လူအင်အား၊ လက်နက်အင်အားအလွန်ကျွံသုံးပြီး မိုးဗြဲမြို့ကို ပြန်လည်သိမ်းပိုက်ဖို့ စစ်ကောင်စီက အပြင်းအထန် ပြင်ဆင်နေတယ်လို့ ရှမ်းတောင်စစ်ဒေသ ဗျူဟာ (၁) ဆီက သိရပါတယ်။
စစ်ကောင်စီဟာ အခုရက်ပိုင်းထဲ ခမရ ၄၂၂ တပ်ရင်းအတွင်း စစ်အင်အားဖြည့်တင်းနေကာ PNO ပြည်သူ့စစ်နဲ့ပူးပေါင်းပြီး မိုးဗြဲမြို့ကို ထိုးစစ်ဆင်ဖို့အတွက် သိုဝှက်စွာပြင်ဆင်နေတဲ့အတွက် တော်လှန်ရေးမဟာမိတ်တပ်ပေါင်းစုတွေဘက်ကလည်း အကောင်းဆုံးစုဖွဲ့ကာ မိုးဗြဲမြို့ကို ဆက်လက်ထိန်းချုပ်ကာကွယ်နိုင်ဖို့ ပြင်ဆင်နေတယ်လို့ ရှမ်းတောင်စစ်ဒေသဗျူဟာ ၁ ရဲ့ တာဝန်ရှိသူတယောက်က ပြောပါတယ်။
“လောလောဆယ် ငြိမ်နေတယ်ဆိုပေမဲ့ ကျိတ်ပြီးပြင်ဆင်နေတယ်လို့ ယူဆရတယ်၊ စစ်ကောင်စီဟာ မိုးဗြဲမြို့ကို ပြန်လည်ထိန်းချုပ်ဖို့အတွက် လူအင်အားအလွန်ကျွံထုတ်သုံးတာ၊ ဒရုန်း၊ လက်နက်ကြီးနဲ့ လေကြောင်းအလွန်ကျွံ အသုံးပြုတာ၊ အဆိပ်ငွေ့ဗုံးနဲ့ မီးလောင်ဗုံးတွေကို အဓိကသုံးပြီး တိုက်ခိုက်လာနိုင်တယ်လို့ မဟာမိတ်တပ်ပေါင်းစုဘက်က ခန့်မှန်းထားပါတယ်။”
စစ်ကောင်စီရဲ့ လူအင်အားအများအပြားဟာ မိုးဗြဲကို ထိုးစစ်ဆင်ဖို့အတွက် ရောက်ရှိနေတာတွေကိုလည်း ထောက်လှမ်းရရှိထားတာကို KNDF တပ်ရင်း ၃ က မတ် ၂၆ ရက်နေ့မှာ အသိပေးထုတ်ပြန်ထားပါတယ်။
မတ် ၁၃ ရက်နေ့ကလည်း စစ်ကောင်စီဟာ ဒရုန်း၊လက်နက်ကြီး အလွန်အကျွံသုံးကာ မိုးဗြဲကို ထိုးစစ်ဆင်ခဲ့တဲ့အတွက် ရှေ့တန်းကာကင်းနေရာတချို့ကို တော်လှန်ရေးတပ်ဖွဲ့တွေဘက်က ဆုတ်ခွာပေးခဲ့ရပေမဲ့ မတ် ၁၄ ရက်နေ့မှာ တော်လှန်ရေးတပ်ဖွဲ့တွေရဲ့ ပြန်လည်ထိုးစစ်ဆင်မှုကြောင့် စစ်ကောင်စီဘက်က ၁၅ ဦးသေဆုံးကာ ခမရ ၄၂၂ တပ်ရင်းထဲကို ဆုတ်ခွာသွားခဲ့ပါတယ်။
စစ်ကောင်စီဟာ လူအင်အားအများအပြားကို အဓမ္မတပ်စုဆောင်းနေပေမဲ့ မြေပြင်မှာရှိတဲ့ စစ်ကောင်စီတပ်သား ရဲဘော်တွေဟာ တရက်ပြီးတရက် အလေးဝင်လာနိုင်ဖို့အတွက် ပိုမိုဆက်သွယ်လာတယ်လို့ ရှမ်းတောင်စစ်ဒေသ ဗျူဟာ (၁) က အသိပေးထားပါတယ်။
