ဆန်ချိုကို အပြီးသတ်မခေါ်ယူပါက ချဲလ်ဆီးအသင်း မန်ယူကို လျော်ကြေးပေးရမည်
DVB
·
March 25, 2025
ချဲလ်ဆီးအသင်းဟာ တောင်ပံတိုက်စစ်မှူး ဂျေဒန်ဆန်ချိုကို အပြီးသတ် မခေါ်ယူခဲ့ဘူးဆိုရင် မန်ယူအသင်းကို လျော်ကြေးပေးဆောင်သွားရမယ်လို့ သိရပါတယ်။
ချဲလ်ဆီးဟာ ပရီးမီးယားလိဂ်မှာ အဆင့် ၁၄ နဲ့အထက် ရပ်တည်ခဲ့မယ်ဆိုရင် ဆန်ချိုကို ရာသီအကုန်မှာ အပြီးသတ်ခေါ်ယူမယ်ဆိုတဲ့ တာဝန်ခံမှုနဲ့ အငှားခေါ်ယူခဲ့တာပါ။
ဆန်ချိုကို မခေါ်ယူဘူးဆိုရင် အသင်းရဲ့ အဆင့်ရပ်တည်မှုအလိုက် လျော်ကြေးပမာဏ ပြောင်းလဲသွားနိုင်ပြီး ပေါင် ၂၂ သန်းကနေ ၂၅ သန်းအထိ ရှိနိုင်တယ်လို့ The Athletic သတင်းမှာ ဖော်ပြပါတယ်။
ချဲလ်ဆီးအသင်းဟာ လာမယ့်ရာသီမှာ တောင်ပံတိုက်စစ်ကစားသမားတယောက် ခေါ်ယူဖို့ ရှာဖွေနေတာကြောင့် ဆန်ချိုရဲ့အနာဂတ်ကို စောင့်ကြည့်ရနိုင်ပါတယ်။
လတ်တလောမှာတော့ ဆန်ချိုဟာ နည်းပြ မာရက်စ်ကာရဲ့ ဦးစားပေး ကစားသမားအဖြစ် ရှိနေဆဲဖြစ်ပြီး ပရီးမီးယားလိဂ် ၂၃ ပွဲအထိ ကစားထားပါတယ်။
Photo: Reuters
