နိုင်ငံခြားငွေလဲလှယ်နှုန်း ပြန်ကျဆင်းလာတာကြောင့် ပြည်တွင်း စားအုန်းဆီရည်ညွှန်းဈေး ဆက်လက်ကျဆင်း‌‌လာပါတယ်။

စားအုန်းဆီ ရည်ညွှန်းဈေးဟာ ပြီးခဲ့တဲ့ ဇန်နဝါရီ ၁ ရက်မှာ  တပိဿာကို  ၇,၂၈၀ ကျပ် ရှိခဲ့ရာက လက်ရှိမှာ ၆၈၅၅ ကျပ်အထိ ဈေးနှုန်း ပြန်ကျဆင်းနေတာပါ။

စားအုန်းဆီဈေးနှုန်း ကျဆင်းမှုက အင်ဒိုနီးရှားနဲ့ မလေးရှားနိုင်ငံတို့က တင်သွင်းတဲ့ ဈေးနှုန်းနဲ့ နိုင်ငံခြားငွေလဲလှယ်နှုန်းတို့အပေါ် မူတည်နေတယ်လို့ စားသုံးသူရေးရာဦးစီးဌာနက ဆိုပါတယ်။

စားအုန်းဆီ ရည်ညွှန်းဈေးဟာ သုံးလဆက်တိုက် ဈေးပြန်ကျလာတာဖြစ်ပြီး တပိဿာကို  ၄၂၅ ကျပ်အထိ ဈေးကျဆင်းမှု ရှိခဲ့ပါတယ်။

စစ်ကောင်စီက အိမ်ထောင်စုအလိုက် ဆီစာအုပ်နဲ့ ရောင်းချပေးနေတဲ့ ဈေးနှုန်းကတော့ တပိဿာကို ကျပ် ၇၀၀၀ အထက် ရှိ‌တယ်လို့ ရန်ကုန်မြို့နေ ပြည်သူတွေထံက သိရပါတယ်။

စစ်ကောင်စီလက်ထက်မှာ ရာအိမ်မှူးတွေကတဆင့် အိမ်ထောင်စုအလိုက် ဆီစာအုပ်တွေ ထုတ်ပေးပြီး မိသားစုတစုကို တပတ် ဆီ ၅၀ ကျပ်သားနှုန်း ဝယ်ယူခွင့်ပေးနေတာပါ။ ဒါပေမဲ့ ဧည့်စာရင်းနဲ့ နေထိုင်သူတွေကတော့ လက်လီဈေး တပိဿာ ကို ၁၀,၀၀၀ ကျပ်ကနေ ၁၂,၀၀၀ ကြား ပေးပြီး ဝယ်ယူသုံးစွဲနေရတယ်လို့   သိရပါတယ်။