ပြီးခဲ့တဲ့ မတ် ၂၈ ရက်က လှုပ်ခတ်ခဲ့တဲ့ ငလျင်ကြောင့် မန္တလေးတိုင်းအတွင်း ပြိုကျပျက်စီး အဆောက်အအုံတွေကို ယန္တရားတွေနဲ့ ဖယ်ရှားရှင်းလင်းနေရာမှာ သေဆုံးရုပ်အလောင်းအချို့ ထပ်မံတွေ့ရှိခဲ့တယ်လို့ မြန်မာနိုင်ငံမီးသတ်ဦးစီးဌာနက ထုတ်ပြန်ပါတယ်။

မန္တလေး၊ ချမ်းအေးသာစံမြို့နယ်၊ ၂၈B× ၇၂ လမ်းထောင့်ရှိ  မာကျူရီတည်းခိုခန်းအဆောက်အအုံကို ရှင်းလင်းရေးလုပ်ငန်းဆောင်ရွက်ရာမှာ ဧပြီ ၂၆ ရက် ဒီနေ့မနက် ၁၁ နာရီလောက်က အမျိုးသမီးတယောက်ရဲ့ ရုပ်အလောင်းအား ထုတ်ယူနိုင်ခဲ့တယ်လို့ ဆိုပါတယ်။

အလားတူ မန္တလေးမြို့၊ လမ်း (၃၀) ၇၀×၇၁လမ်းကြားရှိ Golden City Hotel အဆောက်အအုံကနေ ဒီနေ့မနက် ၁၀ နာရီမှာ အမျိုးသား ၂ ယောက်ရဲ့ ရုပ်အလောင်းတွေကို ထုတ်ယူပေးခဲ့ပါတယ်။

ဧပြီ ၂၅ ရက် မွန်းတည့် ၁၁ ခွဲလောက်ကလည်း အဆိုပါအဆောက်အအုံကနေ အမျိုးသမီးတယောက်နဲ့ အမျိုးသားတယောက်ရဲ့ အလောင်းတွေကို ထုတ်ယူနိုင်ခဲ့တယ်လို့ မီးသတ်တပ်ဖွဲ့က ထုတ်ပြန်ထားပါတယ်။

Photo : မြန်မာနိုင်ငံမီးသတ်တပ်ဖွဲ့