တနင်္သာရီတိုင်း၊ မြိတ်မြို့က နှစ်ပတ်ကျော်အကြာ ပျောက်ဆုံးသွားတဲ့ အသက် ၇ နှစ်အရွယ် မသီသီဝင်းအား တော်လှန်ရေးတပ်ဖွဲ့ဝင်တချို့က ပြန်တွေ့ရှိခဲ့ပြီး သူမအား ခေါ်ယူသွားတဲ့ ဘုန်းကြီးကို အပြစ်ပေးအရေးယူကာ ထောင်ဒဏ် ၇ နှစ်ချမှတ်လိုက်တယ်လို့ တော်လှန်ရေးတပ်ဖွဲ့ဆီက သိရပါတယ်။
ပျောက်ဆုံးပြီ နှစ်ပတ်ကျော်အကြာ မတ် ၂၈ ရက်နေ့ မနက်မှာပဲ သရက်ချောင်းမြို့နယ်အတွင်းရှိ KNU စစ်ဆေးရေးဂိတ်ဖြစ်တဲ့ ပဲဒက်ရွာစစ်ဆေးရေးဂိတ်အနီးမှာ လူဝတ်လဲထားတဲ့ဘုန်းကြီးနဲ့အတူ မိန်းကလေးကိုပါ တ်ေလှန်ရေးတပ်ဖွဲ့ဝင်တွေကနေ တွေ့ရှိခဲ့တာလို့ ပြောပါတယ်။
အဲ့ဒီနောက် သူတို့နှစ်ဦးအား ခေါ်ယူထိန်းသိမ်းလိုက်ကာ ဘုန်းကြီးအား စစ်ဆေးမေးမြန်းခဲ့ပြီးတော့ မတ် ၃၀ ရက်နေ့မှာပဲ ကလေးခိုးမှုနဲ့ ထောင်ဒဏ် ၇ နှစ်ချမှတ်လိုက်တယ်လို့ ကစယ်ဒိုတပ်ရင်း ၃ တပ်ဖွဲ့ဝင်တယောက်က ပြောပါတယ်။
“ကျနော်တို့ ဖမ်းဆီးတုန်းက အရပ်ဝတ်လဲထားတယ်။ ပထမမေးတုန်းက ဒီကလေးမကို သူက သံယောဇဉ်ရှိလို့ ခေါ်လာတယ်လို့ပဲ ပြောတယ်။ ဒီကလေးလေးနဲ့မခွဲနိုင်လို့ ခေါ်လာတယ်လို့ ပြောတယ်။ နောက်မှာ အဖြေမှန်ကို ပြန်သိရတယ်။ ကျနော်တို့ တပ်ရင်းဌာနချုပ်ကိုပဲ လွှဲပြောင်းပေးပြီး အမိန့်ချလိုက်တယ်။”
ပုလောမြို့နယ် ပအဖရဲ့တာဝန်ရှိသူတယောက်က “လိုင်းပေါ်က သတင်းတွေအရ ပုလောဘက်တက်လာတယ်ဆိုလို့ ကိုယ့်နယ်မြေထဲမှာပဲ လိုက်ရှာကြတာ မတွေ့ဘူး။ နောက်မှ သရက်ချောင်းဘက်က တပ်ဖွဲ့ဝင်က သူတို့ တွေ့တယ်ပြောတော့ ဟုတ်၊ မဟုတ် အတည်ပြုခိုင်းပြီးမှ ဖမ်းဆီးလိုက်တာပါ” လို့ ပြောပါတယ်။
လက်ရှိမှာတော့ မိန်းကလေးအား မိဘထံ ပြန်လည်အပ်နှံခဲ့ကာ လူဝတ်လဲထားတဲ့ ဘုန်းကြီးကိုတော့ တပ်ရင်းဌာနချုပ်မှာရှိတဲ့ အကျဉ်းထောင်တွင်းမှာ အရေးယူ ထောင်ချထားတယ်လို တော်လှန်ရေးတပ်ဖွဲ့ဝင်တွေဆီက သိရပါတယ်။
