စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်းက စစ်တပ်ထောက်ခံတဲ့ အင်းမထီးရွာ၊ ဇီးဖြူကုန်းရွာ၊ ကန့်ဒေါင့်ရွာ အနီးဝန်ကျင် ကျေးရွာက ပြည်သူတွေနဲ့ ပုလဲမြို့ပေါ်ကနေ ထွက်ပြေး စစ်ရှောင်လာတဲ့ ဒေသခံပြည်သူတွေဟာ စားဝတ်နေရေးနဲ့ သောက်သုံးရေရှားပါးမှု ကြုံတွေ့နေရပါတယ်။
အဆိုပါ စစ်ဘေးရှောင်စခန်းတွေမှာ စားဝတ်နေရေး အခက်အခဲတွေနဲ့ ရင်ဆိုင်နေကြရသလို သောက်သုံးရေရှားပါးတဲ့ ပြဿနာကလည်း နှစ်စဥ် နွေရာသီရောက်တိုင်း ကြုံရပေမဲ့ အခု ၂၀၂၅ ခုနှစ်မှာတော့ ပုလဲမြို့ပေါ် တိုက်ပွဲဖြစ်ပွားပြီး ထွက်ပြေးလာတဲ့ စစ်ရှောင်လူဦးရေပါ တိုးလာတာကြောင့် ဒီနှစ်နွေရာသီမှာ သောက်ရေသုံးရေ ရှားပါးမှု ပိုမိုကြုံတွေ့ရနိုင်တယ်လို့ ဒေသခံတွေက ခန့်မှန်းနေကြပါတယ်။
ဒေသခံရွာသူတယောက်က “ရေက ရှားတာပေါ့။ ရေက စောင့်စောင့်ပြီး ခပ်ရတာပေါ့။ ရေခပ်ရတာလည်း တော်တော်လေးလှမ်းတယ်။ အခုကျတော့ နွေရာသီရောက်ပြီဆိုတော့ ရေခက်ခဲမှုက တော်တော်လေးရှိတာပေါ့။ ကျမတို့က စစ်ကိုင်းတိုင်း၊ ပုလဲမြို့နယ်၊ အင်မထီး ပျူရွာအနီး၊ သာယာကုန်းကျေးရွာကနေ စစ်ရှောင်လာခဲ့ရတာပါ။ အခု စစ်ရှောင်ရတာ ၄ နှစ်အထိ ရှိနေပြီ။ ရွာကနေ ထွက်လာခဲ့ရတာက ပျူရွာက ရွာကို မီးရှို့လို့ မနေရဲလို့ အခုလို စစ်ရှောင်လာရတာပါ” လို့ ပြောပါတယ်။
ပုလဲမြို့နယ်အတွင်းက စစ်ရှောင်တွေဟာ ပျူရွာတွေနဲ့ဝေးရာ တောင်ကုန်း၊ တောင်ပေါ်နေရာတွေကို စစ်ရှောင်နေကြရပြီး ပမာဏအလိုက် ရေသိုလှောင်ကန်တွေ တူးထားပြီး မိုးရာသီမှာ တင်ကျန်ခဲ့တဲ့ ကန်ရေတွေနဲ့ ချောင်းမြောင်းတွေက ရေကိုသာ အဓိကအားထားပြီး သောက်သုံးရေအဖြစ် အမှီပြု နေထိုင်နေကြရတာလည်း ဖြစ်ပါတယ်။
စစ်ဘေးရှောင် အမျိုးသမီးတယောက်က “ချိုးရေရဖို့က တတိုင်နားအနီးအထိ သွားရတယ်။ သုံးရေကတော့ တတိုင်နားအနီးအထိ မသွားရဘူး။ စားဝတ်နေရေးကတော့ သူများနောက်လိုက်ပြီး ရုန်းကန်ပြီးမှ လုပ်ကိုင်စားသောက်ရတာပေါ့။ ကိုယ့်နေရာကိုယ် မနေနိုင်တော့။ ရေကတော့ မရှိတဲ့အချိန် သွားရင်တော့ စောင့်ခပ်ရတာပေါ့။ ရှိတဲ့အချိန် သွားနိုင်ရင်တော့ ခပ်ပြီး ပြန်လာရတာပေါ့။ စစ်ဘေးရှောင်ဆိုတော့ အခက်အခဲအမျိုးစုံ တွေ့ရတာပဲ။ ကိုယ့်နေရာကိုယ် နေခဲ့တုန်းကတော့ ချက်စရာ၊ ပြုတ်စရာ မပူခဲ့ရဘူး။ စားဖို့ သောက်ဖို့လည်း မပူရဘူးပေါ့။ တခြားဟာတော့ မပူပါဘူး၊ စားဝတ်နေရေးထက် ရေက ပိုခက်ခဲနေပါတယ်” လို့ ပြောပါတယ်။
စစ်ကိုင်းတိုင်းအတွင်းမှာ စစ်ကောင်စီတပ်က ပြည်သူနေအိမ်တွေ မီးရှို့ဖျက်ဆီးလို့ အိုးမဲ့အိမ်မဲ့ ဖြစ်နေကြရတဲ့ ဒုက္ခသည်တွေ ရှိနေသလို တိုက်ပွဲဖြစ်ပွားလို့ ကျေးရွာတွေကို စွန့်ခွာပြီး စစ်ဘေးရှောင်နေကြတဲ့သူတွေလည်း ရှိနေပါတယ်။
အဆိုပါဒုက္ခသည်တွေဟာ ပူပြင်းတဲ့ နွေရာသီကို ဖြတ်သန်းကြရမှာဖြစ်ပြီး သောက်သုံးရေ ရှားပါးမှု အပါအဝင် စားဝတ်နေရေး ခက်ခဲမှုတွေနဲ့ ကြုံတွေ့ကြရမှာ ဖြစ်ပါတယ်။
