ဘဏ်ပိတ်ရက်ရှည်အပြီးမှာ မြန်မာ့မတ်ပဲနဲ့ ပဲစင်းငုံ ဈေးအကျနဲ့ ပြန်ဖွင့်လာတယ်လို့ ပြည်တွင်း ဈေးကွက်အတွင်းက သိရပါတယ်။

မတ်ပဲကို အခွန်လွတ်တင်သွင်းခွင့် သက်တမ်း တနှစ် ထပ်တိုးတဲ့ အိန္ဒိယအစိုးရရဲ့ ပဲတင်သွင်းမှု မူဝါဒ အသစ်ထွက်လာတာကြောင့် ပြီးခဲ့တဲ့ ရုံးပိတ်ရက်ရှည် မတိုင်ခင်က ပြည်တွင်းဈေးကွက်မှာ မတ်ပဲနဲ့ ပဲစင်းငုံဟာဝယ်လိုအားနဲ့အတူ ဈေးနှုန်း မြင့်တက်ခဲ့တာပါ။

ဒါပေမဲ့ ရုံးပိတ်ရက်ရှည်အပြီး ဒီနေ့ဈေးပြန်အဖွင့်မှာတော့ မတ်ပဲရော၊ ပဲစင်းငုံပါ ဈေးပြန်ကျလာတာ ဖြစ်ပါတယ်။

ဒီကနေ့ ရန်ကုန်ဘုရင့်နောင် ကုန်စည်ဒိုင် ဈေးကွက်မှာ မတ်ပဲ တစ်တန်ကို ၃၀၁၇၀၀၀ ကျပ်၊ ပဲစင်းငုံတစ်တန်ကို ၂၉၆၀,၀၀၀ ကျပ် ဈေးဖွင့်ထားပြီးတော့ ပိတ်ရက် ၅ ရက်အတွင်း မတ်ပဲက တစ်တန်ကို ၂၅၀၀၀ ကျပ် ၊ ပဲစင်းငုံက တစ်တန်ကို ၄၁၀၀၀ ကျပ် ဈေးပြန်ကျလာပါတယ်။

ပဲကုန်သည်တယောက်က " မတ်ပဲ၊ ပဲစင်းငုံက မပိတ်ခင်ရက်ကထက် ဈေးနည်းနည်း ပြန်ကျသွားတယ်။ ပဲစင်းငုံက သိန်း ၃၀ အောက် ပြန်ရောက်တယ်။ မတ်ပဲက‌ပြန်ကျတယ်ဆို ပေမယ့် သိန်း ၃၀ အထက်မှာပဲ ရှိနေပါသေးတယ်။ အရောင်းအဝယ်ကလည်း ပုံမှန်ပါပဲ" လို့ ပြောပါတယ်။

နိုင်ငံခြားငွေဈေး ဆက်တိုက်ပြန်ဆင်း နေပေမဲ့  မြန်မာ့မတ်ပဲနဲ့ ပဲစင်းငုံ FOB ဈေးက ငြိမ်နေပြီး အရောင်းအဝယ် ပုံမှန် ဖြစ်နေတယ်လို့ ဈေးကွက်အတွင်းက သိရပါတယ်။

မြန်မာနိုင်ငံက စိုက်ပျိုးထုတ်လုပ်တဲ့ မတ်ပဲ ၊ ပဲစင်းငုံနဲ့ ကို အိန္ဒိယ နိုင်ငံကို  အဓိက တင်ပို့ရောင်းချ နေတာပါ။

အိန္ဒိယဟာ မကြာသေးခင်က မတ်ပဲနဲ့ ပဲစင်းငုံ အခွန်လွတ် တင်သွင်းခွင့်ကို သက်တမ်း တစ်နှစ် ထပ်တိုးပေးထားပြီးလာမယ့်နှစ်မှာလည်း G to G အစီအစဉ်နဲ့ မတ်ပဲ၊ ပဲစင်းငုံကို ၂ ဆတိုး ဝယ်ယူဖို့ရှိ  နေပါတယ်။