၉ အဆင့်ရှိ မြေငလျင်တခု ထပ်မံလှုပ်ခတ်ခဲ့တယ်လို့ ဆိုပါတယ်။
စစ်ကိုင်းငလျင်ကြီးရဲ့ နောက်ဆက်တွဲငလျင်ငယ်တွေ ဆက်လက်လှုပ်ခတ်နိုင်လို့ ငလျင်ဘေးဆောင်ရန်၊ ရှောင်ရန်၊ သတိပြုရန်အချက်တွေနဲ့အညီ နေထိုင်ကြဖို့ NUG အစိုးရက ပြည်သူတွေကို ထပ်မံအသိပေးထားပါတယ်။
