အင်အားပြင်း ငလျင်ကြောင့် ထိခိုက်ဆုံးရှုံးခဲ့သူတွေကို အထောက်အပံ့ပေးဖို့အတွက် အနိုင်ရခဲ့တဲ့ လက်ဝှေ့ပွဲတွေမှာ သုံးခဲ့တဲ့ လက်အိတ်တွေကို လှူဒါန်းမယ်လို့ မေ ၃၀ ရက်မှာ အောင်လအန်ဆန်က သူ့ရဲ့လူမှုန်ကွန်ရက်စာမျက်နှာကနေ အသိပေးပါတယ်။
မြန်မာနိုင်ငံအလယ်ပိုင်း မန္တလေးနဲ့ စစ်ကိုင်း ဒေသတွေမှာ ပြင်းထန်တဲ့ မြေငလျင်တခု တိုက်ခတ်ပြီးတဲ့နောက် မယုံနိုင်လောက်အောင် ဆုံးရှုံးမှုကြီးမားခဲ့တဲ့အတွက် ပြန်လည်ထူထောင်ရေးလုပ်ဖို့ လှူဒါန်းတာလို့ ဆိုပါတယ်။
“ကျနော် ကိုယ်တိုင်တိုက်ခိုက်ခဲ့ပြီး အနိုင်ရယူခဲ့တဲ့ လက်အိတ်တွေကို လေလံတင်ဖို့ဆုံးဖြတ်ခဲ့တယ်။ အလှူငွေတွေကို အဓိကလိုအပ်နေတဲ့နေရာတွေဆီ အရောက်ပေးပို့မယ်။ တဦးချင်းရဲ့ တယောက်စာလှူဒါန်းမှု၊ တဒေါ်လာတိုင်းဟာ မြေငလျင်သင့်ပြည်သူတွေကို အစာ၊ နေရာထိုင်ခင်းနဲ့ ဆေးဘက်ဆိုင်ရာအကူအညီတွေ စသဖြင့် အများကြီးပံ့ပိုးပေးနိုင်မယ့် အလှူငွေတွေအဖြစ် တိုက်ရိုက်ရောက်ရှိမှာပဲဖြစ်ပါတယ်” လို့ အောင်လအန်ဆန်ကအ သိပေးပြောဆိုထားပါတယ်။
အနိုင်ရလက်အိတ်တွေဟာ ခံနိုင်ရည်၊ အာမခံမှုနဲ့ ခွန်အားတို့ရဲ့ သင်္ကေတဖြစ်ပြီး အခုအချိန်မှာ မြန်မာပြည်သူတွေဟာလည်း ပြန်လည်ရှင်သန်ထမြောက်ဖို့ လိုအပ်တဲ့အတွက် ဒီလက်အိတ်တွေကို လှူဒါန်းဖို့ ရွေးချယ်လိုက်တာလို့ သူကဆိုပါတယ်။
လက်အိတ်တွေကို ကြမ်းခင်းစျေး: ၃၀,၀၀၀,၀၀၀ ကျပ် (သို့မဟုတ်) ၆,၅၀၀ USD နဲ့ မတ် ၃၁ ရက် မနက် ၁၀နာရီကနေ ဧပြီလ ၆ ရက် ညနေ ၆ နာရီအထိ လေလံစနစ်နဲ့ ရောင်းချမယ်လို့ သိရပါတယ်။
ရန်ကုန်မြို့ လှိုင်မြို့နယ် ဓမ္မာရုံလမ်း အမှတ် ၂၀ က Gallery Ohmar မှာ လက်အိတ်ကို ကိုယ်တိုင် လာရောက်ကြည့်ရှုနိုင်တယ်လို့လည်း ဆိုထားပါတယ်။
လေလံမှာ ပါဝင်လိုသူတွေအနေနဲ့ အရေးပါမှုကို နားလည်ပြီး တကယ်တန်ဖိုးရှိတဲ့ လေလံဆွဲခြင်းတွေ ပြုလုပ်ကြဖို့လည်း အောင်လအန်ဆန်က တိုက်တွန်းထားပါတယ်။
