စစ်ခေါင်းဆောင်ရဲ့ တိုင်းပြည်အရေးကိစ္စ လုပ်ဆောင်ချက်တွေကို ဂုဏ်ယူကြောင်း ဖက်ဆစ်တော်လှန်ရေးနေ့ (တပ်မတော်နေ့) အခမ်းအနားကို တက်ရောက်ဖို့လာတဲ့ အငြိမ်းစား စစ်တပ် အရာရှိတွေက ပြောဆိုလိုက်ပါတယ်။
မတ် ၂၇ ရက်မှာ ကျရောက်တဲ့ နှစ် ၈၀ ပြည့် တပ်မတော်နေ့ကို တက်ရောက်မယ့် သမ္မတဟောင်း ဦးသိန်းစိန်နဲ့အတူ အငြိမ်းစား တပ်မတော်အရာရှိတွေကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က နေပြည်တော်မှာ ဂါရဝပြုချိန် ပြောကြားလိုက်တာလို့ ဒီနေ့ထုတ် စစ်တပ်အာဘော်သတင်းစာတွေမှာ ဖော်ပြထားတာပါ။
သမ္မတဟောင်း ဦးသိန်းစိန်က အငြိမ်းစား စစ်တပ်အရာရှိတွေကိုယ်စား ဩဝါဒစကား ပြောကြားခဲ့တာဖြစ်ပြီး စစ်ခေါင်းဆောင်ရဲ့ ဦးဆောင်မှုနဲ့ တပ်မတော်အရေးကိစ္စတွေ၊ တိုင်းပြည်တည်ငြိမ်ရေးတွေနဲ့အတူ လူမှုစီးပွားတိုးတက်ရေးကို နေ့မအား ညမအား ဆောင်ရွက်နေတာကို ဂုဏ်ယူအားပေးကြောင်း ပြောကြားခဲ့ပါတယ်။
ပြည်သူရွေးချယ်တင်မြှောက်ထားတဲ့ အရပ်သားအစိုးရကို မဲစာရင်းအကြောင်းပြပြီး စစ်ကောင်စီက တိုင်းပြည်အာဏာကို အဓမ္မသိမ်းယူခဲ့တာ ၄ နှစ်ကျော်ကာလ ရောက်လာပြီလည်း ဖြစ်ပါတယ်။
လက်ရှိမှာ အာဏာသိမ်းမှုကို ဆန့်ကျင်တဲ့ နိုင်ငံတဝန်းက ပုံစံမျိုးစုံနဲ့ ခုခံစစ်တွေကို ဆင်နွှဲနေပြီး နိုင်ငံတဝန်း တိုက်ပွဲတွေဖြစ်နေချိန်နဲ့ နိုင်ငံတကာပိတ်ဆို့မှုတွေကြား စီးပွားရေး ဆက်တိုက် ကျဆင်းနေပြီး လူထုအကျပ်အတည်းဆိုက်နေချိန်လို့ ပြည်တွင်း ပြည်ပ သုံးသပ်ချက်တွေ ရှိနေချိန်မှာပဲ အငြိမ်းစား စစ်တပ်အရာရှိတွေက စစ်ခေါင်းဆောင်လုပ်ရပ်တွေကို အားပေးဂုဏ်ယူကြောင်း ထုတ်ပြောလာတာလည်း ဖြစ်ပါတယ်။
