ကရင်နီပြည်နဲ့ ရှမ်းပြည်နယ်အစပ်မှာရှိတဲ့ တောင်မဲသင်းနဲ့ လုံးပျဥ်ကျေးရွာတွေဘက်ကို စစ်ကောင်စီတပ်နဲ့ PNO ပြည်သူ့စစ်တွေက တောမီးရှို့တာကြောင့် နေအိမ် ၂၀ ကျော် မီးလောင်ဆုံးရှုံးခဲ့ရတယ်လို့ ပအိုဝ်း အမျိုးသားကာကွယ်ရေးတပ်ဖွဲ့-ခမ်းကောင် PNDF-KK က ဧပြီ ၁ ရက်မှာ ပြောပါတယ်။

စစ်ကောင်စီနဲ့ PNO ပြည်သူ့စစ်တို့ တပ်စွဲထားတဲ့ ဆောင်းပြောင်းနဲ့ နောင်းဝိုးကျေးရွာကနေ မတ် ၃၁ ရက် နေ့လယ်ပိုင်းလောက်မှာ တောမီးရှို့ခဲ့တာကြောင့် တောင်မဲသင်းက နေအိမ် အလုံး ၂၀ ကျော်နဲ့ လုံးပျဥ်ကျေးရွာမှာ နေအိမ် ၄ လုံး မီးလောင်ပျက်စီးခဲ့ရတယ်လို့ သိရပါတယ်။

PNDF-KK တာဝန်ရှိသူက “သူတို့တောမီးရှို့တဲ့အကြောင်းက ဒီဘက်ကအိမ်တွေကို လောင်စေချင်တဲ့စိတ်နဲ့ ရှို့တယ်လို့ မြင်တယ်။ စစ်ကြောင်းထိုးဖို့ ရှိမရှိကတော့ မသိရဘူး။ ပြည်သူလူထုတွေ မရှိတော့တဲ့အိမ်ကို သူတို့မီးရှို့လိုက်တဲ့အတွက် ကျနော်တို့ကတော့ ဝမ်းနည်းရတယ်။ တောအုပ်ကလည်းထူထပ်တော့ လောင်ကျွမ်းသွားတာ မြန်တာလည်း ပါတာပေါ့” လို့ ပြောပါတယ်။

စစ်ကောင်စီတပ်နဲ့ PNO ပြည်သူ့စစ်က ၂၀၂၄ ခုနှစ် ဇူလိုင်လလောက်ကစလို့ ဆောင်းပြောင်းနဲ့ နောင်းဝိုးကျေးရွာမှာ တပ်စွဲနေထိုင်နေပြီး တောင်မဲသင်းနဲ့ လုံးပျဥ်ကျေးရွာတွေဘက်ကို လက်နက်ကြီးနဲ့ ပစ်ခတ်တာ၊ အသေခံဒရုန်းနဲ့ ပစ်ခတ်တာတွေလည်း ရှိနေတယ်လို့ ဆိုပါတယ်။

တောင်မဲသင်းနဲ့ လုံးပျဥ်ကျေးရွာဘက်က ဒေသခံတွေက စစ်ဘေးရှောင်နေကြတာ ၂ နှစ်ဝန်းကျင်အထိ ရှိနေပြီး PNDF-KK၊ KNDF နဲ့ မဟာမိတ်ပူးပေါင်းတပ်ဖွဲ့တွေက မီးငြှိမ်းသတ်ရေးအတွက် ကူညီဆောင်ရွက်ခဲ့တယ်လို့ သိရပါတယ်။