တိုက်ပွဲပြင်းပြင်းထန်ထန်မဖြစ်တာ တပတ်ဝန်းကျင်ရှိလာပေမဲ့ စစ်ကောင်စီတပ်က ဒီကနေ့ မတ် ၃၀ ရက်နေ့မှာပဲ ဗန်းမော်ကို ဗုံးလာကြဲသွားတယ်လို့ မြေပြင်တပ်တွေနဲ့ နီးစပ်တဲ့ ဒေသခံက ပြောပါတယ်။
မြေပြင်တပ်ဖွဲ့တွေနဲ့ နီးစပ်သူက “မနေ့က ညနေပိုင်းအထိကတော့ အရင်လို လာနေကြထက် နည်းနည်းတော့ လျော့သွားတယ်ပေါ့။ Y-12 မလာဘူး၊ ဗုံးကြဲတာမလာဘူး။ ဒီနေ့ (မတ်လ ၃၀ ရက်) မနက်ပိုင်းကျတော့ ဂျက်လေယာဉ်နဲ့ ဗုံးလာကြဲသွားတယ်” လို့ ပြောပါတယ်။
ဒါပေမဲ့ ဘယ်နေရာကို၊ ဗုံးဘယ်နှစ်လုံး ကြဲချသွားတယ်ဆိုတာနဲ့ ထိခိုက်မှုအခြေအနေကိုတော့ မသိရသေးပါဘူး။
“မြေပြင်တိုက်ပွဲက မရှိဘူးထင်တယ်၊ မြေပြင်မှာ ပစ်ခတ်မှုမရှိသလောက် ငြိမ်နေတာ တပတ်ကျော်ပြီ” လို့ အဆိုပါ နီးစပ်သူက ဆက်ပြောပါတယ်။
ကချင်လွတ်လပ်ရေးတပ်မတော် (KIO/KIA) ပြောခွင့်ရသူ ဗိုလ်မှူးကြီးနော်ဘူကတော့ ဗုံးကြဲတာနဲ့ ပတ်သက်လို့ သူ့ဆီ သတင်းရောက်တာ မရှိသေးကြောင်း ပြောပါတယ်။
မြေပြင်မှာ ထိုးစစ်တွေ ရပ်ထားကြောင်းနဲ့ စစ်ကောင်စီတပ်တွေ ထွက်လာရင်တော့ ပစ်ခတ်မှုတချို့ဖြစ်တာ ရှိတယ်လို့ ဆိုပါတယ်။
ကချင်ပြည်နယ်ရဲ့ ဒုတိယမြို့တော် ဗန်းမော်ကို KIA ပူးပေါင်းတပ်တွေက ၂၀၂၄ ခုနှစ် ဒီဇင်ဘာ ၄ ရက်မှာ စတင်ထိုးစစ်ဆင်တာဖြစ်ပြီး တပ်စခန်းတချို့ကို သိမ်းပိုက်ထားပါတယ်။
အင်အားကြီးငလျင် လှုပ်ခတ်ပြီးနောက်ပိုင်းမှာ ဗန်းမော်၊ မတ္တရာ၊ ချောင်းဦး၊ နောင်ချို၊ ပခုက္ကူ၊ ပေါက်၊ ဖြူး၊ ဖားဆောင်းနဲ့ ဘားအံတို့မှာ မတ် ၂၈ ရက်ကနေ ၃၀ ရက်အထိ လေကြောင်းနဲ့ လက်နက်ကြီးပစ်ခတ်မှု အကြိမ်ရေ ၁၁ ကြိမ် ပြုလုပ်ခဲ့ကြောင်း DVB Data Team က စာရင်းပြုစုနိုင်ခဲ့ပါတယ်......။
