သင်္ကြန်ကို အကအခုန်တွေနဲ့ မကျင်းပတော့ဘူးလို့ စစ်ကောင်စီက ကြေညာထားပေမဲ့ ဧရာဝတီတိုင်း၊ ပုသိမ်မြို့၊ အမှတ် ၁ ရပ်ကွက်နဲ့ အမှတ် ၃ ရပ်ကွက်က စစ်ကောင်စီခန့် အုပ်ချုပ်ရေးအဖွဲ့တွေက မဟာသင်္ကြန်အတွက်လို့ဆိုပြီး အိမ်တိုင်းစေ့ငွေကောက်နေတယ်လို့ ဒေသခံတွေဆီက သိရပါတယ်။

ဧပြီ ၂၈ ရက်က လှုပ်ခတ်ခဲ့တဲ့ အင်အားပြင်းထန် ငလျင်ကြောင့် သေဆုံးထိခိုက်တာတွေ ဖြစ်ပေါ်နေလို့ သင်္ကြန်ကို အဆို၊ အကအခုန်တွေနဲ့မကျင်းပတော့ဘူးလို့ ကြေညာထားပေမဲ့ စစ်ကောင်စီခန့် အုပ်ချုပ်ရေးမှူးနဲ့အဖွဲ့က အိမ်ခြေ ၇၀၀ ကျော်ရှိတဲ့ အမှတ် ၁ ရပ်ကွက်မှာ ဧပြီ ၃ ရက်ကစတင်ပြီး မဟာသင်္ကြန်အတွက် ငွေကောက်နေတာလို့ ဆိုပါတယ်။

ပုသိမ် ဒေသခံ တယောက်က “တအိမ်တက်တအိမ်ဆင်း ဆယ်အိမ်မှူးတွေ၊ ရာအိမ်မှူးတွေနဲ့ အုပ်ချုပ်ရေးမှူးတွေက လိုက်ကောက်နေတာ။ တအိမ် ၁,၀၀၀ တော့ အနည်းဆုံး ထည့်ပေးဖို့ပြောကောက်တာ” လို့ ပြောပါတယ်။

ပုသိမ် အမှတ် ၃ ရပ်ကွက်မှာလည်း စစ်ကောင်စီခန့် အုပ်ချုပ်ရေးအဖွဲ့က သင်္ကြန်အတွက်လို့ ဆိုပြီး ဧပြီ ၂ ရက်ကစလို့ တအိမ်ကို ကျပ် ၃,၀၀၀ အထိကောက်ယူနေတယ်လို့ ဒေသခံတွေဆီကနေ သိရပါတယ်။

ပုသိမ်အုပ်ချုပ်ရေးအဖွဲ့နဲ့နီးစပ်သူတယောက်က “သင်္ကြန်ပွဲအတွက်ဆိုပြီးငွေကောက်နေတာ။ ဆောက်ထားတဲ့ သင်္ကြန်မဏ္ဍပ်တွေကတော့ ဒီအတိုင်းပဲထားတာတွေ့ရတယ်။ ထပ်လုပ်တာ မတွေ့ရသေးဘူး။ ကောက်ထားတဲ့ငွေနဲ့ အလှူအတန်းလုပ်ပေးဖို့ဆိုပြီးတော့ လေသံလွှင့်နေတယ်” လို့ ပြောပါတယ်။

ဒေသခံတွေအနေနဲ့ သင်္ကြန်အတွက်ကောက်ယူတဲ့ငွေကို မထည့်ချင်ပေမဲ့ စစ်ကောင်စီခန့် အုပ်ချုပ်ရေးအဖွဲ့က အလှူငွေထည့်သူနဲ့ မထည့်သူ အမည်ကို စာရွက်နဲ့ ရေးမှတ် ကောက်ယူတာကြောင့် ခြိမ်းခြောက်ဖမ်းဆီးမှာ စိုးရိမ်စိတ်နဲ့ ထည့်နေရတာလို့ ဆိုပါတယ်။