မြန်မာနိုင်ငံမှာ မတ် ၂၈ ရက်က လှုပ်ခတ်ခဲ့တဲ့ ငလျင်ဘေးနဲ့ပတ်သက်ပြီး တရုတ်နဲ့ နိုင်ငံတကာ ကယ်ဆယ်ရေးသမားတွေက အမြန်လာရောက်အကူအညီပေးခဲ့ကြပေမဲ့ အမေရိကန်ကတော့ အကူအညီပေးခြင်းမရှိသေးဘဲ နောက်ကျနေတယ် လို့ ရိုက်တာက ဖော်ပြပါတယ်။

မြန်မာ့အိမ်နီးချင်း တရုတ်နိုင်ငံဟာ အရေးပေါ်ကယ်ဆယ်ရေးအဖွဲ့ စေလွှတ်တာ၊ ဆေးဝန်ထမ်းတွေ၊  ငလျင်ပညာရှင်တွေနဲ့ မြေပြင်ဆေးရုံဝန်ထမ်းတွေ၊ အသက်ကယ်ခွေးတွေနဲ့ ကယ်ဆယ်ရေး လုပ်ငန်းတွေ လုပ်ဆောင်နေပါတယ်။

ငလျင်ဒဏ်ခံစားခဲ့ရတဲ့ စစ်ကိုင်းနဲ့ မန္တလေးမှာ စစ်တပ်ရဲ့ ကူညီမှုတွေ မရကြောင်းလည်း ဒေသခံတွေက ပြောပါတယ်။

အဲဒီအချိန်မှာ အမေရိကန်ရဲ့ အဓိကပြိုင်ဘက် တရုတ်နိုင်ငံက ဒေါ်လာ ၁၃ ဒသမ ၇၆ သန်း လှူဒါန်းမယ်လို့ ကတိပြုထားပါတယ်။

တရုတ်နိုင်ငံဟာ ကနဦးအကူအညီမှာ ရွက်ဖျင်တဲတွေ၊ စောင်တွေ၊ အရေးပေါ်သုံးဆေးအိတ်တွေကို မတ် ၃၁ ရက်မှာ ရန်ကုန်ကို ပေးပို့ခဲ့တယ်လို့ တရုတ်နိုင်ငံက ပြောပါတယ်။

အိန္ဒိယနိုင်ငံကလည်း ဧပြီ ၁ ရက်နေ့ကတည်းက ထောက်ပံ့ပစ္စည်း ၆၂၅ တန်ကို ပို့ဆောင်ပေးခဲ့သလို မန္တလေးမြို့မှာ သေဆုံးသူ ၁၆ ယောက်ရဲ့ ရုပ်အလောင်းတွေကို ရှာဖွေ ကူညီပေးခဲ့ကာ လူနာ ၁၀၄ ယောက်ကို ဆေးကုသမှု ပေးခဲ့ပါတယ်။

ရုရှားနဲ့ အိန္ဒိယတို့ဟာ ရွှေ့ပြောင်းဆေးရုံတွေ တည်ဆောက်ပြီး ငလျင်ဒဏ်သင့်နေရာတွေကို ကူညီပေးခဲ့တာပါ။

မြန်မာငလျင်အရေးနဲ့ပတ်သက်ပြီး ကမ္ဘာ့လူသားချင်းစာနာမှု အလှူတွေ အများဆုံးပြုလုပ်ထားတဲ့ အမေရိကန်က ဒေါ်လာ ၂ သန်း ကူညီမယ်လို့ ပြောထားပေမဲ့ စစ်တပ်ရဲ့ ဗီဇာကန့်သတ်ချက်တွေအရ ကူညီမှုတွေ နောက်ကျနေတယ်လို့လည်း ရိုက်တာက ဖော်ပြပါတယ်။

ပြီးခဲ့တဲ့နှစ်တွေက ကမ္ဘာမှာ ဆူနာမီ၊ ငလျင်တွေနဲ့ တခြားဘေးအန္တရာယ် ဖြစ်ပွားခဲ့ချိန်တွေမှာ အမေရိကန်က ပုံမှန်ကူညီမှုနဲ့ ကျွမ်းကျင်ဝန်ထမ်းတွေ အလျင်အမြန် စေလွှတ်ခဲ့ဖူးပါတယ်။

အမေရိကန်မှာ ဒေါ်နယ်ထရမ့်ပ် သမ္မဖြစ်လာပြီးနောက် အစိုးရအဖွဲ့ လျှော့ချမှုတွေ ပြုလုပ်ခဲ့တာကြောင့် သဘာဝဘေးအန္တရာယ်တွေ ဖြစ်ပွားနေချိန်မှာ အရင်လို မစွမ်းဆောင်နိုင်တော့ဘူးလို့ အမေရိကန်အစိုးရအရာရှိ ၃ ယောက်က ရိုက်တာကို ပြောပါတယ်။

USAID လူသားချင်းစာနာထောက်ထားရေးအဖွဲ့ အကြီးအကဲဟောင်း မာစီယာဝေါင်းက  “အမေရိကန်နိုင်ငံရဲ့ ကမ္ဘာ့အရေးကူညီမှုတွေက မဟာဗျူဟာမြောက်တဲ့ အရေးပါမှုတခုပါ။ ပုံမှန်ဆို အကူအညီပေးမှုတွေ ကျွမ်းကျင်ဝန်ထမ်းစေလွှတ်မှုတွေ ပြုလုပ်လေ့ရှိပေမဲ့ အခုတော့ လုံးဝပြောင်းပြန်ပါပဲ။ ဒီအတွက် ကျမအံ့အားသင့်မိသလို အကူအညီပေးရေး တုံ့ပြန်မှုတွေလည်း နှောင့်နှေးပါတယ်” လို့ ပြောပါတယ်။

ထရမ့်ပ် တက်လာပြီးတဲ့နောက် ကမ္ဘာ့သဘာဝဘေးအန္တရာယ် ဖြစ်ပွားမှုတွေကို အကူအညီပေးနေတဲ့ USAID ဝန်ထမ်းတွေ အားလုံး‌နီးပါးကို ထုတ်ပယ်ခဲ့တာ ဖြစ်ပါတယ်။

စစ်ကိုင်းငလျင်အတွက် အရေးပေါ် တုံ့ပြန်မှုအနေနဲ့ အမေရိကန်ပြည်ထောင်စုက မြန်မာနိုင်ငံအခြေစိုက် လူသားချင်းစာနာမှုဆိုင်ရာအကူအညီပေးတဲ့ အဖွဲ့အစည်းတွေက တဆင့် ဒေါ်လာအမေရိကန် ဒေါ်လာ၂ သန်းအထိ ပံ့ပိုးကူညီပေးအပ်သွားမယ်လို့  အမေရိကန်သံရုံးက ထုတ်ပြန်ထားပါတယ်။

ဒါ့အပြင် အမေရိကန်နိုင်ငံတကာ ဖွံ့ဖြိုးရေးအေဂျင်စီ (USAID) ရဲ့ အရေးပေါ်တုံ့ပြန်ရေးအဖွဲ့က အရေးပေါ် နားခိုစရာ၊ အစားအသောက်၊ ဆေးဝါးလိုအပ်ချက်နဲ့ ရေရရှိနိုင်မှုအပါအဝင် ငလျင်ဘေးသင့်ဒေသတွေရှိ ပြည်သူတွေရဲ့ အပူတပြင်း လိုအပ်ချက်တွေကို သုံးသပ်ဖော်ထုတ်ဖို့ မြန်မာနိုင်ငံသို့ ရောက်ရှိလာမယ်လို့လည်း သံရုံးထုတ်ပြန်ချက်မှာ ဖော်ပြပါတယ်။

Source : Reuters