ဧပြီလစတင်မယ့် ၂၀၂၅-၂၆ ဘဏ္ဍာနှစ်မှာ မြန်မာနိုင်ငံရဲ့ ပြည်တွင်းအသားတင်ထုတ်လုပ်မှုနဲ့ ဝန်ဆောင်မှုတန်ဖိုး (GDP) ဟာ ကျပ် ၁၇၁, ၄၉၈ ဘီလီယံနဲ့ စီးပွားရေး ဖွံ့ဖြိုးတိုးတက်မှုနှုန်း ၃ ရာခိုင်နှုန်းရဖို့ မျှော်မှန်းထားတယ်လို့ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောပါတယ်။ 

လက်ရှိ ပြည်တွင်းမှာ နိုင်ငံရေးမတည်ငြိမ်မှု၊ စစ်ရေးပဋိပက္ခတွေနဲ့ စီးပွားရေးလုပ်ကိုင်ရ ခက်ခဲနေပေမဲ့ စစ်ခေါင်းဆောင်ကတော့ မတ် ၂၄ ရက် နေပြည်တော်မှာ ကျင်းပတဲ့ ဘဏ္ဍာရေးဆိုင်ရာကော်မရှင် အစည်းအဝေးမှာ စီးပွားရေးတိုးတက်မယ်လို့ ပြောကြားလိုက်တာပါ။

အဲဒီကော်မရှင်မှာ ၂၀၂၅-၂၆ ဘဏ္ဍာနှစ်အတွက် ပြည်ထောင်စုဘဏ္ဍာငွေ အရအသုံးခန့်မှန်းခြေ ငွေစာရင်းနဲ့ အဲဒီငွေစာရင်းကို အခြေပြု ရေးဆွဲထားတဲ့ ဘဏ္ဍာငွေ အရအသုံးဆိုင်ရာ ဥပဒေကြမ်းတို့ကို ဘဏ္ဍာရေးဆိုင်ရာကော်မရှင် သုံးသပ်ဆွေးနွေးခဲ့တယ်လို့ သိရပါတယ်။

ပြီးခဲ့တဲ့ ၂၀၂၄-၂၅ ဘဏ္ဍာနှစ်မှာတော့ ပြည်တွင်း အသားတင်ထုတ်လုပ်မှုနဲ့ ဝန်ဆောင်မှု တန်ဖိုး (GDP) ကို ကျပ် ၁၅၅,၅၄၃ ဘီလီယံရှိမယ်လို့ မျှော်မှန်းခဲ့တာကြောင့် ဘီလီယံ ၁၆,၀၀၀ ဝန်းကျင်လောက် တိုးပြီး မျှော်မှန်းထားတာကို တွေ့ရပါတယ်။

ဒါ့အပြင် ၂၀၂၅-၂၆ ဘဏ္ဍာနှစ်မှာ လူတဦးကျ ထုတ်လုပ်မှုနှင့် ဝန်ဆောင်မှုတန်ဖိုး (GDP per Capita) မှာ ကျပ် ၃ ဒသမ ၃ သန်းကျော် ရှိမယ်လို့ ခန့်မှန်းထားပြီး ၂၀၂၄-၂၅ ဘဏ္ဍာနှစ်အတွက်တော့ ၂ ဒသမ ၇ သန်းလို့ ခန့်မှန်းခဲ့ပါတယ်။

အခု မတ်လကုန်မှာ ကုန်ဆုံးမယ့် ၂၀၂၄-၂၅ လက်ရှိဘဏ္ဍာနှစ် ကုန်ဆုံးချိန်မှာတော့ စွမ်းအင်၊ သတ္တုနဲ့ တွင်းထွက်ပစ္စည်းကဏ္ဍ၊ လျှပ်စစ်ကဏ္ဍများမှအပ ကျန်ကဏ္ဍတွေမှာ တိုးတက်မှု ရှိမယ်လို့ စစ်ကောင်စီက ခန့်မှန်းထားပါတယ်။

တဖက်မှာတော့ စစ်ကောင်စီဟာ ဘဏ္ဍာငွေတွေကို နိုင်ငံတော်တည်ဆောက်ရေးအတွက်ဆိုပြီး ပြည်ထဲရေး၊ ကာကွယ်ရေး၊ ကျန်းမာရေးနှင့် ပညာရေးကဏ္ဍတွေမှာ အသုံးစရိတ်တွေ တိုးမြှင့် သုံးစွဲနေတယ်လို့ ဘဏ္ဍာရေးကော်မရှင် ဥက္ကဋ္ဌ တာဝန်ယူထားတဲ့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားထားပါတယ်။