နေပြည်တော်ရှိ ဝန်ထမ်းအိမ်ရာတွေ ပြိုကျမှုကြောင့် လတ်တလော လမ်းပေါ်မှာ အဆင်ပြေသလို နေနေရတဲ့ ဝန်ထမ်းတွေဟာ ငလျင်ဘေးအပြင် ဓားပြဘေးကိုပါ ကြောက်နေရတယ်လို့ သိရပါတယ်။
မတ် ၂၈ ရက် အင်အားကြီးငလျင် လှုပ်ခတ်မှုအတွင်းမှာ နေပြည်တော်မှာရှိတဲ့ ဝန်ထမ်းအိမ်ရာတွေနဲ့ ဝန်ကြီးဌာန အဆောက်အအုံတွေလည်း ပြိုကျပျက်စီးတဲ့အထဲ ပါဝင်ခဲ့တာပါ။
ဒါ့ကြောင့် နေရပ်ပြန်ဖို့ မဖြစ်နိုင်တဲ့ ဝန်ထမ်းတွေဟာ လမ်းဘေးပလက်ဖောင်းတွေနဲ့ ဝန်ကြီးဌာနက လတ်တလော စီစဉ်ပေးထားတဲ့ ဘောလုံးကွင်းတွေမှာ အဆင်ပြေသလို နေနေရတာ ဖြစ်ပါတယ်။
ဝန်ထမ်းတယောက်က “လောလောဆယ်ကတော့ လမ်းဘေးနေ၊ လမ်းဘေးစားပဲပေါ့။ ဘူးကွဲဘက် တိုက် ၃,၀၀၀ ကျော်တွေ၊ တိုက် ၃၃၃၁ ကနေ ၃၃၃၉ အထိပေါ့၊ အဲဒီကဝန်ထမ်းတွေ၊ မိသားစုတွေ ငလျင်ဒဏ်ကြောင့် လမ်းဘေးထွက်နေရတာကို အခွင့်ကောင်းယူပြီး ဓားပြတွေ ဝင်လာနေတယ်လို့ ကြားနရတယ်။ ဟိုတနေ့ကလည်း သဇင်ဆောင်ဘက်မှာ ဓားပြဝင်တိုက်တယ် ကြားတယ်” လို့ ပြောပါတယ်။
ငလျင်ဒဏ်ကြောင့် ဝန်ကြီးဌာန အဆောက်အအုံတွေ၊ ဝန်ထမ်းအိမ်ရာတွေ ပျက်စီးဆုံးရှုံးခဲ့တာကြောင့် စစ်ကောင်စီအနေနဲ့ ဝန်ထမ်းတွေကို နေရပ်ပြန်ခွင့် ပေးထားတယ်လို့ သိရပြီး တိုက်ပွဲဖြစ်ပွားနေတဲ့ ဒေသက ဝန်ထမ်းတွေနဲ့ နေပြည်တော်ဒေသခံ ဝန်ထမ်းတချို့သာ နေပြည်တော်မှာ ကျန်ရှိတော့တယ်လို့လည်း သိရပါတယ်။
“အခုလောလောဆယ်တော့ ရုံးမှာ သန့်ရှင်းရေးလုပ်၊ ဟိုဟာလုပ် ဒီဟာလုပ်ပဲပေါ့။ အများစုက ပြန်ကုန်ကြပြီ။ အိမ်ငှားဖို့ အဆင်ပြေတဲ့သူတွေကတော့ စုပြီး အိမ်ငှားနေကြတယ်။ ကျနော်ကတော့ လောလောဆယ် အသိဘုန်းကြီးကျောင်းမှာ ကပ်နေနေတယ်” လို့လည်း အဆိုပါ ဝန်ထမ်းက ပြောပါတယ်။
ငလျင်ကြောင့် နေပြည်တော်ရှိ ဝန်ထမ်းအိမ်ရာတွေ၊ အစိုးရဝန်ကြီးဌာန အဆောက်အအုံတွေ၊ လွှတ်တော်နဲ့ သမ္မတအိမ်တော် အပါအဝင် စစ်ဘက်ဆိုင်ရာ အဆောက်အုံတွေပါ ပျက်စီးထိခိုက်ခဲ့ ပြီး လူတွေလည်း ရာနဲ့ချီ သေဆုံး ဒဏ်ရာရခဲ့တာဖြစ်ပါတယ်။
