တမြို့လုံးနီးပါး ငလျင်ဒဏ်ထိခဲ့တဲ့ မန္တလေးတိုင်း၊ တံတားဦးမြို့နယ်ထဲက ကျေးရွာတွေဆီကို ကယ်ဆယ်ရေးတွေ မရောက်သေးလို့ ဒေသခံတွေ အကူအညီ တောင်းခံနေကြပါတယ်။
အင်း၀မြို့ဟောင်းအနီး တံတားဦးမြို့နယ်ထဲက ပန်းပဲတန်း ဘိတ်တန်း ဈေးချို ကျေးရွာအုပ်စုတွေဘက်ဆီကို ကယ်ဆယ်ရေး၀င်ပေးဖို့ ဒေသခံတွေက အကူအညီ တောင်းခံနေတာပါ။
လက်ရှိ ဈေးချိုကျေးရွာအုပ်စုဘက်မှာ ငလျင်ကြောင့် အိမ်အလုံးလိုက် မြစ်ထဲပါသွားတာရှိနေပြီး ရွာထဲမှာ ပိတ်မိနေတဲ့သူတွေကို ကိုယ်ထူကိုယ်ထနဲ့ ကယ်ဆယ်ရေးလုပ်နေရကြောင်း ဒေသခံတယောက်က DVB ကို ပြောပါတယ်။
အဲဒီကျေးရွာအုပ်စုတွေဟာ ဒုဌ၀တီမြစ်ဘေးက ကျေးရွာအုပ်စုတွေဖြစ်ပြီး ကယ်ဆယ်ရေးအတွက် လာဖို့ အတားအဆီးတွေ ရှိနေတယ်လို့ ဒေသခံတယောက်က ပြောပါတယ်။
“အလှူရှင်တော့ နည်းနည်းပါးပါးပဲလာတယ်၊ ကယ်ဆယ်ရေးတော့မရဘူး။ ဘယ်လိုပြောမလဲ ရွာထဲ၀င်ဖို့ကျတော့ ၀င်ဖို့ ခက်တယ်လေ။ ဒါကြောင့် မလာကြတာ။ စစ်ဆေးရေးဘာတွေလည်း ရှိတယ်၊ စက်လှေနဲ့ဘာနဲ့ လာမယ်ဆိုလည်း သူတို့ကလှမ်းပစ်တယ်ဆိုတော့။”
ဒေသခံတွေရဲ့ပြောပြချက်အရ အနည်းဆုံး လူ ၅၀ ကျော် ပိတ်မိနေပြီး ၂၀ ကျော် သေဆုံးနိုင်တယ်လို့ ဆိုပါတယ်။
DVB အနေနဲ့ သေဆုံးပျောက်ဆုံးစာရင်းတွေကို အတည်ပြုနိုင်ဖို့ အဲ့ကျေးရွာဘက်တွေဆီ ဖုန်းဆက်သွယ်ပေမဲ့ လက်ရှိအချိန်ထိ အင်း၀နဲ့ တံတားဦးဘက်တွေဟာ ဖုန်းလိုင်းနဲ့ အင်တာနက်လိုင်းတွေ ပြတ်တောက်နေဆဲပါ။
အင်း၀မြို့ဟောင်းထဲမှာတော့ အလှူရှင်တွေ အကူအညီနဲ့ စားသောက်ရေးအပိုင်းကို ဖြေရှင်းပေးနေပေမဲ့ ပြိုကျပျက်စီးသွားတဲ့ ဘုရားကျောင်းဆောင်တွေ၊ နန်းမြို့ရိုးတွေကိုတော့ မရှင်းရသေးဘူးလို့ အင်း၀မြို့ခံတယောက်က ပြောပါတယ်။
“ဘုရားတွေပြိုတဲ့ဟာတော့ မရှင်းဘူးပေါ့၊ မျှော်စင်ကတော့ ၄ ယောက်သေသွားတာ၊ ၂ ယောက်ကတော့ ထုတ်လို့ မရတော့လို့ဆိုပြီး ဒီတိုင်းထားလိုက်တာပေါ့။ အထိဆုံးနေရာကတော့ ဈေးချိုရွာဗျ၊ ဈေးချိုရွာ ၁၅ အိမ်လောက်ကတော့ မြစ်ထဲကို အောက်အကုန်နိမ့်သွားတာပေါ့၊ မြစ်ထဲပါသွားတာ။ အိမ်ကော၊ ၀ိုင်းကော ဘာမှရစရာမရှိဘူး။ ဦးထုပ်တန်းကတော့ လူတွေ ဘာတွေတော့ အသေအပျာက် မရှိဘူး။ ဈေးချိုကတော့ အသေအပျောက်များတယ်ဗျ။”
ငလျင်ကြောင့် တံတားဦး-အင်း၀တံတား ကျိုးနေပေမဲ့ ကားလမ်းပေါက်သေးတယ်လို့လည်း သိရပါတယ်။
အင်း၀မြို့ဟောင်းထဲမှာတော့ ကုန်းဘောင်ခေတ်လယ် ၁၉ ရာစုလက်ရာ မယ်နုအုတ်ကျောင်း လေးထပ်ကြီးဘုရားနဲ့ နန်းမြို့ရိုးဟောင်း တော်တော်များများ ပြိုကျပျက်စီးသွားခဲ့ပါတယ်။
မောရစ်
