မြန်မာ-ထိုင်းနယ်စပ် မဲ​ဆောက်မြို့နဲ့ တာ​ဆောင်ယမ်းမြို့ကိုပြေးဆွဲတဲ့ လိမ္မော်ရောင် လိုင်းကားပေါ်မှာ  မတ် ၂၆ ရက်​က လက်နက်တွေ သိမ်းဆည်းရမိတယ်လို့ ထိုင်းဒေသကွပ်ကဲ​ရေး တပ်ဖွဲ့ကနေ သိရပါတယ်။

မနေ့​ မွန်းလွဲ ၂ နာရီခွဲလောက်က  မယ်လမတ်မြို့၊ ဟွေ့ဟဲ စစ်​ဆေး​ရေးဂိတ်မှာ ဖြတ်သန်းသွားလာတဲ့ ကားတွေကို  ထိုင်းလုံခြုံရေးတပ်ဖွဲ့တွေက စစ်ဆေးရာမှာ လိုင်းကား တစီးပေါ်ကနေ  လက်နက်နဲ့ ကျည်ဆန်တွေ  သိမ်းဆည်းရမိတာပါ။ 

လက်နက်တွေထဲမှာ  9မမ ၂ လက်၊ ကျည်အိတ် ၂ ခု၊  9 မမ ကျည် ၂၀၀ လုံး၊ လက်ပစ်ဗုံး M.67 တလုံးနဲ့  လက်ပစ်ဗုံး K75  တလုံးလို့ ပါဝင်ပါတယ်။ 

အဆိုပါလက်နက်တွေကို လိုင်းကား​မောင်းသူက မဲ​ဆောက်မြို့တွင်း တနေရာကနေ သွားယူလာတာဖြစ်ပြီး  အိတ်မဖွင့်ဘဲ ကား​ပေါ် သယ်​ဆောင်လာတာဖြစ်ကြောင်း၊ သယ်ဆောင်ခကိုတော့ တာ​ဆောင်ယမ်းမြို့၊ မဲစာလစ်ရွာ ဘုန်း​တော်ကြီး​ကျောင်းအ​ရှေ့​ရောက်မှ  ရမှာဖြစ်တယ်လို့ ထိုင်းကားမောင်းသမားက  ထွက်ဆိုထားပါတယ်။

အဆိုပါလက်နက်တွေဟာ ကရင်လက်နက်ကိုင်​အဖွဲ့ရဲ့ လက်နက်တွေဖြစ်နိုင်တယ်လို့  ထိုင်းသတင်းရင်းမြစ်က ဆိုပေမဲ့ အတည်ပြုနိုင်ခြင်းတော့မရှိပါဘူး။ ဖမ်းဆီးခံရတဲ့ကားအပါ လက်နက်​တွေကိုတော့ ထိုင်းနိုင်ငံရဲ့ တရားဥပ​ဒေအတိုင်း အ​ရေးယူ​ဆောင်ရွက်နိုင်ဖို့  မယ်လမတ်မြို့ ရဲစခန်းကို လွှဲ​ပြောင်း​ပေးထားပါတယ်။