ယီမင်နိုင်ငံမှာ လွန်ခဲ့တဲ့ ၂၄ နာရီအတွင်း အမေရိကန်ရဲ့ လေကြောင်းတိုက်ခိုက်မှုအတွင်း လူ ၅ ယောက် သေဆုံးကာ တခြား ၅ ယောက် ဒဏ်ရာရခဲ့ပြီး တယောက် ပျောက်ဆုံးနေကြောင်း ဟူသီအဖွဲ့ရဲ့ ကျန်းမာရေးဝန်ကြီးဌာနက ဧပြီ ၃ ရက်မှာ ပြောပါတယ်။

ယီမင်နိုင်ငံအနောက်ပိုင်း ဟိုဒေးဒါပြည်နယ်မှာ တိုက်ခိုက်မှုတွေဟာ ဟိုဒေးဒါအလယ်ပိုင်း မန်ဆူရီယခရိုင်ရှိ ရေစီမံကိန်းနဲ့ သူ့အဆောက်အအုံကို ပစ်မှတ်ထား တိုက်ခိုက်ခဲ့တာဖြစ်ပြီး ရေသန့်စက်ရုံနဲ့ သူ့ရဲ့ စီမံခန့်ခွဲရေး အဆောက်အဦ အပါအဝင် ရေကုမ္ပဏီတခုလုံး ပျက်စီးသွားပါပြီ လို့ မန်ဆူရီယခရိုင်ဒါရိုက်တာ အာမဲရ်ဟာအာ့မဲလ်က ပြောပါတယ်။

ဒီနယ်မြေမှာရှိတဲ့ တခုတည်းသော ရေပေးဝေရေးစက်ရုံဖြစ်ပြီး ပြည်သူတွေကို ရေပေးဝေတဲ့ စက်ရုံကို ဗုံးကြဲတာဟာ သူရဲဘောကြောင်တဲ့ လုပ်ရပ်ပါလို့လည်း ဆိုပါတယ်။ အပျက်အစီးတွေအောက်က အသက်ရှင်ကျန်ရစ်သူတွေကိုလည်း ရှာဖွေနေဆဲ ဖြစ်ပါတယ်။

ယီမင်ရှိ ဟူသီလက်နက်ကိုင်အဖွဲ့ဟာ အစ္စရေးပစ်မှတ်တွေ၊ အမေရိကန်ရေတပ်နဲ့ ဒေသတွင်းရှိ နိုင်ငံတကာ သင်္ဘောလမ်းကြောင်းတွေကို တိုက်ခိုက်နေတာကြောင့် ဒါကိုဟန့်တားဖို့ ကြိုးပမ်းတဲ့အနေနဲ့ အမေရိကန်စစ်တပ်ဟာ ယီမင်မြောက်ပိုင်းရှိ ဟူသီထိန်းချုပ်နယ်မြေတွေကို မတ် ၁၅ ရက်ကတည်းက လေကြောင်းတိုက်ခိုက်မှုတွေ ပြန်လည်စတင်ခဲ့ပါတယ်။

အင်္ဂါနေ့အထိ လေကြောင်းတိုက်ခိုက်မှုကြောင့် သေဆုံးသူ ၆၁ ယောက်အထိ မြင့်တက်လာပြီး ၁၃၉ ယောက် ဒဏ်ရာရရှိခဲ့ကြောင်း ဟူသီအုပ်စုက ဗုဒ္ဓဟူးနေ့မှာ ပြောကြားခဲ့ပါတယ်။

ဒါ့အပြင် အမေရိကန်စစ်တပ်ဟာ ဗုဒ္ဓဟူးနေ့က ဟိုဒေးဒါရှိ ရာ့စ်အီဆာ ဧရိယာကို လေကြောင်းတိုက်ခိုက်မှုတွေ ပြုလုပ်ခဲ့ပြီး အသေအပျောက် များခဲ့ပါတယ်။

အနောက်မြောက်ပိုင်း ပြည်နယ်တွေဖြစ်တဲ့ ဟားဂျာနဲ့ ဆားဒါ တို့မှာလည်း နေရာအများအပြား တိုက်ခိုက်ခံခဲ့ပြီး ထိခိုက်သေဆုံးမှုတော့ မရှိကြောင်း ဟူသီမီဒီယာ ဖော်ပြချက်အရ သိရပါတယ်။

တနင်္လာနေ့မှာ အမေရိကန်သမ္မတ ဒေါ်နယ်ထရမ့်ပ်က အမေရိကန် စစ်သင်္ဘောတွေကို တိုက်ခိုက်နေတာ မရပ်တန့်မချင်း ဟူသီသူပုန်တွေကို ဆက်တိုက်ခိုက်မယ်လို့ ကတိပြုခဲ့ပါတယ်။

ယီမင်မြောက်ပိုင်းဒေသ အများစုကို ထိန်းချုပ်ထားတဲ့ ဟူသီတွေဟာ နိုင်ငံတကာ အသိအမှတ်ပြု ယီမင်အစိုးရကို ၂၀၁၄ ခုနှစ်ကတည်းက တိုက်ခိုက်နေတာ ဖြစ်ပါတယ်။

Source : Reuters