ရခိုင်ပြည်နယ်၊ စစ်တွေမြို့မှာ ပါတီဗဟိုပြုပြီး စစ်ကောင်စီနဲ့ ပူးပေါင်းလှုပ်ရှားနေတဲ့ ရခိုင်ပြည်လွတ်မြောက်ရေးပါတီ (ALP) က သူတို့ရဲ့ တပ်ပြန်လည်ဖွဲ့စည်းခြင်း ၃ နှစ်ပြည့် အထိမ်းအမှတ်ပွဲကို စစ်တွေမြို့ စက်ရုံစုရပ်ကွက်မှာ မတ် ၂၀ နဲ့ ၂၁ ရက်နေ့တို့မှာ ကျင်းပခဲ့တယ်လို့ ALP က ထုတ်ပြန်ပါတယ်။
ရခိုင်ပြည်လွတ်မြောက်ရေးပါတီရဲ့ တပ်ပြန်လည်ဖွဲ့စည်းခြင်း ၃ နှစ်ပြည့် အထိမ်းအမှတ်မှာ သူတို့ရဲ့ တပ်ဖွဲ့ဝင်အားလုံးကို စုရုံးပြီး အင်အားပြတဲ့အနေနဲ့ မှတ်တမ်းတင်ဓာတ်ပုံတွေကို ထုတ်ပြန်ခဲ့သလို ပါတီဥက္ကဋ္ဌဖြစ်သူ ဒေါ်စောမြရာဇာလင်း ဗိုလ်ရှုသဘင်ခံမှုကိုလည်း ဓာတ်ပုံတွေနဲ့တကွ ထုတ်ပြန်ခဲ့တာ ဖြစ်ပါတယ်။
စစ်တွေမြို့နယ်အတွင်း စစ်ကောင်စီနဲ့ အာရက္ခတပ်တော် (AA) တို့ တိုက်ပွဲပြင်းထန်နေချိန်မှာ ALP က အင်အားပြလာတာဟာ သူ့တို့ရဲ့အင်အားကို အချိန်ကိုက် ထုတ်ပြလာတာလို့ ရခိုင်စစ်ရေးအကဲနေတဲ့ လူငယ်တယောက်က ပြောပါတယ်။
“စစ်တွေမှာ AA က ထိုးစစ်ဆင်နေတဲ့အချိန်မှာ ALP က သူတို့ရဲ့ တပ်ဖွဲ့ဝင်အင်အားကို ပြသလာတာဟာ စစ်ကောင်စီနဲ့အတူ စစ်တွေမှာ ခုခံသွားမယ်ဆိုတာကို အချိန်ကိုက် ထုတ်ပြလိုက်တာ ဖြစ်တယ်။ ALP ဟာ စစ်တွေမြို့မှာလည်း စစ်ကောင်စီနဲ့ ပူးပေါင်းပြီးတော့ စစ်ရေးလှုပ်ရှားမှုတွေကို ပေါ်ပေါ်ထင်ထင် လုပ်လာနေတာ တွေ့ရပြီး စစ်ကောင်စီရဲ့ ပြည်သူ့စစ်အနေနဲ့ အသုံးတော်ခံမယ့်သဘော ရှိနေတယ်။”
ရခိုင်ပြည်လွတ်မြောက်ရေးပါတီ (ALP) ဟာ ၂၀၂၁ ခုနှစ်မှာ ပါတီ ၃ ခြမ်း ကွဲသွားခဲ့ပြီး ဒေါ်စောမြရာဇာလင်း ဦးဆောင်တဲ့ ALP ပါတီဟာ စစ်တွေမြို့မှာ ဆက်လက်အခြေစိုက်ခွင့် ရရှိခဲ့သလို စစ်ကောင်စီကပြုလုပ်တဲ့ ငြိမ်းချမ်းရေးဆွေးနွေးပွဲတွေကိုလည်း အမြဲတမ်း တက်ရောက်နေတာ ဖြစ်ပါတယ်။
ဒ့ါအပြင် မတ် ၂၅ ရက်ကလည်း စစ်တွေမြို့ ဆပ်ရိုးကျရပ်ကွက်ရှိ မာရမာကြီးလူမျိုး ၃ ယောက်ကို AA နဲ့ ဆက်သွယ်မှုရှိတယ်ဆိုပြီး ALP တပ်ဖွဲ့ဝင်တွေက ဖမ်းဆီးသွားခဲ့တယ်လို့ မြို့ခံတွေက ပြောပါတယ်။
“ဘေးတွဲ ကယ်ရီမောင်းစားနေကြတဲ့ ဒေသခံ ၃ ဦးကို ALP တပ်ဖွဲ့ဝင်တွေက အင်အားသုံးပြီးတော့ ဖမ်းဆီးသွားတာ။ အဓိကတော့ AA ကို သတင်းပေးကြသူတွေ ဆိုပြီးတော့ ဖမ်းဆီးသွားကြတာ။ ပြန်လွတ်လာတာ မရှိသေးဘူး။”
ALP က ဖမ်းဆီးခဲ့တဲ့ ဦးရီမောင် (၆၂ နှစ်)၊ ကိုဇူနီကာ (၃၈ နှစ်) နဲ့ ကိုကာလာဘီ (၂၆ နှစ်) တို့ ဖြစ်ကြပြီး သူတို့အားလုံးကို ALP ရုံးချုပ်ရှိတဲ့ စက်ရုံစုရပ်ကွက်မှာ ထိန်းသိမ်းထားတာလို့ သိရပါတယ်။
ပြီးခဲ့တဲ့ ဖေဖော်ဝါရီလအတွင်းကလည်း စစ်တွေမြို့၊ မင်းဂံရပ်ကွက်က လူငယ်တချို့ကို ALP က ဖမ်းဆီးပြီး စစ်သင်တန်းတက်ခိုင်းကာ ရှေ့တန်းစစ်မြေပြင်ကို ပို့ဆောင်ခဲ့တယ်လို့ သိရပါတယ်။
