ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ ဘီသူထက်ရွာမှာ ခြံထဲကနေကောက်လာတဲ့ မိုင်းကို ဖြုတ်ဖို့ကြိုးစားရာကနေ ပေါက်ကွဲလို့ ဖခင်ဖြစ်သူ သေဆုံးပြီး ကလေးငယ် ၃ ယောက် ထိခိုက်ဒဏ်ရာရရှိတယ်လို့ စုံစမ်းသိရှိရပါတယ်။

မတ် ၂၂ ရက်က ပေါက်ကွဲခဲ့တာဖြစ်ပြီး သေဆုံးသူဟာ အသက် ၃၅ နှစ်အရွယ် ဦးဆိုဒဲဖြစ်ပြီး ဒဏ်ရာရရှိသူတွေကတော့ ဦးဆိုးဒဲရဲ့ သား ၂ ယောက်နဲ့ သမီးတို့ ဖြစ်တယ်လို့ သိရပါတယ်။

ရွာခံတယောက်က “ခြံကနေမှ ကောက်လာတာဖြစ်တယ်။ မိုင်းက ဘူးပုံစံဆိုတော့ ကွမ်းအစ် လုပ်မယ်ဆိုပြီး ယူလာတာ၊ အိမ်ရောက်မှ ဆေးမယ်လုပ်ပြီး စမ်းလှည့်ကြည့်တော့ ကွဲသွားတယ်။ အဖေဖြစ်သူတော့ ပွဲချင်းပဲ သေသွားတယ်” လို့ ပြောပါတယ်။

ဒဏ်ရာရထားတဲ့ အသက် ၁၂ နှစ်နဲ့ ၁၀ နှစ်အရွယ်ယောကျ်ားလေး၊ ၅ နှစ်အရွယ် မိန်းကလေးတို့ကို ဖရူဆိုမြို့နယ်က ဆေးရုံတခုမှာ ဆေးကုသနေပြီး မိန်းကလေးကတော့ အသက်အန္တရာယ် စိုးရိမ်နေရတယ်လို့ ပြောပါတယ်။

ဖယ်ခုံမြို့နယ်မှာ မိုင်းအန္တရာယ်နဲ့ပတ်သက်လို့ ပညာပေးတာရှိပေမယ့် မိုင်းကြောင့်ထိခိုက်သူ၊ သေဆုံးသူအရေအတွက် မြင့်တက်နေဆဲပဲလို့ ပရဟိတလုပ်နေသူတွေဆီက သိရပါတယ်။

ဖယ်ခုံမြို့နယ် ဒေသခံတွေရဲ့ တောင်ယာခြံတွေမှာ၊ ကျေးရွာလမ်းခုလတ်နေရာမှာ၊ စာသင်ကျောင်းတွေမှာ၊ ဘာသာရေးကျောင်းတွေနဲ့ လူသွားလာများတဲ့နေရာတွေမှာ တိုက်ပွဲဖြစ်ပွားပြီးနောက် မြေမြှုပ်မိုင်းနဲ့ မပေါက်ကွဲသေးတဲ့ စစ်ကျန်လက်နက်တွေ အများကြီး ကျန်နေခဲ့တယ်လို့ ဒေသခံတွေက ပြောပါတယ်။

အဲဒီမြေမြှုပ်မိုင်းနဲ့ ပေါက်ကွဲတတ်တဲ့ စစ်ကျန်လက်နက်တွေကို တာဝန်ရှိသူတွေက လာရောက် မရှင်းလင်းပေးသေးတာကြောင့် ဒေသခံတွေရဲ့ အသက်အန္တရာယ်ကို နေ့တိုင်း ခြိမ်းခြောက်နေတဲ့ စိန်ခေါ်မှုတရပ် ဖြစ်နေတယ်လို့လည်း ဒေသခံတွေက ပြောပါတယ်။

Photo: ဒေသခံပေးပို့