စစ်ကိုင်းတိုင်း ဗမာ့အမျိုးသားတော်လှန်ရေးတပ်မတော် (BNRA) တပ်ဖွဲ့ဆီကို စစ်ကောင်စီ တပ်ဖွဲ့ဝင် ၃ ယောက် လက်နက်ခဲယမ်းနဲ့အတူ အလင်းဝင်ရောက်လာတယ်လို့ BNRA တပ်ဖွဲ့က မတ် ၁၂ ရက်မှာ ထုတ်ပြန်ပါတယ်။
စစ်ကိုင်းတိုင်း တပ်မ ၃၃ လက်အောက်ခံ စစ်ကောင်စီတပ်ဖွဲ့ဝင် တယောက်နဲ့ ပုလဲမြို့အခြေစိုက် စစ်ကောင်စီတပ်ဖွဲ့ဝင် ၂ ယောက်ဟာ ဖေဖော်ဝါရီ ၂၇ ရက်နဲ့ မတ် ၆ ရက်နေ့တွေက ဗမာ့အမျိုးသားတော်လှန်ရေးတပ်မတော် (BNRA) တပ်ဖွဲ့ဆီကို အလင်းဝင်ရောက်လာတယ်လို့ ဆိုပါတယ်။
BNRA တပ်ဖွဲ့ရဲ့ ဗဟိုသတင်းပြန်ကြားရေးတာဝန်ခံက “တပ်မ ၃၃ စစ်ကောင်စီတပ်က ဒုတပ်ကြပ် လှမင်းက MA1 သေနတ် ၁ လက်နဲ့ ဖေဖော်ဝါရီလ ၂၇ ရက်နေ့က ဝင်ရောက်လာတာဖြစ်ပြီး မတ်လ ၆ ရက်နေ့က ပုလဲမြို့ထွေအုပ်ရုံးမှာ တာဝန်ကျနေတဲ့ စစ်ကောင်စီတပ်ဖွဲ့ဝင် ၂ ဦးက MA 1 သေနတ် ၁ လက်နဲ့ သေနတ်ကျည် ၄၉ တောင့်နဲ့အတူ BNRA တပ်ဖွဲ့ကို ချိတ်ဆက်ပြီး ဝင်ရောက်လာတာဖြစ်တယ်” လို့ DVB ကို ပြောပါတယ်။
မတ် ၆ ရက်က ဝင်ရောက်လာတဲ့ ပုလဲထွေအုပ်ရုံးက စစ်ကောင်စီတပ်ဖွဲ့ဝင် ၂ ယောက်ဟာ စစ်ကောင်စီတပ်က မတရား တပ်သားသစ် စုဆောင်းခံခဲ့ရသူတွေဖြစ်ပြီး လက်နက်နဲ့အတူ အလင်းဝင်ရောက်လာတဲ့ စစ်ကောင်စီတပ်ဖွဲ့ဝင် ၂ ယောက်ကို တယောက် မြန်မာကျပ်ငွေ သိန်း ၂၀ ဆီ ပေးအပ်ခဲ့တယ်လို့ ဆိုပါတယ်။
အလင်းဝင်ရောက်လာတဲ့ စစ်ကောင်စီတပ်ဖွဲ့ဝင် ၃ ယောက်စလုံးကို လုံခြုံရေးစိတ်ချရတဲ့ နေရာတွေကို ပို့ဆောင်ပေးခဲ့ပြီး စစ်ကောင်စီလက်အောက်မှာ တာဝန်ထမ်းဆောင်နေကြတဲ့ တပ်ဖွဲ့ဝင်တွေရော စစ်မှုထမ်းဥပဒေကြောင့် မဖြစ်မနေ စစ်တပ်ထဲ ရောက်ရှိနေသူတွေပါ အခွင့်အရေးရရင် ရသလို တော်လှန်ရေးတပ်ဖွဲ့တွေဆီ ချိတ်ဆက် ပူးပေါင်းအလင်းဝင်ဖို့ BNRA တပ်ဖွဲ့က တိုက်တွန်းထားပါတယ်။
ဒီဇင်ဘာ ၁၁ ရက်ကလည်း ပုလဲမြို့နယ်အတွင်းမှာရှိတဲ့ စစ်ကောင်စီတပ်ဖွဲ့ဝင် ၇ ယောက် လက်နက်ခဲယမ်းတွေနဲ့အတူ ဗမာအမျိုးသားတော်လှန်ရေးတပ်မတော် (BNRA) တပ်ဖွဲ့ဆီ အလင်းဝင်ရောက်လာတယ်လို့ BNRA တပ်ဖွဲ့ဝင်တွေဆီက သိရပါတယ်။
