တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်မှာ ဧပြီ ၁၉ ရက် မနက် ၁၀ နာရီလောက်က စစ်ကောင်စီတပ်တွေကို ရိက္ခာလာပို့တဲ့ ကား ၃ စီး လမ်းမှာ မိုင်းဆွဲတိုက်ခိုက်ခံရတယ်လို့ ဒေသခံပြည်သူတွေဆီက သိရပါတယ်။
မြိတ်ကနေလာတဲ့ ရိက္ခာကား ၃ စီးကို တနင်္သာရီမြို့နယ်၊ ဘန်းလမွတ်ကျေးရွာအနီးမှာ တနင်္သာရီမြို့နယ် ပကဖ ဇုန် ၅ တောဗုံးကြီးအဖွဲ့က မိုင်းဆွဲတိုက်ခိုက်ခဲ့ရာ ကုန်ကားတစီး မိုင်းထိမှန်သွားတယ်လို့ ဆိုပါတယ်။
ဒေသခံပြည်သူတယောက်က “ဘယ်တပ်က ထွက်လာတယ်ဆိုတာ မသိရဘူး။ ရိက္ခာတွေအပြည့်ပဲ၊ မိုင်းဆွဲခံရတာ၊ နောက်ဆုံးကားမှာ မိုင်း ၂ လုံး ခွဲခံရတယ်လို့ သိရတယ်။ ဖြတ်သွားဖြတ်လာသမားတွေ ပြောတာတော့ အဲဒီကားနားမှာ စစ်သားတွေ အများကြီးပဲတဲ့၊ မနေ့ကတော့ တခြားကားတွေနဲ့ သယ်ယူနေရတယ်” လို့ ပြောပါတယ်။
တနင်္သာရီမြို့နယ်ထဲက တပ်ရင်းတပ်ဖွဲ့တွေနဲ့ ထိတွေ့တိုက်ပွဲရက်ရှည်ဖြစ်နေတဲ့ ထုံခါ-မောတောင် ကားလမ်းက သိန်ခွန်းဘက်ကို စစ်ကောင်စီက ရိက္ခာလာပို့တာဖြစ်ပြီး အဆိုပါနေ့က မော်တုန်းရွာအခြေစိုက် ၃၀၆ အမြောက်တပ်ထဲကို ရိက္ခာကားတွေ ဝင်သွားကြောင်း တော်လှန်ရေးတပ်ဖွဲ့နဲ့ နီးစပ်သူတယောက် ပြောပါတယ်။
မိုင်းဆွဲခံရတဲ့နေ့က ဇဝဲကျေးရွာဘက်ကနေ အင်အား ၁၀၀ နီးပါးရှိတဲ့ စစ်ကောင်စီစစ်ကြောင်းတခု တက်လာပြီးနောက် ဇဝဲနဲ့ ၃ မိုင်ခန့် အကွာအဝေးမှာရှိတဲ့ နေ့လယ် ၂ နာရီအချိန်လောက်က ရမ်းဖိုကျေးရွာထဲကို ဝင်ရောက်နေထိုင်ခဲ့ကြောင်း ဒေသခံတွေရဲ့ ပြောပြချက်အရ သိရပါတယ်။
ဧပြီ ၁၆ ရက်နေ့ မနက် ၈ နာရီအချိန်ခန့်ကလည်း ကမ္မလိုင်းရွာအခြေစိုက် ခမရ ၅၅၈ တပ်ရင်းက စစ်ကောင်စီဂိတ်တခုအား ပြည်သူ့ကာကွယ်ရေးတပ်က သွားရောက်တိုက်ခိုက်ခဲ့ပြီး စစ်ကောင်စီဘက်က တဦး ကျဆုံးသွားတယ်လို့ တနင်္သာရီမြို့နယ် ပြည်သူ့ကာကွယ်ရေးအဖွဲ့ (ပကဖ) က ထုတ်ပြန်ထားပါတယ်။
