ရန်ကုန်ဈေးကွက်မှာ ဒီဇယ်ဈေးဆက်ကျဆင်းလာပြီး ဓာတ်ဆီဈေးတွေကတော့ အနည်းငယ် ပြန်တက် လာတယ်လို့ စက်သုံးဆီတင်သွင်း သိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက သိရပါတယ်။
ပြီးခဲ့တဲ့ သီတင်းပတ်က ဒီဇယ် တလီတာကို ၅၅ ကျပ် ကနေ ကျပ် ၇၀ အကြား ပြန်ကျခဲ့သလို အခုတပတ်မှာလည်း တလီတာကို ကျပ် ၂၀ ကနေ ၂၅ ကျပ်အကြား ထပ်မံကျဆင်းလာပါတယ်။
ဒါပေမဲ့ ဓာတ်ဆီဈေးကတော့ ပြီးခဲ့တဲ့ သီတင်းပတ်က တလီတာကို ကျပ် ၉၀ ဈေးကျဆင်းခဲ့ပေမဲ့ အခုတပတ်မှာ ၅ ကျပ်ကနေ ၁၀ ကျပ် ကြား အနည်းငယ် ပြန်မြင့်တက်လာပါတယ်။
စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီရဲ့ ဈေးနှုန်း ထုတ်ပြန်ချက်အရ မတ် ၂၈ ရက်မှာ ၉၂ တလီတာကို ၃,၀၀၀ ကျပ်၊ ၉၅ တလီတာ ၃,၀၅၀ ကျပ်၊ ဒီဇယ်တလီတာ ၂,၅၈၀ ကျပ်နဲ့ ပရီမီယံဒီဇယ် တလီတာကို ၃,၁၉၀ ကျပ် ရှိပါတယ်။
ကမ္ဘာရေနံစိမ်း ဈေးကတော့ တပတ်တာအတွင်း ၂ ရာခိုင်နှုန်းကျော် တက်လာပြီး တစည်ကို ၇၃ ဒေါ်လာ အထက် ရောက်ရှိနေပါတယ်။
မြန်မာကျပ်ငွေနဲ့ ဒေါ်လာ ငွေလဲနှုန်းကလည်း အနည်းငယ် ပြန်တက်ရိပ်ပြနေပြီး ဒီကနေ့ နေ့လည်ပိုင်းမှာ တဒေါ်လာကို ၄၄၅၀ကျပ် မှာ ရပ်တည်နေပါတယ်။
