မကွေးတိုင်း၊ စလင်းမြို့နယ်မှာ စစ်ကောင်စီတပ်ရဲ့ ပေါ်တာဆွဲ ဖမ်းဆီးခံရပြီး စစ်မှုထမ်းနေရတဲ့ တပ်သားသစ် ၃ ယောက်ဟာ ဧပြီ ၂၀ ရက်က အလင်းဝင်ရောက်လာခဲ့ကြတယ်လို့ ဒေါင်းစစ်အောင် (LPDF) ဆီကနေ သိရပါတယ်။
ဒေါင်းစစ်အောင် (LPDF) ရဲ့ ပြန်ကြားရေးတာဝန်ခံက “စလင်းအခြေစိုက် ခလရ ၂၅၃၊ ၂၅၄၊ ၂၅၅ တပ်ရင်းတွေက တပ်သားသစ် ၃ ယောက် အလင်းဝင်လာခဲ့တာပါ။ အခြေအနေ အကြောင်းကြောင်းကြောင့် လက်နက်တွေတော့ ယူဆောင်မလာနိုင်ခဲ့ကြပါဘူး” လို့ ပြောပါတယ်။
အဆိုပါ အလင်းဝင်ရောက်လာကြသူတွေဟာ နေပြည်တော်နဲ့ စစ်ကိုင်းတိုင်းတွေထဲကနေ စစ်ကောင်စီတပ်တွေရဲ့ အဓမ္မ ပေါ်တာဆွဲ ဖမ်းဆီးခံခဲ့ကြရတာလို့ ဆိုပါတယ်။
“သူတို့တွေရဲ့နောက်မှာ ကျန်ခဲ့ကြတဲ့ မိသားစုဝင်တွေရဲ့ လုံခြုံရေးအခြေအနေကြောင့်မို့လို့ နာမည်တွေ၊ နေရပ်တွေကို သတင်းထုတ်ပြန်တဲ့အခါမှာ လျှို့ဝှက်ပေးထားရတာ” လို့ ဒေါင်းစစ်အောင် (LPDF) တာဝန်ခံ ကိုထူးလေး က DVB ကို ပြောပါတယ်။
အလင်းဝင်ရောက်လာကြသူတွေကို နေထိုင်စားသောက်ရေးတွေအတွက် အဆင်ပြေအောင် စီစဥ်ပေးထားပြီး နောက်ထပ် အလင်းဝင်ရောက်လာမယ့် စစ်ကောင်စီ လက်အောက်ခံတွေကိုလည်း အမြန်ဆုံးအလင်းဝင်ကြဖို့ ဖိတ်ခေါ်ထားတယ်လို့ သူက ဆက်ပြောပါတယ်။
ပြီးခဲ့တဲ့ ဇန်နဝါရီ ၂၆ ရက်ကလည်း စလင်းမြို့နယ်အခြေစိုက် ခလရ ၂၅၃ တပ်ရင်းက အသက် ၂၀ ကျော်အရွယ် စစ်ကောင်စီတပ်ဖွဲ့ဝင် ၂ ဦးဟာ ဒေါင်းစစ်အောင် (LPDF) အဖွဲ့ဆီကို အလင်းဝင်ရောက်ခဲ့ကြပါသေးတယ်။
