ကချင်လွတ်လပ်ရေးတပ်မတော် (KIA) သိမ်းပိုက်ထားတဲ့ ဖားကန့်လမ်းပေါ်က ကျေးရွာတချို့ကို စစ်ကောင်စီတပ်က ပြန်လည်ထိန်းချုပ်နိုင်ဖို့ ထိုးစစ်ဆင်နေပြီး လဝါးကျေးရွာအနီးတဝိုက်မှာ တိုက်ပွဲတွေ ဖြစ်ပွားနေတယ်လို့ သိရပါတယ်။

လက်ရှိ ဖားကန့် သွားလမ်းပေါ်က လဝါး၊ မအူပင်၊ ခွန်ဆိုင်ယန် စတဲ့ ကျေးရွာတွေ စစ်ရေးတင်းမာနေသလို ဝါရာဇွပ်၊ ရှဒူးဇွပ်တွေဘက်မှာလည်း တိုက်ပွဲဖြစ်နေပြီး တိုက်ပွဲဖြစ်ပွားတဲ့ဒေသတွေဟာ ကျောက်စိမ်းမှော်နဲ့ ရွှေမှော်ဒေသတွေ ဖြစ်တယ်လို့ ဆိုပါတယ်။

ဒေသခံတယောက်က “အားလုံးသိတဲ့အတိုင်း ဖားကန့်လမ်းက လဝါးတို့ နန့်ယားတို့ အဲဒီမှာ ဂိတ်ချရင် ပိုက်ဆံ အရမ်းဝင်တယ်လေ။ အရင်ကလည်း ဂိတ်တွေမှာ ဆေးမသယ်ခိုင်းတာ၊ စက်သုံးဆီ မသယ်ခိုင်းတာတွေ လုပ်ပြီး ဖားကန့်ဘက်ကို ပစ္စည်းတွေ ဖြတ်လိုက်တာ။ နန့်ယားဂိတ်ဆို စစ်ဆေးတာကြမ်းတယ်ဆိုပြီး နာမည်ကြီးပဲ။ အဲ့မှာ ကားတွေဖြတ်ရဖို့ ပိုက်ဆံပေးရတယ်။ သူတို့ အဲ့နေရာတွေကို ပြန်ထိန်းချုပ်ဖို့အတွက် စစ်ကြောင်းထိုး ကြိုးစားလာတယ်လို့ ထင်တာပဲ” လို့ ပြောပါတယ်။

စစ်ကောင်စီတပ်တွေဟာ တိုက်ပွဲမဖြစ်မီ မတ် ၂၂ ရက်မှာ လဝါးကျေးရွာအနီးတဝိုက်ကို စတင်ဗုံးကြဲ တိုက်ခိုက်ခဲ့ပြီးတော့ ၂၃ ရက်မှာတော့ ဝါရာဇွပ်ပြည်သူ့စစ်အဖွဲ့နဲ့အတူ စစ်ကောင်စီ ပူးပေါင်းတပ်တွေက ကားမိုင်းမြို့အနီး မအူပင်နဲ့ ခွန်ဆိုင်ယန်ကျေးရွာတွေကို ဝင်ရောက်တိုက်ခိုက်ခဲ့တာ ဖြစ်ပါတယ်။

မတ် ၂၃ ရက်နေ့မှာ မအူပင်ကျေးရွာရှိ KIA ဂိတ်စခန်းတခုကို စစ်ကောင်စီတပ်တွေ ဝင်ရောက်တိုက်ခိုက်နိုင်ခဲ့ပေမဲ့ ၂၄ ရက်နေ့မှာ KIA ဘက်က တန်ပြန်တိုက်ခိုက်ခံမှုကြောင့် ပြည်သူ့စစ်နဲ့ စစ်ကောင်စီတပ်တွေ တပ်ဆုတ်သွားတယ်လို့လည်း KIA ရှေ့တန်းသတင်းရင်းမြစ်က သိရပါတယ်။

မအူပင်ကျေးရွာက KIA ဂိတ်စခန်းတခုကို ဝင်ရောက်တိုက်ခိုက်ခံလိုက်ရပြီးနောက် လက်ရှိမှာ ကားမိုင်းမြို့အနီး ဖားကန့်လမ်းတစ်ကြော နှစ်ဖက်စစ်တပ် စစ်ရေးတင်းမာနေတယ်လို့ သိရပါတယ်။

ဒေသခံ နောက်တယောက်က “၂၃ ရက်နေ့က စဖြစ်တယ်။ သူတို့ မအူပင်ရွာဘက်ကို ဝင်လာတာ။ KIA ဂိတ်စခန်းတွေကို မီးရှို့ ဖျက်ဆီးလိုက်တယ်။ KIA ဘက်က ၂၄ ရက်နေ့ ပြန်သွားတိုက်ခဲ့တယ်။ အဲ့မှာ အကုန်ပြေးသွားတယ်။ လဝါးမှာတော့ တိုက်ပွဲမရှိဘူး။ မင်းဇေသန့်ပြည်သူစစ်နဲ့ စစ်ကောင်စီတပ်တွေပဲရှိတာ။ KIA စခန်း လဝါးမှာ မရှိပါဘူး” လို့ ပြောပါတယ်။

တပတ်ခန့်ကြာလာတဲ့အထိ နှစ်ဖက် စစ်ရေးတင်းမာနေတာကြောင့်  လဝါးကျေးရွာ အပါအဝင် ကားမိုင်းမြို့အနီးရှိ ကျေးရွာနေ ဒေသခံပြည်သူ အားလုံးနီးပါး နမ္မတီးမြို့နဲ့ တခြားဘေးလွတ်နိုင်တဲ့ နေရာတွေမှာ ထွက်ပြေးတိမ်းရှောင်နေကြရပါတယ်။

စစ်ဘေးရှောင်တယောက်က “ပြည်သူ့စစ်တွေ ရွာထဲဝင်လာလို့ စစ်ဘေးရှောင်ကြတာ။ အခြေအနေမကောင်းဘူးလေ။ တိုက်ပွဲဖြစ်တော့မယ်။ သူတို့က သေချာကို နေရာယူထားတာ။ ရွာထဲက အကုန်လုံး ပြေးပြီ။ တစ်ချို့ နည်းနည်းတော့ ကျန်ခဲ့တယ်” လို့ ပြောပါတယ်။

မတ် ၁၅ ရက်နေ့ကတည်းက နေ့တိုင်းနီးပါး တိုက်ပွဲတွေဖြစ်ပွားနေပြီး ဖားကန့်လမ်းကြောကိုတော့ တိုက်ပွဲဖြစ်တဲ့အချိန် ယာယီရပ်ဆိုင်းထားတဲ့ အခြေအနေမျိုးရှိပေမဲ့ ခရီးသည်ကားတွေကိုတော့ ဖြတ်သန်းခွင့်ပြုထားတယ်လို့ သိရပါတယ်။

လမ်းကြောတလျှောက်ကို ကချင်ပြည်နယ် မိုးကောင်းမြို့ အခြေစိုက် စစ်ဆင်ရေးကွပ်ကဲမှုဌာနချုပ် (စကခ ၃) လက်အောက်ခံ တပ်ရင်းတွေဖြစ်တဲ့ ခမရ (၃၈၁၊ ၃၈၂)၊ ဒေသကွပ်ကဲမှုစစ်ဌာနချုပ် (တနိုင်း) လက်အောက်ခံ ဖားကန့်မြို့နယ် လီဒူလမ်း ရှဒူဇွပ်ကျေးရွာ အခြေစိုက် ခလရ ၂၉၇ တပ်ရင်းတွေနဲ့ မင်းဇေသန့်ဦးဆောင်တဲ့ ဝရာဇွပ်ပြည်သူ့စစ် ပူးပေါင်းအဖွဲ့တွေက ပူးပေါင်းစစ်ကြောင်းထိုးနေတာ ဖြစ်ပါတယ်။ 

ဖားကန့် သွားလမ်းပေါ်က နန့်ယား၊ နန့်တိန် ကျေးရွာတွေအပါ ဖားကန့်လမ်းတလျှောက်ကို KIA ပူးပေါင်းတပ်တွေက ၂၀၂၄ ခုနှစ် ဧပြီလမှာ အပြီးသတ် တိုက်ခိုက်သိမ်းပိုက် ထိန်းချုပ်လိုက်တာ ဖြစ်ပါတယ်။

ဟန်န