ဒီတပတ်မှာ အာတာလွတ်ဥပင် ဆေးဖက်ဝင် အကြောင်းကို လက်လှမ်းမီ ဆေးပညာမှ ရေးသားမျှဝေသွားမှာ ဖြစ်ပါတယ်။
အာတာလွတ်ဥပင်ကို သိပ္ပံလို Maranta arundinacea လို့ခေါ်ပြီး အင်္ဂလိပ်လို Arrowroot လို့ ခေါ်ပါတယ်။
အာတာလွတ်ဥမှာ စွမ်းအင်၊ ပရိုတင်း၊ ကာဗိုဟိုက်ဒရိတ်၊ ဖိုက်ဘာ၊ ကယ်လ်စီယမ်၊ သံမဂ္ဂနီစီယမ်၊ ဖော့စဖရပ်၊ ပိုတက်ဆီယမ်၊ ဆိုဒီယမ်၊ ဇင့်၊ ကော့ပါး၊ မဂ္ဂနိစ်၊ ဆီလီနီယမ်၊ ဗီတာမင် C၊ ဖောလိတ် (ဗီတာမင် B9) စတဲ့ အာဟာရသတ္တုဓာတ်များ ပါဝင်ပြီး အဆိပ်အတောက်တွေနဲ့ ရောဂါပိုးတွေကို တားဆီးပေးခြင်း၊ ဝမ်းကိုက်ခြင်းကို သက်သာစေခြင်း၊ ဗိုက်နာခြင်းကို တားဆီးပေးခြင်း၊ လိင်စိတ်အားကို နှိုးဆွပေးခြင်း၊ အဖျားပျောက်ဆေးသည် အဖျားကို သက်သာစေခြင်း၊ သွေးတွင်းကိုလက်စထရော ပမာဏကို လျော့နည်းစေခြင်း စတဲ့ အစွမ်းအာနိသင်များ ရှိပါတယ်။
ဆေးဖက်ဆိုင်ရာမှာ အာတာလွတ်ဥပင်ရဲ့ ဥနဲ့ ပင်စည်တို့ကို သုံးစွဲကြပါတယ်။
အာတာလွတ်ဥအမှုန့်ရဲ့ သဘာဝအအေးဓာတ်ဟာ ယားယံခြင်းနဲ့ ရောင်ရမ်းခြင်းကို သက်သာစေတဲ့ အပြင် အရေပြားအတွင်းရှိ အဆီပိုများကို စုပ်ယူနိုင်စွမ်းရှိပြီး ပိတ်ဆို့နေတဲ့ ချွေးပေါက်များကို ဖယ်ရှားပေးကာ အသားအရေကို ပြန်လည်နုပျိုစေပါတယ်။ အာတာလွတ်ဥအမှုန့်ကို သနပ်ခါးနဲ့ လိမ်းကျံပေးနိုင်ပါတယ်။ ခံနိုင်ရည်ရှိတဲ့ ကစီဓာတ်၊ ပရိုတင်းဓာတ်နဲ့ မပျော်ဝင်နိုင်တဲ့ အမျှင်ဓာတ်များစွာ ပါ၀င်ပြီး ပြည့်ဝတဲ့ခံစားချက်ကို ကူညီပေးတာကြောင့် အာတာလွတ်ဥ အသင့်အတင့် စားသောက်ခြင်းက အစာကြေချိန်ကို နှေးကွေးစေပြီး ဆာလောင်မှုဝေဒနာများကို လျှော့ချကာ ကယ်လိုရီစားသုံးမှုကို လျှော့ချပေးကာ ကိုယ်အလေးချိန်ကျဖို့ ကူညီပေးပါတယ်။
အာတာလွတ်ဥမှာ ဗီတာမင် B-riboflavin၊ niacin နဲ့ folate တို့ ပါ၀င်ပြီး Niacin က ကောင်းတဲ့ ကိုလက်စထရော (HDL) အဆင့်ကို မြှင့်တင်ပေးပြီး နှလုံးရောဂါဖြစ်နိုင်ခြေကို လျှော့ချပေးပါတယ်။
အာတာလွတ်ဥမှာ ဖောလိတ်ပမာဏ များစွာပါဝင်တာကြောင့် အာတာလွတ်ဥ အသင့်အတင့် ပုံမှန် စားသောက်ပေးခြင်းဖြင့် သွေးနီဥဖွဲ့စည်းခြင်းကို ကူညီပေးပြီး သွေးအားနည်းခြင်းကို ကာကွယ်ပေးပါတယ်။
ကိုယ်ဝန်ဆောင်မိခင်များ အာတာလွတ်ဥ အသင့်အတင့် စားသောက်ပေးခြင်းက သန္ဓေသား ပုံမှန်ကြီးထွားမှုနဲ့ ဖွံ့ဖြိုးမှုအတွက် အထောက်အကူပြုပြီး မွေးကင်းစကလေးငယ်များမှာ အာရုံကြောပြွန် ချို့ယွင်းချက်များကို ကာကွယ်ပေးပါတယ်။
အာတာလွတ်ဥမှာ မဂ္ဂနီဆီယမ် ပါဝင်မှု မြင့်မားစွာပါရှိတာကြောင့် ပုံမှန် အစားအသောက်များမှာ ထည့်စားပေးခြင်းဖြင့် နှစ်နှစ်ခြိုက်ခြိုက် အိပ်ပျော်စေပါတယ်။
အာတာလွတ်ဥမှာ ကိုယ်အတွင်းအရည်များ မျှတမှုကို ထိန်းသိမ်းရာမှာ မရှိမဖြစ်လိုအပ်တဲ့ သတ္တုဓာတ်တမျိုးဖြစ်တဲ့ ပိုတက်စီယမ် ကြွယ်ဝတာကြောင့် သွေးကြောများကို ကျယ်စေကာ သွေးပေါင်ချိန်ကို ထိန်းညှိပေးပြီး နှလုံးရောဂါ၊ သွေးကြောမာတောင့်ခြင်းနဲ့ လေဖြတ်နိုင်ခြေကို လျှော့ချပေးပါတယ်။ alkaloid၊ phenolic ဓာတ်ပေါင်းများ၊ flavone နဲ့ saponin စတဲ့ bioactive ဓာတ်ပေါင်းများ ပါဝင်တာကြောင့်လည်း သွေးတွင်းအဆီပမာဏကို လျှော့ချရာမှာ အထောက်အကူ ပြုပြီး နှလုံးကျန်းမာရေးကို မြှင့်တင်ပေးပါတယ်။
အာတာလွတ်ဥမှာ ဗီတာမင် B complex၊ သံဓာတ်နဲ့ ကြေးနီတို့ အပါအဝင် အာဟာရဓာတ် ကြွယ်ဝစွာ ပါ၀င်တာကြောင့် သွေးနီဥဆဲလ်များ ဖွဲ့စည်းခြင်းနဲ့ အရေးကြီးတဲ့ အင်္ဂါများဆီသို့ သွေးစီးဆင်းမှုကို ထိန်းသိမ်းပေးလို့ အရေးကြီးတဲ့ ကိုယ်တွင်းအင်္ဂါများနဲ့ ကြွက်သားများကို သွေးစီးဆင်းမှု ကောင်းစေတာကြောင့် ပင်ပန်းနွမ်းနယ်ခြင်း၊ အားနည်းခြင်းနဲ့ သွေးအားနည်းခြင်းတို့ကို ကာကွယ်ပေးတဲ့အပြင် အာရုံကြောစနစ် သွေးလည်ပတ်မှု ကောင်းစေကာ မှတ်ဉာဏ်နဲ့ ဦးနှောက်စွမ်းအားကို မြှင့်တင်ပေးပါတယ်။ အာတာလွတ်ဥ စားသောက်ခြင်းက ကိုယ်ခံအားကို မြှင့်တင်ပေးပါတယ်။
အာတာလွတ်ဥမှာ ပါရှိတဲ့ ပိုတက်စီယမ်က ကျောက်ကပ်မှ အညစ်အကြေးများနဲ့ အဆိပ်အတောက်များကို ရှင်းလင်းရာမှာ ကူညီပေးပြီး ကျောက်ကပ်လုပ်ဆောင်မှုကို ကူညီပေးတဲ့အပြင် အာတာလွတ်ဥ အမှုန့်ရဲ့ ရောင်ရမ်းမှုကို ဆန့်ကျင်တဲ့ ဂုဏ်သတ္တိများက ဆီးအိမ်နဲ့ ဆီးလမ်းကြောင်း ပိုးဝင်ခြင်းကို ကုသရာမှာ ကူညီပေးပါတယ်။
အာတာလွတ်ဥမှာ ဗီတာမင်များ၊ ဓာတ်တိုးဆန့်ကျင်ပစ္စည်းများနဲ့ ပရိုတင်းဓာတ်များ စတဲ့ အရေပြား အနာကျက်စေတဲ့ အာဟာရဓာတ်များ ကြွယ်ဝစွာ ပါ၀င်တာကြောင့် ဒဏ်ရာများ၊ ဝက်ခြံအမာရွတ်များ၊ နီမြန်းခြင်းတို့မှာ အာတာလွတ်ဥအမှုန့်ကို အုန်းဆီနဲ့ လိမ်းပေးနိုင်ပါတယ်။
ဝမ်းကိုက်ရောဂါမှာ အာတာလွတ်ဥမှုန့် တခါသောက် ကော်ဖီ ၂ ဇွန်းကို ရေနွေးကြမ်းတခွက်နဲ့ တနေ့ ၂-၃ ကြိမ် သောက်ပေးနိုင်ပါတယ်။
အာတာလွတ်ဥမှုန့်မှာ thiamine၊ niacin၊ pyridoxine နဲ့ သံဓာတ်၊ မဂ္ဂနီဆီယမ်နဲ့ ကြေးနီ အပါအဝင် သတ္တုဓာတ်များ ကြွယ်ဝစွာ ပါ၀င်ပြီး ဆီးချိုသမားများနဲ့ နှလုံးရောဂါဝေဒနာရှင်များအတွက် အကောင်းဆုံး သောက်သုံးနိုင်ပါတယ်။ ဓာတ်တိုးဆန့်ကျင်ပစ္စည်း၊ ဗီတာမင် E နဲ့ အိုမီဂါ ဖက်တီးအက်ဆစ်တွေ အများအပြား ပါဝင်တာကြောင့် ဦးနှောက်စွမ်းအားနဲ့ မှတ်ဉာဏ်ကို မြှင့်တင်ပေးပါတယ်။
အာတာလွတ်ဥမှုန့် ကော်ဖီ ၂ ဇွန်းကို ညအိပ်ရာမဝင်မီ နွားနို့တခွက်နဲ့ သောက်သုံးခြင်းက အမျိုးသား လိင်စွမ်းဆောင်ရည်ကို မြှင့်တင်ပေးပြီး သုတ်ပိုးပမာဏကို တိုးတက်စေပါတယ်။
အာတာလွတ်ဥကို စားသုံးခြင်းဖြင့် ခန္ဓာကိုယ်အာဟာရဓာတ်၊ ခွန်အား၊ သွေးတွင်းဓာတ်မျှတမှုကို ထိန်းသိမ်းပေးပါတယ်။
အာတာလွတ်ဥကို အသင့်အတင့် စားသုံးတာက ထူးခြားတဲ့ ဘေးထွက်ဆိုးကျိုး မရှိပေမဲ့ အလွန်အကျွံ စားသုံးခြင်းက ဝမ်းချုပ်ခြင်း၊ ဝမ်းဖောခြင်း၊ ဝမ်းဗိုက်နာခြင်း၊ လေထိုးခြင်း စတဲ့ အစာအိမ်နဲ့ အူလမ်းကြောင်းဆိုင်ရာ ပြဿနာများ ဖြစ်စေနိုင်ပါတယ်။ အာတာလွတ်ဥနဲ့ ဓာတ်မတည့်သူများ အာတာလွတ်ဥပင်ထွက် ပစ္စည်းများကို ရှောင်ကြဉ်သင့်ပါတယ်။
နွေဦးပြည်သူများ အာတာလွတ်ဥပင်ရဲ့ ကျန်းမာရေးဆိုင်ရာ အကျိုးကျေးဇူးများကို သိရှိပြီး လိုအပ်သလို ရယူသုံးစွဲနိုင်ဖို့ ရေးသားဖော်ပြလိုက်ပါတယ်။
