ပြီးခဲ့တဲ့သီတင်းပတ်က ငလျင်လှုပ်ခတ်ပြီးတဲ့နောက် ပြိုကျခဲ့တဲ့ မိုးမျှော်တိုက် အပျက်အစီးတွေ ကြားမှာ အသက်ရှင်ကျန်ရစ်သူတွေကို ရှာတွေ့ဖို့ မျှော်လင့်ချက်က တနေ့တခြား နည်းပါးလာနေပြီလို့ ထိုင်းနိုင်ငံ မြို့တော် ဘန်ကောက် အာဏာပိုင်တွေက ဧပြီ ၂ ရက်မှာ ပြောပါတယ်။
မြန်မာနိုင်ငံထဲမှာ အသက်ရှင်ကျန်ရစ်သူတယောက် တွေ့ခဲ့တာကို ကိုးကားရင်း မြို့တော်ဝန် ချတ်ချာ့ထ် စီတီပွန်က ဆက်ရှာသွားမယ်လို့ ပြောပါတယ်။
“မြန်မာနိုင်ငံထဲမှာ အသက်ရှင်သူ တွေ့နိုင်သေးရင် ဒီမှာလည်း ဖြစ်နိုင်ပါတယ်” လို့ သူက သတင်းစာရှင်းလင်းပွဲတရပ်မှာ ပြောခဲ့တာပါ။
မတ် ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်တခု လှုပ်ခတ်ခဲ့ရာမှာ အထပ် ၃၀ မြင့်တဲ့ မိုးမျှော်တိုက်ဟာ ထိုင်းနိုင်ငံ မြို့တော်မှာ လုံးဝပြိုကျခဲ့တဲ့ တခုတည်းသော အဆောက်အအုံ ဖြစ်ပါတယ်။
ထိုင်းနိုင်ငံမှာ ငလျင်လှုပ်အပြီး ပုဂ္ဂလိက အထပ်မြင့်အဆောက်အအုံ ၁၁,၀၀၀ လောက်ရဲ့ ပိုင်ရှင်တွေက အဆောက်အအုံ ခိုင်ခံ့မှုကို စစ်ဆေးဖို့ အမိန့်ပေးခဲ့ပါတယ်။
နိုင်ငံတဝန်းက အစိုးရအဆောက်အအုံ ၃,၃၇၅ လုံးကို စစ်တမ်းကောက်ယူခဲ့ရာမှာ ၃၄ လုံး ဆိုးဆိုးရွားရွား ပျက်စီးခဲ့တယ်လို့ ထိုင်းအာဏာပိုင်တွေက ဧပြီ ၃ ရက်မှာ ပြောပါတယ်။
ထိုင်းနိုင်ငံတဝန်း လူ ၂၂ ယောက်ထက်မနည်း သေဆုံးတယ်လို့ အတည်ပြုခဲ့ပြီး ညနေ ၄ နာရီအထိ လူ ၇၂ ယောက် ပျောက်ဆုံးနေဆဲပါ။
Source : Reuters
