သဲတောမြို့နဲ့ ဝမ်းတွင်းမြို့မှာ ငလျင်ဒဏ်သင့်ခဲ့ရတဲ့ မြို့ခံပြည်သူတွေဟာ သောက်သုံးရေ အခက်အခဲ ကြုံနေရတယ်လို့ လူမှုကူညီရေးအသင်း တာဝန်ရှိသူက ပြောပါတယ်။
စစ်ကိုင်းတိုင်းကို ဗဟိုပြုပြီး လှုပ်ခတ်ခဲ့တဲ့ ငလျင်ကြောင့် စစ်ကိုင်း၊ မန္တလေးမြို့ကြီးတွေ နည်းတူ ထိခိုက်ပျက်စီးခဲ့တဲ့ သဲတောမြို့နဲ့ ဝမ်းတွင်းမြို့တွေမှာ နေအိမ်၊ အဆောက်အအုံ၊ ရက်ကန်းစက်ရုံတွေ အပါအဝင် ၃၂၀ လုံး ပြိုကျပျက်စီးခဲ့ပါတယ်။
ရှာဖွေကယ်ဆယ်ရေးလုပ်ဆောင်ရာမှာ သေဆုံးသူ ၅၁ ယောက်နဲ့ ထိခိုက်ဒဏ်ရာရရှိသူ ၈၄ ယောက် ရှိခဲ့ပါတယ်။ လက်ရှိမှာလည်း ရှင်းလင်းရေးလုပ်ငန်းတွေ လုပ်ဆောင်ဖို့ စက်ယန္တရား အခက်အခဲတွေ ရှိနေပါတယ်။
လူမှုကူညီရေးအသင်း တာဝန်ရှိသူတယောက်က “လောလောဆယ်တော့ မီးမလာတော့ ရေအခက်အခဲက တော်တော်လေး ကြုံနေရပြီ။ သောက်ရေကော သုံးရေကော။ ကျနော်တို့မြို့က ရေတူးလည်း မထွက်တဲ့ နေရာတော်တော်များတဲ့ မြို့ဆိုတော့ အစိုးရစည်ပင်က ပေးတဲ့ရေကိုပဲ သုံးရတယ်။ စည်ပင်ရေးပိုက်ကလည်း မနေ့က စမ်းပြီးတင်လိုက်ပြီ။ ဒါပေမဲ့ လှောင်ကန်ကို ပို့တဲ့ ပိုက်က ငလျင်ကြောင့် ပျက်သွားလား မသိဘူး။ အဲဒီမှာ ပြန်ပြီး အခက်အခဲရှိနေတယ်။ ပြောရရင် ရေရဖို့က ပြည်သူက ပြည်သူ ကူညီနေရတယ်” လို့ ပြောပါတယ်။
လူမှုကယ်ဆယ်ရေးအဖွဲ့တွေဟာ သဘာဝဘေးအန္တရာယ်နဲ့ပတ်သက်ပြီး ကယ်ဆယ်ရေးပစ္စည်းတွေ ဈေးကြီးမြင့်တာကြောင့် ဝယ်ယူဖို့ အခက်အခဲတွေရှိနေပြီး လုပ်ငန်းတွေ ကြန့်ကြာမှုမရှိအောင် အလှူရှင်တွေအနေနဲ့ လှူဒါန်းပေးဖို့ လူမှုကယ်ဆယ်ရေးအဖွဲ့တွေက မေတ္တာရပ်ခံထားပါတယ်။
ငလျင်ဒဏ်သင့်ပြည်သူတွေဟာ သောက်သုံးရေအတွက် အခက်အခဲတွေနဲ့ပါ ဆက်လက် ရင်ဆိုင်နေရတယ်လို့ မြို့ခံတယောက်က ပြောပါတယ်။
“ရေက လောလောဆယ်က အခက်အခဲက ရှိတယ်။ ရပ်ကွက်ထဲက အိမ်တွေမှာကျတော့ တော်တော်များများ အဆင်မပြေကြဘူး။ လောလောဆယ် လက်ဆွဲ အင်ဂျင်လေးတွေနဲ့ပဲ မောင်းရတယ်။ တချို့ကျတော့လည်း အငှားလိုက်တာ ရှိတယ်လို့တော့ ပြောတယ်။ တနာရီ ဘယ်လောက်ဆိုပြီး။ အဲဒါလည်း အခက်အခဲဖြစ်နေတယ်လို့ပဲ ပြောရမှာပေါ့။ တချို့ကတော့ တနာရီ ၃ သောင်းတို့ ၄ သောင်းတို့ လိုက်ကြတာလည်း ရှိတဲ့အခါကျတော့ တော်ရုံတန်ရုံက မငှားနိုင်ဘူး။ တော်တော်များများက ဒီမှာ အခက်အခဲဖြစ်တယ်။”
မြန်မာနိုင်ငံမှာ အင်အားပြင်းငလျင်လှုပ်ခတ်မှုကြောင့် စုစုပေါင်း သေဆုံးသူအရေအတွက် ၃,၇၅၆ ယောက်နဲ့ ထိခိုက်ဒဏ်ရာရသူ ၄,၅၇၅ ယောက်အထိရှိလာပြီး လူ ၇၀၅ ယောက် ပျောက်ဆုံးနေဆဲဖြစ်တယ်လို့ DVB က ဧပြီလ ၁ ရက်နေ့ ည ၈ နာရီအထိ စုစည်းရရှိထားတဲ့ အချက်အလက်တွေအရ သိရပါတယ်။
