ထိုင်းနိုင်ငံမြောက်ပိုင်း၊ လမ်းဖွန်းခရိုင်၊ မယ့်ထားမြို့နယ်ထဲမှာ ဧပြီ ၁၃ ရက် ညက မိုးသည်းထန်ပြီး တောင်ကျချောင်းရေတွေ ရွာထဲဝင်လာတာကြောင့် လူနေအိမ်တွေ ရေထဲမျောပါပျက်စီးသွားပြီး ရွာသား ၂ ယောက် သေဆုံးသွားတယ်လို့ Thai PBS သတင်းမှာ ဖော်ပြပါတယ်။
မနေ့ညက မိုးသည်းထန်ပြီး သန်းခေါင်ကျော် ဧပြီ ၁၄ ရက် မနက်စောစောမှာတော့ တောင်ကျရေတွေဟာ ဟွေ့လွမ့်နောက်ကျေးရွာ ရပ်ကွက် ၄ ထဲကို ဝင်ရောက်လာတယ်၊ နေအိမ်တွေရော လူတွေပါ ရေထဲမျောပါသွားတယ်၊ ကယ်ဆယ်ရေးအဖွဲ့တွေ ရောက်လာပေမဲ့ ညမှောင်နေတာရော၊ မိုးပါရွာနေတာမို့ ကယ်ဆယ်ရေးလုပ်ငန်းတွေ မနက် ၃ နာရီမှာ ရပ်နားထားရတယ်၊ မနက်မိုးလင်းတော့ နေအိမ် ၈ လုံး ပျက်စီးသွားတယ်၊ တချို့အိမ်တွေဆို လုံးဝ ရေထဲမျောပါသွားတာလို့ ဆိုပါတယ်။
အမျိုးသားတယောက်နဲ့ အမျိုးသမီးတယောက် ပျောက်ဆုံးနေတာမှာ ရှာဖွေရေးအဖွဲ့တွေက မနက် ၇ နာရီခွဲမှာ သေဆုံးနေတဲ့ ရွာသားတယောက်ရဲ့ အလောင်းကို ရှာတွေ့တယ်၊ နောက်ထပ် အမျိုးသမီးတယောက်ရဲ့ အလောင်းကို မနက် ၉ နာရီခွဲလောက်မှာ ရွာနဲ့ ၅၀၀ မီတာအကွာမှာ ရှာဖွေတွေ့ရှိတယ်လို့ ကယ်ဆယ်ရေးအဖွဲ့တွေက ပြောပါတယ်။
အလားတူ ချင်းမိုင်ခရိုင်၊ မဲ့လိမ်းမြို့နယ်ထဲမှာလည်း မနေ့ညက မိုးသည်းထန်ကာ တောင်ကျချောင်းရေတွေ စီးဆင်းလာတာကြောင့် မဲ့ပင်းမြစ်ထဲ ဖွင့်လှစ်ထားတဲ့ မုန့်ဆိုင်းဘိချ်ဇုန်ထဲက ရေပေါ်စားသောက်ဆိုင်ခန်း ၂၀ ကျော် ပျက်စီးပြီး စားပွဲခုံ ထိုင်ခုံတွေပါ ရေထဲမျောပါသွားတယ်လို့ ချင်းမိုင်နယူးစ်သတင်းမှာ ဖော်ပြပါတယ်။
ထိုင်းမြောက်ပိုင်းနဲ့ အလယ်ပိုင်းဒေသတွေမှာ နောက်ထပ် ၂ ရက်ထိ မိုးသည်းထန်စွာ ရွာသွန်းနိုင်ကြောင်း၊ တချို့နေရာ မိုးကြိုးပစ်တာ၊ မိုးသီးကြွေကျတာတွေ ရှိနိုင်မယ်၊ အထူးသဖြင့် ထိုင်းမြောက်ပိုင်း မယ်ဟောင်ဆောင်၊ ချင်းမိုင်၊ လမ်းဖွန်း၊ လမ်းပန်း၊ ဆုခိုထိုင်းနဲ့ တာ့ခ်ခရိုင်တွေ၊ ထိုင်းအလယ်ပိုင်း စမွတ်ဆုန်ခလမ်း၊ စမွတ်စခွန်း၊ နခွန်းပထုံ၊ ဘန်ကောက်နဲ့တကွ အနီးတဝိုက် ဧရိယာတွေမှာ မိုးသည်းထန်ပြီး ရုတ်တရက် ရေကြီးရေလျှံတာတွေ သတိထားဖို့ ထိုင်းမိုးဇလဌာနက ထုတ်ပြန် သတိပေးထားပါတယ်။
Source : Thai PBS News / Chiangmai News
