လီဗာပူးအသင်းဟာ ပရီးမီးယားလိဂ်ပွဲစဉ် ၃၀ မှာ ဒါဘီပြိုင်ဘက် အဲဗာတန်ကို အနိုင်ရရှိပြီးနောက် လက်ကျန် ၈ ပွဲမှာ ၁၃ မှတ်ရရှိရုံနဲ့ ချန်ပီယံအဖြစ် အောင်ပွဲခံနိုင်တော့မှာပါ။

လီဗာပူးအသင်းဟာ ဒုတိယနေရာက အာဆင်နယ်ကို ၁၂ မှတ်ဖြတ်ထားပြီး လက်ကျန် ၈ ပွဲမှာ ရရှိနိုင်တဲ့ ရမှတ် ၂၄ မှတ်မှာ ၁၃ မှတ်ရရှိရုံနဲ့ အကြိမ် ၂၀ မြောက် ချန်ပီယံအဖြစ် မှတ်တမ်းရေးထိုးနိုင်မှာပါ။

လက်ကျန် ၈ ပွဲမှာ လီဗာပူးအသင်းက ဖူဟမ်၊ ဝက်စ်ဟမ်း၊ လက်စတာ၊ စပါး၊ ချဲလ်ဆီး၊ အာဆင်နယ်၊ဘရိုက်တန်၊ ခရစ္စတယ်ပဲလေ့ အသင်းတွေနဲ့ အစဉ်လိုက် ကစားသွားရမှာ ဖြစ်ပါတယ်။

လီဗာပူးအသင်း အကြိမ် ၂၀ မြောက် ချန်ပီယံ ဖြစ်လာမယ်ဆိုရင် အင်္ဂလန်အဆင့်မြင့်ဆုံး လိဂ်ပြိုင်ပွဲမှာ ချန်ပီယံ အကြိမ် ၂၀ နဲ့ စံချိန်တင်ထားတဲ့ မန်ယူအသင်းရဲ့အောင်မြင်မှုကို လိုက်မီနိုင်မှာလည်း ဖြစ်ပါတယ်။

မနေ့ညကပွဲမှာတော့ လီဗာပူးရရှိခဲ့တဲ့အနိုင်ဂိုးဟာ လူကျွံဘောဖြစ်လို့ မပေးသင့်တဲ့ သွင်းဂိုးဖြစ်ကြောင်း အဲဗာတန်နည်းပြ ဒေးဗစ်မိုယက်စ်က ပြောသွားပါတယ်။

အဲဗာတန်အသင်းဟာ ဧပြီ ၂ ရက် မနေ့ညက ကစားခဲ့တဲ့ လီဗာပူးနဲ့ မာဆေးဆိုဒ်ဒါဘီပွဲစဉ်မှာ  ဒီယေဂို ဂျိုတာရဲ့ပွဲချိန် ၅၇ မိနစ်မှာ သွင်းယူခဲ့တဲ့ တလုံးတည်းသော ဂိုးကြောင့် ရှုံးနိမ့်ခဲ့ရတာပါ။

အဲဒီသွင်းဂိုးမှာ တောင်ပံကစားသမား ရူဘင်ဒီယက်ဇ်ဟာ လူကျွံနေခဲ့တာကြောင့် မပေးသင့်တဲ့ သွင်းဂိုးဖြစ်ပြီး၊ လူကျွံဘောဘာကြောင့် မပေးတာလဲဆိုတာ နားမလည်မိကြောင်း၊ သေချာပြန်ကြည့်ပြီးဖြစ်လို စည်းကြပ်ဒိုင်အနေနဲ့ လွယ်ကူစွာပဲ အလံထောင် ပြပြီး လူကျွံဘောပေးရမယ့် အခြေအနေဖြစ်ကြောင်း နည်းပြမိုယက်စ်က ပြောပါတယ်။

ကွင်းလယ်ဒိုင် ဆင်မြူရယ်ဘားရော့ကတော့ ဒီယက်ဇ်လူကျွံနေခဲ့ပေမဲ့ ဂျိုတာရဲ့ သွင်းဂိုးမှာ ပါဝင် ပတ်သတ်မှုမရှိဘူးဆိုတဲ့ အကြောင်းပြချက်နဲ့ ဂိုးအဖြစ်သတ်မှတ်ပေးသွားခဲ့တာဖြစ်ပါတယ်။

ဒီအတောအတွင်း လီဗာပူးတိုက်စစ်မှူ ဆာလာကို အသင်းမီဒီယာက ဓာတ်ပုံရိုက်ကူးနေမှုဟာ စာချုပ်သစ်ချုပ်ဆိုဖို့အတွက် ဖြစ်မယ်လို လီဗာပူးပရိသတ်တွေက မျှော်လင့်နေကြပါတယ်။

ဆာလာဟာ အခုနှစ်ဘောလုံးရာသီအကုန်မှာ စာချုပ်သက်တမ်းကုန်ဆုံးမှာဖြစ်ပြီး အသင်းကနေ ထွက်ခွါဖို့ နီးစပ်နေတာပါ။

လက်ရှိအချိန်မှာတော့ လီဗာပူးအသင်းမီဒီယာအဖွဲက ဆာလာကို ဓာတ်ပုံရိုက်ကူးနေတဲ့ ဓာတ်ပုံတချို့ ပေါ်ထွက်လာခဲ့ပြီး ဒါဟာ စာချုပ်ချုပ်သစ်ချုပ်ဆိုတာကို သတင်းထုတ်ပြန်ဖို့ အတွက်ဖြစ်လိမ့်မယ်လို့ လီဗာပူးပရိသတ်တွေက ခန့်မှန်းသုံးသပ်နေကြတာပါ။

လီဗာပူးပရိသတ်တယောက်ကတော့ ထွက်ပေါ်လာတဲ့ ဓာတ်ပုံရိုက်ကူးမူမှာ ဆာလာက ပျော်ရွှင်နေပြီး AXA ကွင်းနဲ့ အမ်ဖီးလ်ကွင်းမှာလည်း မဟုတ်တာကြောင့် စာချုပ်သစ်ချုပ်ဖို့ ဖြစ်နိုင်တယ်လို့ မှတ်ချက်ရေးသားပါတယ်။

ဆာလာဟာ  လီဗာပူးအသင်းသမိုင်းတလျှောက် အခမ်းနားဆုံးကစားသမားတယောက် အဖြစ် သတ်မှတ်ခံထားရပြီး ပြိုင်ပွဲစုံ ၃၉၂ ပွဲမှာ ၂၄၃ ဂိုး အထိ သွင်းယူထားပါတယ်။

Photo: Reuters