ရှမ်းပြည်နယ်တောင်ပိုင်း၊ ဖယ်ခုံမြို့နယ်ထဲက ခေါင်းအိရွာသစ်အနီးနားကို စစ်ကောင်စီတပ်က အသေခံဒရုန်းနဲ့ တိုက်ခိုက်ခဲ့ပြီး တစင်းကို ပစ်ချနိုင်ခဲ့တယ်လို့ ဖယ်ခုံပြည်သူ့ကာကွယ်ရေးတပ်က ဧပြီ ၄ ရက်မှာ ထုတ်ပြန်ပါတယ်။
ဧပြီလ ၃ ရက် ညနေ ၇ နာရီလောက်မှာ စစ်ကောင်စီတပ်က အသေခံဒရုန်း ၂ စင်းနဲ့ ပစ်ခတ် တိုက်ခိုက်လာတာဖြစ်ပြီး တစင်းကိုတော့ ပစ်ချနိုင်ခဲ့တာပဲ ဖြစ်ပါတယ်။
ဖယ်ခုံ PDF တပ်ရင်းတခုရဲ့ တာဝန်ရှိသူက “ပြည်သူရှိရာ ခေါင်းအိရွာသစ်ဘက်ကို နေ့စဥ် စကခ ၇ ကနေပြီး လက်နက်ကြီးတွေ ပစ်နေပါတယ်။ အသေခံဒရုန်းတွေလည်း တိုက်ခိုက်လာပါတယ်။ မနေ့ညကတော့ မထင်မှတ်ဘဲ ၂ စီးတက်လာပြီး ကျနော်တို့ ကင်းသမားတွေရဲ့ လက်ဦးမှုနဲ့ တစီးကို ပစ်ချနိုင်ခဲ့ပါတယ်”လို့ ပြောပါတယ်။
ပစ်ချနိုင်ခဲ့တဲ့ ဒရုန်းကို တပ်ရင်းက ဧပြီ ၄ ရက်မနက်မှာ သွားကောက်ချိန် စစ်ကောင်စီရဲ့ စကခ ၇ တပ်ကနေ ခေါင်းအိရွာဟောင်းဘက်ကို လက်နက်ကြီးနဲ့ ၅ ကြိမ်ပစ်ခတ်ခဲ့တာကြောင့် ပြည်သူတယောက် ထိခိုက်ဒဏ်ရာရရှိခဲ့တယ်လို့ သိရပါတယ်။
ထိခိုက်မိတဲ့ပြည်သူက အဆုတ်နေရာနားမှာ ထိခိုက်မိတာကြောင့် အသက်အန္တရယ် စိုးရိမ်ရတယ်လို့လည်း သိရပါတယ်။
ခေါင်းအိရွာဘက်မှာ တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လက်နက်ကြီးနဲ့ ပစ်ခတ်တာ၊ ဒရုန်းနဲ့တိုက်ခိုက်တာတွေကို ၂၀၂၄ ခုနှစ် ဖေဖော်ဝါရီလထဲမှာ စတင်ပြုလုပ်လာတာဖြစ်ပါတယ်။
